૧. વિભઙ્ગવારો

નહેતુપચ્ચયો

૬. નોઉપાદાનં ધમ્મં પટિચ્ચ નોઉપાદાનો ધમ્મો ઉપ્પજ્જતિ નહેતુપચ્ચયા – અહેતુકં નોઉપાદાનં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… અહેતુકપટિસન્ધિક્ખણે…પે… ખન્ધે પટિચ્ચ વત્થુ, વત્થું પટિચ્ચ ખન્ધા, એકં મહાભૂતં…પે… મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં…પે… વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (૧)

નઆરમ્મણપચ્ચયાદિ

૭. ઉપાદાનં ધમ્મં પટિચ્ચ નોઉપાદાનો ધમ્મો ઉપ્પજ્જતિ નઆરમ્મણપચ્ચયા – ઉપાદાને પટિચ્ચ ચિત્તસમુટ્ઠાનં રૂપં. (૧)

નોઉપાદાનં ધમ્મં પટિચ્ચ નોઉપાદાનો ધમ્મો ઉપ્પજ્જતિ નઆરમ્મણપચ્ચયા – નોઉપાદાને ખન્ધે પટિચ્ચ ચિત્તસમુટ્ઠાનં રૂપં; પટિસન્ધિક્ખણે નોઉપાદાને ખન્ધે પટિચ્ચ કટત્તારૂપં, ખન્ધે પટિચ્ચ વત્થુ, એકં મહાભૂતં…પે… (યાવ અસઞ્ઞસત્તા). (૧)

ઉપાદાનઞ્ચ નોઉપાદાનં ચ ધમ્મં પટિચ્ચ નોઉપાદાનો ધમ્મો ઉપ્પજ્જતિ નઆરમ્મણપચ્ચયા – ઉપાદાને ચ સમ્પયુત્તકે ચ ખન્ધે પટિચ્ચ ચિત્તસમુટ્ઠાનં રૂપં, ઉપાદાને ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

નઅધિપતિપચ્ચયા… નઅનન્તરપચ્ચયા…પે… નઉપનિસ્સયપચ્ચયા.

નપુરેજાતપચ્ચયો

૮. ઉપાદાનં ધમ્મં પટિચ્ચ ઉપાદાનો ધમ્મો ઉપ્પજ્જતિ નપુરેજાતપચ્ચયા – અરૂપે અત્તવાદુપાદાનં પટિચ્ચ કામુપાદાનં, કામુપાદાનં પટિચ્ચ અત્તવાદુપાદાનં. (૧)

ઉપાદાનં ધમ્મં પટિચ્ચ નોઉપાદાનો ધમ્મો ઉપ્પજ્જતિ નપુરેજાતપચ્ચયા – અરૂપે ઉપાદાને પટિચ્ચ સમ્પયુત્તકા ખન્ધા, ઉપાદાને પટિચ્ચ ચિત્તસમુટ્ઠાનં રૂપં (સંખિત્તં, નવપિ પઞ્હા અરૂપે દ્વે ઉપાદાના).