૧. વિભઙ્ગવારો

હેતુપચ્ચયો

૯૫. ઉપાદાનઞ્ચેવ ઉપાદાનિયઞ્ચ ધમ્મં પટિચ્ચ ઉપાદાનો ચેવ ઉપાદાનિયો ચ ધમ્મો ઉપ્પજ્જતિ હેતુપચ્ચયા – દિટ્ઠુપાદાનં પટિચ્ચ કામુપાદાનં, કામુપાદાનં પટિચ્ચ દિટ્ઠુપાદાનં (ચક્કં). (૧)

ઉપાદાનઞ્ચેવ ઉપાદાનિયઞ્ચ ધમ્મં પટિચ્ચ ઉપાદાનિયો ચેવ નો ચ ઉપાદાનો ધમ્મો ઉપ્પજ્જતિ હેતુપચ્ચયા – ઉપાદાને પટિચ્ચ સમ્પયુત્તકા ખન્ધા ચિત્તસમુટ્ઠાનઞ્ચ રૂપં. (૧)

ઉપાદાનઞ્ચેવ ઉપાદાનિયઞ્ચ ધમ્મં પટિચ્ચ ઉપાદાનો ચેવ ઉપાદાનિયો ચ ઉપાદાનિયો ચેવ નો ચ ઉપાદાનો ચ ધમ્મા ઉપ્પજ્જન્તિ હેતુપચ્ચયા – દિટ્ઠુપાદાનં પટિચ્ચ કામુપાદાનં સમ્પયુત્તકા ચ ખન્ધા ચિત્તસમુટ્ઠાનાનઞ્ચ રૂપં (ચક્કં). (૩)

૯૬. ઉપાદાનિયઞ્ચેવ નો ચ ઉપાદાનં ધમ્મં પટિચ્ચ ઉપાદાનિયો ચેવ નો ચ ઉપાદાનો ધમ્મો ઉપ્પજ્જતિ હેતુપચ્ચયા – ઉપાદાનિયઞ્ચેવ નો ચ ઉપાદાનં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… (યાવ અજ્ઝત્તિકા મહાભૂતા). (૧)

ઉપાદાનિયઞ્ચેવ નો ચ ઉપાદાનં ધમ્મં પટિચ્ચ ઉપાદાનો ચેવ ઉપાદાનિયો ચ ધમ્મો ઉપ્પજ્જતિ હેતુપચ્ચયા – ઉપાદાનિયે ચેવ નો ચ ઉપાદાને ખન્ધે પટિચ્ચ ઉપાદાના. (૨)

ઉપાદાનિયઞ્ચેવ નો ચ ઉપાદાનં ધમ્મં પટિચ્ચ ઉપાદાનો ચેવ ઉપાદાનિયો ચ ઉપાદાનિયો ચેવ નો ચ ઉપાદાનો ચ ધમ્મા ઉપ્પજ્જન્તિ હેતુપચ્ચયા – ઉપાદાનિયઞ્ચેવ નો ચ ઉપાદાનં એકં ખન્ધં પટિચ્ચ તયો ખન્ધા ઉપાદાના ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે…. (૩)

૯૭. ઉપાદાનઞ્ચેવ ઉપાદાનિયઞ્ચ ઉપાદાનિયઞ્ચેવ નો ચ ઉપાદાનઞ્ચ ધમ્મં પટિચ્ચ ઉપાદાનો ચેવ ઉપાદાનિયો ચ ધમ્મો ઉપ્પજ્જતિ હેતુપચ્ચયા – દિટ્ઠુપાદાનઞ્ચ સમ્પયુત્તકે ચ ખન્ધે પટિચ્ચ કામુપાદાનં (ચક્કં). (૧)

ઉપાદાનઞ્ચેવ ઉપાદાનિયઞ્ચ ઉપાદાનિયઞ્ચેવ નો ચ ઉપાદાનઞ્ચ ધમ્મં પટિચ્ચ ઉપાદાનિયો ચેવ નો ચ ઉપાદાનો ધમ્મો ઉપ્પજ્જતિ હેતુપચ્ચયા – ઉપાદાનિયઞ્ચેવ નો ચ ઉપાદાનં એકં ખન્ધઞ્ચ ઉપાદાને ચ પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે… ઉપાદાને ચ મહાભૂતે ચ પટિચ્ચ ચિત્તસમુટ્ઠાનં રૂપં. (૨)

ઉપાદાનઞ્ચેવ ઉપાદાનિયઞ્ચ ઉપાદાનિયઞ્ચેવ નો ચ ઉપાદાનઞ્ચ ધમ્મં પટિચ્ચ ઉપાદાનો ચેવ ઉપાદાનિયો ચ ઉપાદાનિયો ચેવ નો ચ ઉપાદાનો ચ ધમ્મા ઉપ્પજ્જન્તિ હેતુપચ્ચયા – ઉપાદાનિયઞ્ચેવ નો ચ ઉપાદાનં એકં ખન્ધઞ્ચ દિટ્ઠુપાદાનઞ્ચ પટિચ્ચ તયો ખન્ધા કામુપાદાનઞ્ચ ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે… (ચક્કં). (૩)