૧. વિભઙ્ગવારો

હેતુપચ્ચયો

૬૩. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ હેતુપચ્ચયેન પચ્ચયો – ઉપાદાનસમ્પયુત્તા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

ઉપાદાનસમ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ હેતુપચ્ચયેન પચ્ચયો – ઉપાદાનસમ્પયુત્તા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો; દિટ્ઠિગતવિપ્પયુત્તલોભસહગતા હેતૂ દિટ્ઠિગતવિપ્પયુત્તલોભસ્સ ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (મૂલં કાતબ્બં) ઉપાદાનસમ્પયુત્તા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; દિટ્ઠિગતવિપ્પયુત્તલોભસહગતા હેતૂ સમ્પયુત્તકાનં ખન્ધાનં લોભસ્સ ચ ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

૬૪. ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ હેતુપચ્ચયેન પચ્ચયો – ઉપાદાનવિપ્પયુત્તા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; દિટ્ઠિગતવિપ્પયુત્તો લોભો ચિત્તસમુટ્ઠાનાનં રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (મૂલં કાતબ્બં) દિટ્ઠિગતવિપ્પયુત્તો લોભો સમ્પયુત્તકાનં ખન્ધાનં હેતુપચ્ચયેન પચ્ચયો. (મૂલં કાતબ્બં) દિટ્ઠિગતવિપ્પયુત્તો લોભો સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

૬૫. ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનસમ્પયુત્તસ્સ ધમ્મસ્સ હેતુપચ્ચયેન પચ્ચયો – દિટ્ઠિગતવિપ્પયુત્તલોભસહગતો મોહો ચ લોભો ચ સમ્પયુત્તકાનં ખન્ધાનં હેતુપચ્ચયેન પચ્ચયો. (મૂલં કાતબ્બં) દિટ્ઠિગતવિપ્પયુત્તલોભસહગતો મોહો ચ લોભો ચ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૨)

ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ હેતુપચ્ચયેન પચ્ચયો – દિટ્ઠિગતવિપ્પયુત્તલોભસહગતો મોહો ચ લોભો ચ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

આરમ્મણપચ્ચયો

૬૬. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો – ઉપાદાનસમ્પયુત્તે ખન્ધે આરબ્ભ ઉપાદાનસમ્પયુત્તા ખન્ધા ઉપ્પજ્જન્તિ. (મૂલં કાતબ્બં) ઉપાદાનસમ્પયુત્તે ખન્ધે આરબ્ભ ઉપાદાનવિપ્પયુત્તા ખન્ધા ચ લોભો ચ ઉપ્પજ્જન્તિ. (મૂલં કાતબ્બં) ઉપાદાનસમ્પયુત્તે ખન્ધે આરબ્ભ દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપ્પજ્જન્તિ. (૩)

૬૭. ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં…પે… પુબ્બે સુચિણ્ણાનિ…પે… ઝાના વુટ્ઠહિત્વા ઝાનં પચ્ચવેક્ખતિ, અસ્સાદેતિ અભિનન્દતિ, તં આરબ્ભ દિટ્ઠિગતવિપ્પયુત્તો રાગો…પે… વિચિકિચ્છા…પે… ઉદ્ધચ્ચં ઉપ્પજ્જતિ, ઝાને પરિહીને વિપ્પટિસારિસ્સ દોમનસ્સં ઉપ્પજ્જતિ. અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં…પે… નિબ્બાનં પચ્ચવેક્ખન્તિ. નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો. અરિયા ઉપાદાનવિપ્પયુત્તે પહીને કિલેસે…પે… વિક્ખમ્ભિતે કિલેસે…પે… પુબ્બે સમુદાચિણ્ણે કિલેસે…પે… ચક્ખું…પે… વત્થું ઉપાદાનવિપ્પયુત્તે ખન્ધે ચ લોભઞ્ચ અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ દિટ્ઠિગતવિપ્પયુત્તો રાગો…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ…પે… (સબ્બં પરિપુણ્ણં), દિબ્બેન ચક્ખુના… (યાવ કાયવિઞ્ઞાણં), ઉપાદાનવિપ્પયુત્તા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દાનં …પે… ઝાનં…પે… ચક્ખું…પે… વત્થું ઉપાદાનવિપ્પયુત્તે ખન્ધે ચ લોભઞ્ચ અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ. (૨)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો – ચક્ખું…પે… વત્થું ઉપાદાનવિપ્પયુત્તે ખન્ધે ચ લોભઞ્ચ આરબ્ભ દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપ્પજ્જન્તિ. (૩)

૬૮. ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દિટ્ઠિગતવિપ્પયુત્તલોભસહગતે ખન્ધે ચ લોભઞ્ચ આરબ્ભ ઉપાદાનસમ્પયુત્તા ખન્ધા ઉપ્પજ્જન્તિ. (મૂલં કાતબ્બં) દિટ્ઠિગતવિપ્પયુત્તલોભસહગતે ખન્ધે ચ લોભઞ્ચ આરબ્ભ ઉપાદાનવિપ્પયુત્તા ખન્ધા ચ લોભો ચ ઉપ્પજ્જન્તિ. (મૂલં કાતબ્બં) દિટ્ઠિગતવિપ્પયુત્તલોભસહગતે ખન્ધે ચ લોભઞ્ચ આરબ્ભ દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપ્પજ્જન્તિ. (૩)

અધિપતિપચ્ચયો

૬૯. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – ઉપાદાનસમ્પયુત્તે ખન્ધે ગરું કત્વા ઉપાદાનસમ્પયુત્તા ખન્ધા ઉપ્પજ્જન્તિ. સહજાતાધિપતિ – ઉપાદાનસમ્પયુત્તાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (મૂલં કાતબ્બં) આરમ્મણાધિપતિ, સહજાતાધિપતિ. આરમ્મણાધિપતિ – ઉપાદાનસમ્પયુત્તે ખન્ધે ગરું કત્વા દિટ્ઠિગતવિપ્પયુત્તો લોભો ઉપ્પજ્જતિ. સહજાતાધિપતિ – ઉપાદાનસમ્પયુત્તાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો; દિટ્ઠિગતવિપ્પયુત્તલોભસહગતાધિપતિ લોભસ્સ ચ ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (મૂલં કાતબ્બં) આરમ્મણાધિપતિ, સહજાતાધિપતિ. આરમ્મણાધિપતિ – ઉપાદાનસમ્પયુત્તે ખન્ધે ગરું કત્વા દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપ્પજ્જન્તિ. સહજાતાધિપતિ – ઉપાદાનસમ્પયુત્તાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો; દિટ્ઠિગતવિપ્પયુત્તલોભસહગતાધિપતિ સમ્પયુત્તકાનં ખન્ધાનં લોભસ્સ ચ ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૭૦. ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઝાના વુટ્ઠહિત્વા ઝાનં ગરું કત્વા પચ્ચવેક્ખતિ, અસ્સાદેતિ અભિનન્દતિ, તં ગરું કત્વા દિટ્ઠિગતવિપ્પયુત્તો રાગો ઉપ્પજ્જતિ…પે… અરિયા મગ્ગા વુટ્ઠહિત્વા…પે… ફલસ્સ અધિપતિપચ્ચયેન પચ્ચયો; ચક્ખું…પે… વત્થું ઉપાદાનવિપ્પયુત્તે ખન્ધે ચ લોભઞ્ચ ગરું કત્વા અસ્સાદેતિ અભિનન્દતિ, તં ગરું કત્વા દિટ્ઠિગતવિપ્પયુત્તો રાગો ઉપ્પજ્જતિ. સહજાતાધિપતિ – ઉપાદાનવિપ્પયુત્તાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં…પે… ઝાનં…પે… ચક્ખું…પે… વત્થું ઉપાદાનવિપ્પયુત્તે ખન્ધે ચ લોભઞ્ચ ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૨)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – ચક્ખું…પે… વત્થું ઉપાદાનવિપ્પયુત્તે ખન્ધે ચ લોભઞ્ચ ગરું કત્વા દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપ્પજ્જન્તિ. (૩)

૭૧. ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનસમ્પયુત્તસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દિટ્ઠિગતવિપ્પયુત્તલોભસહગતે ખન્ધે ચ લોભઞ્ચ ગરું કત્વા ઉપાદાનસમ્પયુત્તા ખન્ધા ઉપ્પજ્જન્તિ. (મૂલં કાતબ્બં) દિટ્ઠિગતવિપ્પયુત્તલોભસહગતે ખન્ધે ચ લોભઞ્ચ ગરું કત્વા દિટ્ઠિગતવિપ્પયુત્તો લોભો ઉપ્પજ્જતિ. (મૂલં કાતબ્બં) દિટ્ઠિગતવિપ્પયુત્તલોભસહગતે ખન્ધે ચ લોભઞ્ચ ગરું કત્વા દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપ્પજ્જન્તિ. (૩)

અનન્તરપચ્ચયો

૭૨. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપાદાનસમ્પયુત્તા ખન્ધા પચ્છિમાનં પચ્છિમાનં ઉપાદાનસમ્પયુત્તકાનં ખન્ધાનં અનન્તરપચ્ચયેન પચ્ચયો. (મૂલં કાતબ્બં) પુરિમા પુરિમા દિટ્ઠિગતવિપ્પયુત્તલોભસહગતા ખન્ધા પચ્છિમસ્સ પચ્છિમસ્સ દિટ્ઠિગતવિપ્પયુત્તસ્સ લોભસ્સ અનન્તરપચ્ચયેન પચ્ચયો; ઉપાદાનસમ્પયુત્તા ખન્ધા વુટ્ઠાનસ્સ અનન્તરપચ્ચયેન પચ્ચયો. (મૂલં કાતબ્બં) પુરિમા પુરિમા દિટ્ઠિગતવિપ્પયુત્તલોભસહગતા ખન્ધા પચ્છિમાનં પચ્છિમાનં દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ અનન્તરપચ્ચયેન પચ્ચયો. (૩)

૭૩. ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમો પુરિમો દિટ્ઠિગતવિપ્પયુત્તો લોભો પચ્છિમસ્સ પચ્છિમસ્સ દિટ્ઠિગતવિપ્પયુત્તસ્સ લોભસ્સ અનન્તરપચ્ચયેન પચ્ચયો; પુરિમા પુરિમા ઉપાદાનવિપ્પયુત્તા ખન્ધા પચ્છિમાનં પચ્છિમાનં ઉપાદાનવિપ્પયુત્તાનં ખન્ધાનં અનન્તરપચ્ચયેન પચ્ચયો; દિટ્ઠિગતવિપ્પયુત્તો લોભો વુટ્ઠાનસ્સ અનન્તરપચ્ચયેન પચ્ચયો; અનુલોમં ગોત્રભુસ્સ…પે… ફલસમાપત્તિયા અનન્તરપચ્ચયેન પચ્ચયો. (મૂલં કાતબ્બં) પુરિમો પુરિમો દિટ્ઠિગતવિપ્પયુત્તો લોભો પચ્છિમાનં પચ્છિમાનં દિટ્ઠિગતવિપ્પયુત્તલોભસહગતાનં ખન્ધાનં અનન્તરપચ્ચયેન પચ્ચયો. આવજ્જના ઉપાદાનસમ્પયુત્તકાનં ખન્ધાનં અનન્તરપચ્ચયેન પચ્ચયો. (મૂલં કાતબ્બં) પુરિમો પુરિમો દિટ્ઠિગતવિપ્પયુત્તો લોભો પચ્છિમાનં પચ્છિમાનં દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ અનન્તરપચ્ચયેન પચ્ચયો; આવજ્જના દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ અનન્તરપચ્ચયેન પચ્ચયો. (૩)

૭૪. ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનસમ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા દિટ્ઠિગતવિપ્પયુત્તલોભસહગતા ખન્ધા ચ લોભો ચ પચ્છિમાનં પચ્છિમાનં દિટ્ઠિગતવિપ્પયુત્તલોભસહગતાનં ખન્ધાનં અનન્તરપચ્ચયેન પચ્ચયો. (મૂલં કાતબ્બં) પુરિમા પુરિમા દિટ્ઠિગતવિપ્પયુત્તલોભસહગતા ખન્ધા ચ લોભો ચ પચ્છિમસ્સ પચ્છિમસ્સ દિટ્ઠિગતવિપ્પયુત્તસ્સ લોભસ્સ અનન્તરપચ્ચયેન પચ્ચયો; દિટ્ઠિગતવિપ્પયુત્તલોભસહગતા ખન્ધા ચ લોભો ચ વુટ્ઠાનસ્સ અનન્તરપચ્ચયેન પચ્ચયો. (મૂલં કાતબ્બં) પુરિમા પુરિમા દિટ્ઠિગતવિપ્પયુત્તલોભસહગતા ખન્ધા ચ લોભો ચ પચ્છિમાનં પચ્છિમાનં દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ અનન્તરપચ્ચયેન પચ્ચયો. (૩)

સમનન્તરપચ્ચયાદિ

૭૫. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ સમનન્તરપચ્ચયેન પચ્ચયો… સહજાતપચ્ચયેન પચ્ચયો… (પટિચ્ચસદિસં) નવ… અઞ્ઞમઞ્ઞપચ્ચયેન પચ્ચયો… (પટિચ્ચસદિસં) છ… નિસ્સયપચ્ચયેન પચ્ચયો… (પચ્ચયવારસદિસં) નવ.

ઉપનિસ્સયપચ્ચયો

૭૬. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – ઉપાદાનસમ્પયુત્તા ખન્ધા ઉપાદાનસમ્પયુત્તકાનં ખન્ધાનં ઉપનિસ્સયપચ્ચયેન પચ્ચયો. (મૂલં કાતબ્બં) ઉપાદાનસમ્પયુત્તા ખન્ધા ઉપાદાનવિપ્પયુત્તકાનં ખન્ધાનં લોભસ્સ ચ ઉપનિસ્સયપચ્ચયેન પચ્ચયો. (મૂલં કાતબ્બં) ઉપાદાનસમ્પયુત્તા ખન્ધા દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ ઉપનિસ્સયપચ્ચયેન પચ્ચયો. (૩)

૭૭. ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ…પે… સમાપત્તિં ઉપ્પાદેતિ, માનં જપ્પેતિ, સીલં…પે… પઞ્ઞં… ઉપાદાનવિપ્પયુત્તં રાગં… માનં… પત્થનં…પે… સેનાસનં ઉપનિસ્સાય દાનં દેતિ…પે… સઙ્ઘં ભિન્દતિ; સદ્ધા…પે… સેનાસનં સદ્ધાય…પે… પઞ્ઞાય ઉપાદાનવિપ્પયુત્તસ્સ રાગસ્સ… માનસ્સ… પત્થનાય… કાયિકસ્સ સુખસ્સ…પે… ફલસમાપત્તિયા ઉપનિસ્સયપચ્ચયેન પચ્ચયો. (૧)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – (તીણિ ઉપનિસ્સયા) સદ્ધં ઉપનિસ્સાય માનં જપ્પેતિ, દિટ્ઠિં ગણ્હાતિ, સીલં…પે… પઞ્ઞં… ઉપાદાનવિપ્પયુત્તં રાગં… માનં… પત્થનં… સેનાસનં ઉપનિસ્સાય અદિન્નં…પે… મુસા…પે… પિસુણં…પે… સમ્ફં…પે… સન્ધિં…પે… નિલ્લોપં…પે… એકાગારિકં…પે… પરિપન્થે…પે… પરદારં…પે… ગામઘાતં…પે… નિગમઘાતં કરોતિ. સદ્ધા…પે… સેનાસનં ઉપાદાનસમ્પયુત્તસ્સ રાગસ્સ… મોહસ્સ… માનસ્સ… દિટ્ઠિયા… પત્થનાય ઉપનિસ્સયપચ્ચયેન પચ્ચયો. (૨)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય માનં જપ્પેતિ, સીલં…પે… પઞ્ઞં… ઉપાદાનવિપ્પયુત્તં રાગં…પે… સેનાસનં ઉપનિસ્સાય અદિન્નં આદિયતિ…પે… ગામઘાતં કરોતિ… નિગમઘાતં કરોતિ…. સદ્ધા…પે… સેનાસનં દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ ઉપનિસ્સયપચ્ચયેન પચ્ચયો. (૩)

૭૮. ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનસમ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપાદાનસમ્પયુત્તકાનં ખન્ધાનં ઉપનિસ્સયપચ્ચયેન પચ્ચયો. (મૂલં કાતબ્બં) દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપાદાનવિપ્પયુત્તકાનં ખન્ધાનં લોભસ્સ ચ ઉપનિસ્સયપચ્ચયેન પચ્ચયો. (મૂલં કાતબ્બં) દિટ્ઠિગતવિપ્પયુત્તલોભસહગતા ખન્ધા ચ લોભો ચ દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ ઉપનિસ્સયપચ્ચયેન પચ્ચયો. (૩)

પુરેજાતપચ્ચયો

૭૯. ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં…પે…. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં…પે… વત્થુ ઉપાદાનવિપ્પયુત્તકાનં ખન્ધાનં લોભસ્સ ચ પુરેજાતપચ્ચયેન પચ્ચયો. (૧)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ. વત્થુપુરેજાતં – વત્થુ ઉપાદાનસમ્પયુત્તકાનં ખન્ધાનં પુરેજાતપચ્ચયેન પચ્ચયો. (૨)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું આરબ્ભ દિટ્ઠિગતવિપ્પયુત્તલોભસહગતા ખન્ધા ચ લોભો ચ ઉપ્પજ્જન્તિ. વત્થુપુરેજાતં – વત્થુ દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ પુરેજાતપચ્ચયેન પચ્ચયો. (૩)

પચ્છાજાતાસેવનપચ્ચયા

૮૦. ઉપાદાનસમ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). (૧)

ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). (૧)

ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનવિપ્પયુત્તસ્સ ધમ્મસ્સ પચ્છાજાતપચ્ચયેન પચ્ચયો. (સંખિત્તં.) (૧) …આસેવનપચ્ચયેન પચ્ચયો.

કમ્મ-વિપાકપચ્ચયા

૮૧. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ કમ્મપચ્ચયેન પચ્ચયો – ઉપાદાનસમ્પયુત્તા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

ઉપાદાનસમ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – ઉપાદાનસમ્પયુત્તા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો; દિટ્ઠિગતવિપ્પયુત્તલોભસહગતા ચેતના લોભસ્સ ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. નાનાક્ખણિકા – ઉપાદાનસમ્પયુત્તા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૨)

ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ કમ્મપચ્ચયેન પચ્ચયો – ઉપાદાનસમ્પયુત્તા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; દિટ્ઠિગતવિપ્પયુત્તલોભસહગતા ચેતના સમ્પયુત્તકાનં ખન્ધાનં લોભસ્સ ચ ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

૮૨. ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – ઉપાદાનવિપ્પયુત્તા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – ઉપાદાનવિપ્પયુત્તા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ વિપાકપચ્ચયેન પચ્ચયો – વિપાકો ઉપાદાનવિપ્પયુત્તો એકો…પે… એકં.

આહારપચ્ચયાદિ

૮૩. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ આહારપચ્ચયેન પચ્ચયો… ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો… મગ્ગપચ્ચયેન પચ્ચયો (ઇમેસુ ચતૂસુપિ યથા કમ્મપચ્ચયે દિટ્ઠિગતવિપ્પયુત્તો લોભો દસ્સિતો એવં દસ્સેતબ્બો. ચત્તારિ ચત્તારિ પઞ્હા)… સમ્પયુત્તપચ્ચયેન પચ્ચયો… છ.

વિપ્પયુત્તપચ્ચયો

૮૪. ઉપાદાનસમ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં (સંખિત્તં). (૧)

ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં (સંખિત્તં). (૧)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ ઉપાદાનસમ્પયુત્તકાનં ખન્ધાનં વિપ્પયુત્તપચ્ચયેન પચ્ચયો. (૨)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ દિટ્ઠિગતવિપ્પયુત્તલોભસહગતાનં ખન્ધાનં લોભસ્સ ચ વિપ્પયુત્તપચ્ચયેન પચ્ચયો. (૩)

ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનવિપ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – દિટ્ઠિગતવિપ્પયુત્તલોભસહગતા ખન્ધા ચ લોભો ચ ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા…પે….

અત્થિપચ્ચયાદિ

૮૫. ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ અત્થિપચ્ચયેન પચ્ચયો… એકં (પટિચ્ચસદિસં). (૧)

ઉપાદાનસમ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં (સંખિત્તં). (૨)

ઉપાદાનસમ્પયુત્તો ધમ્મો ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ અત્થિપચ્ચયેન પચ્ચયો (પટિચ્ચસદિસં). (૩)

૮૬. ઉપાદાનવિપ્પયુત્તો ધમ્મો ઉપાદાનવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). (૧)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં (સંખિત્તં). (૨)

ઉપાદાનવિપ્પયુત્તો ધમ્મો ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં (ઇમેસુ સહજાતં સહજાતસદિસં, પુરેજાતં પુરેજાતસદિસં). (૩)

૮૭. ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનસમ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – ઉપાદાનસમ્પયુત્તો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે…. સહજાતો – દિટ્ઠિગતવિપ્પયુત્તલોભસહગતો એકો ખન્ધો ચ લોભો ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે…. (૧)

ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતા – ઉપાદાનસમ્પયુત્તા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. સહજાતા – દિટ્ઠિગતવિપ્પયુત્તલોભસહગતા ખન્ધા ચ લોભો ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. સહજાતા – દિટ્ઠિગતવિપ્પયુત્તલોભસહગતા ખન્ધા ચ વત્થુ ચ લોભસ્સ અત્થિપચ્ચયેન પચ્ચયો. પચ્છાજાતા – દિટ્ઠિગતવિપ્પયુત્તલોભસહગતા ખન્ધા ચ લોભો ચ પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – દિટ્ઠિગતવિપ્પયુત્તલોભસહગતા ખન્ધા ચ લોભો ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – દિટ્ઠિગતવિપ્પયુત્તલોભસહગતા ખન્ધા ચ લોભો ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

ઉપાદાનસમ્પયુત્તો ચ ઉપાદાનવિપ્પયુત્તો ચ ધમ્મા ઉપાદાનસમ્પયુત્તસ્સ ચ ઉપાદાનવિપ્પયુત્તસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – દિટ્ઠિગતવિપ્પયુત્તલોભસહગતો એકો ખન્ધો ચ લોભો ચ તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા ચ…પે…. સહજાતો – દિટ્ઠિગતવિપ્પયુત્તલોભસહગતો એકો ખન્ધો ચ વત્થુ ચ તિણ્ણન્નં ખન્ધાનં લોભસ્સ ચ અત્થિપચ્ચયેન પચ્ચયો…પે… દ્વે ખન્ધા ચ…પે…. (૩)

નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો.