૧. વિભઙ્ગવારો

હેતુપચ્ચયો

૧૭. ઉપાદાનો ધમ્મો ઉપાદાનસ્સ ધમ્મસ્સ હેતુપચ્ચયેન પચ્ચયો – ઉપાદાના હેતૂ સમ્પયુત્તકાનં ઉપાદાનાનં હેતુપચ્ચયેન પચ્ચયો. (મૂલં કાતબ્બં) ઉપાદાના હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (મૂલં કાતબ્બં) ઉપાદાના હેતૂ સમ્પયુત્તકાનં ખન્ધાનં ઉપાદાનાનઞ્ચ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૩)

૧૮. નોઉપાદાનો ધમ્મો નોઉપાદાનસ્સ ધમ્મસ્સ હેતુપચ્ચયેન પચ્ચયો – નોઉપાદાના હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

નોઉપાદાનો ધમ્મો ઉપાદાનસ્સ ધમ્મસ્સ હેતુપચ્ચયેન પચ્ચયો – નોઉપાદાના હેતૂ સમ્પયુત્તકાનં ઉપાદાનાનં હેતુપચ્ચયેન પચ્ચયો. (મૂલં કાતબ્બં) નોઉપાદાના હેતૂ સમ્પયુત્તકાનં ખન્ધાનં ઉપાદાનાનઞ્ચ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૩)

૧૯. ઉપાદાનો ચ નોઉપાદાનો ચ ધમ્મા ઉપાદાનસ્સ ધમ્મસ્સ હેતુપચ્ચયેન પચ્ચયો – ઉપાદાના ચ નોઉપાદાના ચ હેતૂ સમ્પયુત્તકાનં ઉપાદાનાનં હેતુપચ્ચયેન પચ્ચયો. (મૂલં કાતબ્બં) ઉપાદાના ચ નોઉપાદાના ચ હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (મૂલં કાતબ્બં) ઉપાદાના ચ નોઉપાદાના ચ હેતૂ સમ્પયુત્તકાનં ખન્ધાનં ઉપાદાનાનઞ્ચ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૩)

આરમ્મણપચ્ચયો

૨૦. ઉપાદાનો ધમ્મો ઉપાદાનસ્સ ધમ્મસ્સ આરમ્મણપચ્ચયેન પચ્ચયો – ઉપાદાને આરબ્ભ ઉપાદાના ઉપ્પજ્જન્તિ… તીણિ (આરબ્ભ કાતબ્બા).

નોઉપાદાનો ધમ્મો નોઉપાદાનસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં…પે… ઉપોસથકમ્મં કત્વા તં પચ્ચવેક્ખતિ અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ; વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ; પુબ્બે સુચિણ્ણાનિ…પે… ઝાના વુટ્ઠહિત્વા ઝાનં પચ્ચવેક્ખતિ, અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં…પે… નિબ્બાનં પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો. અરિયા નોઉપાદાને પહીને કિલેસે …પે… વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે…પે… ચક્ખું…પે… વત્થું નોઉપાદાને ખન્ધે અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. ચેતોપરિયઞાણેન નોઉપાદાનચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… નોઉપાદાના ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

નોઉપાદાનો ધમ્મો ઉપાદાનસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા તં અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ; પુબ્બે સુચિણ્ણાનિ…પે… ઝાના…પે… ચક્ખું…પે… વત્થું નોઉપાદાને ખન્ધે અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ. (૨)

નોઉપાદાનો ધમ્મો ઉપાદાનસ્સ ચ નોઉપાદાનસ્સ ચ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા…પે… પુબ્બે સુચિણ્ણાનિ …પે… ઝાના વુટ્ઠહિત્વા ઝાનં…પે… ચક્ખું…પે… વત્થું નોઉપાદાને ખન્ધે અસ્સાદેતિ અભિનન્દતિ, તં આરબ્ભ ઉપાદાના ચ સમ્પયુત્તકા ચ ખન્ધા ઉપ્પજ્જન્તિ. (૩)

ઉપાદાનો ચ નોઉપાદાનો ચ ધમ્મા ઉપાદાનસ્સ ધમ્મસ્સ આરમ્મણપચ્ચયેન પચ્ચયો… તીણિ (આરબ્ભ કાતબ્બા).

અધિપતિપચ્ચયો

૨૧. ઉપાદાનો ધમ્મો ઉપાદાનસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – ઉપાદાને ગરું કત્વા ઉપાદાના ઉપ્પજ્જન્તિ… તીણિ (આરમ્મણાધિપતિયેવ).

૨૨. નોઉપાદાનો ધમ્મો નોઉપાદાનસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં…પે… ઉપોસથકમ્મં…પે… પુબ્બે…પે… ઝાના વુટ્ઠહિત્વા ઝાનં ગરું કત્વા પચ્ચવેક્ખતિ, અસ્સાદેતિ અભિનન્દતિ, અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ…પે… ફલસ્સ અધિપતિપચ્ચયેન પચ્ચયો; ચક્ખું…પે… વત્થું નોઉપાદાને ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – નોઉપાદાનાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

નોઉપાદાનો ધમ્મો ઉપાદાનસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા તં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ; પુબ્બે…પે… ઝાના…પે… ચક્ખું…પે… વત્થું નોઉપાદાને ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – નોઉપાદાનાધિપતિ સમ્પયુત્તકાનં ઉપાદાનાનં અધિપતિપચ્ચયેન પચ્ચયો. (૨)

નોઉપાદાનો ધમ્મો ઉપાદાનસ્સ ચ નોઉપાદાનસ્સ ચ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં…પે… પુબ્બે…પે… ઝાનં…પે… ચક્ખું…પે… વત્થું નોઉપાદાને ખન્ધે ગરું કત્વા અસ્સાદેતિ અભિનન્દતિ, તં ગરું કત્વા ઉપાદાના ચ સમ્પયુત્તકા ચ ખન્ધા ઉપ્પજ્જન્તિ. સહજાતાધિપતિ – નોઉપાદાનાધિપતિ સમ્પયુત્તકાનં ખન્ધાનં ઉપાદાનાનઞ્ચ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૩)

ઉપાદાનો ચ નોઉપાદાનો ચ ધમ્મા ઉપાદાનસ્સ ધમ્મસ્સ અધિપતિપચ્ચયેન પચ્ચયો… તીણિ… આરમ્મણાધિપતિ… તીણિ (આરબ્ભ કાતબ્બા, આરમ્મણાધિપતિયેવ).

અનન્તરપચ્ચયાદિ

૨૩. ઉપાદાનો ધમ્મો ઉપાદાનસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપાદાના પચ્છિમાનં પચ્છિમાનં ઉપાદાનાનં અનન્તરપચ્ચયેન પચ્ચયો. (મૂલં કાતબ્બં) પુરિમા પુરિમા ઉપાદાના પચ્છિમાનં પચ્છિમાનં નોઉપાદાનાનં ખન્ધાનં અનન્તરપચ્ચયેન પચ્ચયો; ઉપાદાનં વુટ્ઠાનસ્સ અનન્તરપચ્ચયેન પચ્ચયો. (મૂલં કાતબ્બં) પુરિમા પુરિમા ઉપાદાના પચ્છિમાનં પચ્છિમાનં ઉપાદાનાનં સમ્પયુત્તકાનઞ્ચ ખન્ધાનં અનન્તરપચ્ચયેન પચ્ચયો. (૩)

૨૪. નોઉપાદાનો ધમ્મો નોઉપાદાનસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા નોઉપાદાના ખન્ધા પચ્છિમાનં પચ્છિમાનં નોઉપાદાનાનં ખન્ધાનં અનન્તરપચ્ચયેન પચ્ચયો; અનુલોમં ગોત્રભુસ્સ…પે… ફલસમાપત્તિયા અનન્તરપચ્ચયેન પચ્ચયો. (૧)

નોઉપાદાનો ધમ્મો ઉપાદાનસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા નોઉપાદાના ખન્ધા પચ્છિમાનં પચ્છિમાનં ઉપાદાનાનં ખન્ધાનં અનન્તરપચ્ચયેન પચ્ચયો; આવજ્જના ઉપાદાનાનં અનન્તરપચ્ચયેન પચ્ચયો. (૨)

નોઉપાદાનો ધમ્મો ઉપાદાનસ્સ ચ નોઉપાદાનસ્સ ચ ધમ્મસ્સ અનન્તરપચ્ચયેન પચ્ચયો – પુરિમા પુરિમા નોઉપાદાના ખન્ધા પચ્છિમાનં પચ્છિમાનં ઉપાદાનાનં સમ્પયુત્તકાનઞ્ચ ખન્ધાનં અનન્તરપચ્ચયેન પચ્ચયો; આવજ્જના ઉપાદાનાનં સમ્પયુત્તકાનઞ્ચ ખન્ધાનં અનન્તરપચ્ચયેન પચ્ચયો. (૩)

૨૫. ઉપાદાનો ચ નોઉપાદાનો ચ ધમ્મા ઉપાદાનસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપાદાના ચ સમ્પયુત્તકા ચ ખન્ધા પચ્છિમાનં પચ્છિમાનં ઉપાદાનાનં અનન્તરપચ્ચયેન પચ્ચયો. (મૂલં કાતબ્બં) પુરિમા પુરિમા ઉપાદાના ચ સમ્પયુત્તકા ચ ખન્ધા પચ્છિમાનં પચ્છિમાનં નોઉપાદાનાનં ખન્ધાનં અનન્તરપચ્ચયેન પચ્ચયો; ઉપાદાના ચ સમ્પયુત્તકા ચ ખન્ધા વુટ્ઠાનસ્સ અનન્તરપચ્ચયેન પચ્ચયો. (મૂલં કાતબ્બં) પુરિમા પુરિમા ઉપાદાના ચ સમ્પયુત્તકા ચ ખન્ધા પચ્છિમાનં પચ્છિમાનં ઉપાદાનાનં સમ્પયુત્તકાનઞ્ચ ખન્ધાનં અનન્તરપચ્ચયેન પચ્ચયો. (૩)

સમનન્તરપચ્ચયેન પચ્ચયો… સહજાતપચ્ચયેન પચ્ચયો (પટિચ્ચસદિસં)… અઞ્ઞમઞ્ઞપચ્ચયેન પચ્ચયો (પટિચ્ચસદિસં)… નિસ્સયપચ્ચયેન પચ્ચયો (પચ્ચયસદિસં).

ઉપનિસ્સયપચ્ચયો

૨૬. ઉપાદાનો ધમ્મો ઉપાદાનસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો …પે…. પકતૂપનિસ્સયો – ઉપાદાના ઉપાદાનાનં ઉપનિસ્સયપચ્ચયેન પચ્ચયો… તીણિ.

૨૭. નોઉપાદાનો ધમ્મો નોઉપાદાનસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ; સીલં…પે… પઞ્ઞં… રાગં…પે… પત્થનં… કાયિકં સુખં…પે… સેનાસનં ઉપનિસ્સાય દાનં દેતિ…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ; પાણં હનતિ…પે… સઙ્ઘં ભિન્દતિ, સદ્ધા…પે… સેનાસનં સદ્ધાય…પે… ફલસમાપત્તિયા ઉપનિસ્સયપચ્ચયેન પચ્ચયો. (૧)

નોઉપાદાનો ધમ્મો ઉપાદાનસ્સ ધમ્મસ્સ ઉપનિસ્સયપચ્ચયેન પચ્ચયો. પકતૂપનિસ્સયો – સદ્ધં ઉપનિસ્સાય માનં જપ્પેતિ, દિટ્ઠિં ગણ્હાતિ; સીલં…પે… સેનાસનં ઉપનિસ્સાય અદિન્નં…પે… મુસા…પે… પિસુણં…પે… સમ્ફં…પે… સન્ધિં…પે… નિલ્લોપં…પે… એકાગારિકં…પે… પરિપન્થે…પે… પરદારં…પે… ગામઘાતં…પે… નિગમઘાતં કરોતિ; સદ્ધા…પે… સેનાસનં ઉપાદાનાનં ઉપનિસ્સયપચ્ચયેન પચ્ચયો. (મૂલં કાતબ્બં) સદ્ધં ઉપનિસ્સાય માનં જપ્પેતિ, દિટ્ઠિં ગણ્હાતિ; સીલં…પે… સેનાસનં ઉપનિસ્સાય અદિન્નં આદિયતિ, મુસા…પે… પિસુણં…પે… સમ્ફં…પે… સન્ધિં…પે… નિલ્લોપં…પે… એકાગારિકં…પે… પરિપન્થે…પે… પરદારં…પે… ગામઘાતં…પે… નિગમઘાતં કરોતિ; સદ્ધા…પે… સેનાસનં ઉપાદાનાનં સમ્પયુત્તકાનઞ્ચ ખન્ધાનં ઉપનિસ્સયપચ્ચયેન પચ્ચયો. (૩)

ઉપાદાનો ચ નોઉપાદાનો ચ ધમ્મા ઉપાદાનસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો… તીણિ.

પુરેજાતપચ્ચયો

૨૮. નોઉપાદાનો ધમ્મો નોઉપાદાનસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે…. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ નોઉપાદાનાનં ખન્ધાનં પુરેજાતપચ્ચયેન પચ્ચયો. (૧)

નોઉપાદાનો ધમ્મો ઉપાદાનસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ. વત્થુપુરેજાતં – વત્થુ ઉપાદાનાનં પુરેજાતપચ્ચયેન પચ્ચયો. (૨)

નોઉપાદાનો ધમ્મો ઉપાદાનસ્સ ચ નોઉપાદાનસ્સ ચ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ ઉપાદાના ચ સમ્પયુત્તકા ચ ખન્ધા ઉપ્પજ્જન્તિ. વત્થુપુરેજાતં – વત્થુ ઉપાદાનાનં સમ્પયુત્તકાનઞ્ચ ખન્ધાનં પુરેજાતપચ્ચયેન પચ્ચયો. (૩)

પચ્છાજાતાસેવનપચ્ચયા

૨૯. ઉપાદાનો ધમ્મો નોઉપાદાનસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). (૧)

નોઉપાદાનો ધમ્મો નોઉપાદાનસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). (૧)

ઉપાદાનો ચ નોઉપાદાનો ચ ધમ્મા નોઉપાદાનસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). (૧) …આસેવનપચ્ચયેન પચ્ચયો.

કમ્મપચ્ચયો

૩૦. નોઉપાદાનો ધમ્મો નોઉપાદાનસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – નોઉપાદાના ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – નોઉપાદાના ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

નોઉપાદાનો ધમ્મો ઉપાદાનસ્સ ધમ્મસ્સ કમ્મપચ્ચયેન પચ્ચયો – નોઉપાદાના ચેતના સમ્પયુત્તકાનં ઉપાદાનાનં કમ્મપચ્ચયેન પચ્ચયો. (૨)

નોઉપાદાનો ધમ્મો ઉપાદાનસ્સ ચ નોઉપાદાનસ્સ ચ ધમ્મસ્સ કમ્મપચ્ચયેન પચ્ચયો – નોઉપાદાના ચેતના સમ્પયુત્તકાનં ખન્ધાનં ઉપાદાનાનઞ્ચ ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. (૩)

વિપાકપચ્ચયાદિ

૩૧. નોઉપાદાનો ધમ્મો નોઉપાદાનસ્સ ધમ્મસ્સ વિપાકપચ્ચયેન પચ્ચયો – વિપાકો નોઉપાદાનો એકો ખન્ધો…પે… એકં.

નોઉપાદાનો ધમ્મો નોઉપાદાનસ્સ ધમ્મસ્સ આહારપચ્ચયેન પચ્ચયો… તીણિ (એકોયેવ કબળીકારો આહારો)… ઇન્દ્રિયપચ્ચયેન પચ્ચયો… તીણિ (રૂપજીવિતિન્દ્રિયં એકંયેવ)… ઝાનપચ્ચયેન પચ્ચયો… તીણિ.

ઉપાદાનો ધમ્મો ઉપાદાનસ્સ ધમ્મસ્સ મગ્ગપચ્ચયેન પચ્ચયો – ઉપાદાનાનિ મગ્ગઙ્ગાનિ સમ્પયુત્તકાનં ઉપાદાનાનં મગ્ગપચ્ચયેન પચ્ચયો (ઇમિના કારણેન નવ પઞ્હા કાતબ્બા)… સમ્પયુત્તપચ્ચયેન પચ્ચયો… નવ.

વિપ્પયુત્તપચ્ચયો

૩૨. ઉપાદાનો ધમ્મો નોઉપાદાનસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – ઉપાદાના ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતં – પચ્છાજાતા ઉપાદાના પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

નોઉપાદાનો ધમ્મો નોઉપાદાનસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં (સંખિત્તં). (૧)

નોઉપાદાનો ધમ્મો ઉપાદાનસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ ઉપાદાનાનં વિપ્પયુત્તપચ્ચયેન પચ્ચયો. (૨)

નોઉપાદાનો ધમ્મો ઉપાદાનસ્સ ચ નોઉપાદાનસ્સ ચ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ ઉપાદાનાનં સમ્પયુત્તકાનઞ્ચ ખન્ધાનં વિપ્પયુત્તપચ્ચયેન પચ્ચયો. (૩)

૩૩. ઉપાદાનો ચ નોઉપાદાનો ચ ધમ્મા નોઉપાદાનસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – ઉપાદાના ચ સમ્પયુત્તકા ચ ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – ઉપાદાના ચ સમ્પયુત્તકા ચ ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અત્થિપચ્ચયો

૩૪. ઉપાદાનો ધમ્મો ઉપાદાનસ્સ ધમ્મસ્સ અત્થિપચ્ચયેન પચ્ચયો – દિટ્ઠુપાદાનં કામુપાદાનસ્સ અત્થિપચ્ચયેન પચ્ચયો (ચક્કં). (૧)

ઉપાદાનો ધમ્મો નોઉપાદાનસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં. સહજાતા – ઉપાદાના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો. પચ્છાજાતા – ઉપાદાના પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. (૨)

ઉપાદાનો ધમ્મો ઉપાદાનસ્સ ચ નોઉપાદાનસ્સ ચ ધમ્મસ્સ અત્થિપચ્ચયેન પચ્ચયો (સંખિત્તં, પટિચ્ચસદિસં). (૩)

૩૫. નોઉપાદાનો ધમ્મો નોઉપાદાનસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં, વિત્થારેતબ્બં). (૧)

નોઉપાદાનો ધમ્મો ઉપાદાનસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતં (સહજાતસદિસં). પુરેજાતં (પુરેજાતસદિસં). (૨)

નોઉપાદાનો ધમ્મો ઉપાદાનસ્સ ચ નોઉપાદાનસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં (સંખિત્તં, સહજાતસદિસં સહજાતં વિભજિતબ્બં, પુરેજાતસદિસં પુરેજાતં). (૩)

૩૬. ઉપાદાનો ચ નોઉપાદાનો ચ ધમ્મા ઉપાદાનસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતં – દિટ્ઠુપાદાનઞ્ચ સમ્પયુત્તકા ચ ખન્ધા કામુપાદાનસ્સ અત્થિપચ્ચયેન પચ્ચયો (ચક્કં). સહજાતં – દિટ્ઠુપાદાનઞ્ચ વત્થુ ચ કામુપાદાનસ્સ અત્થિપચ્ચયેન પચ્ચયો (ચક્કં). (૧)

ઉપાદાનો ચ નોઉપાદાનો ચ ધમ્મા નોઉપાદાનસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતો – નોઉપાદાનો એકો ખન્ધો ચ ઉપાદાના ચ તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા ચ…પે…. સહજાતા – ઉપાદાના ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. સહજાતા – ઉપાદાના ચ વત્થુ ચ નોઉપાદાનાનં ખન્ધાનં અત્થિપચ્ચયેન પચ્ચયો. પચ્છાજાતા – ઉપાદાના ચ સમ્પયુત્તકા ચ ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – ઉપાદાના ચ સમ્પયુત્તકા ચ ખન્ધા કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – ઉપાદાના ચ સમ્પયુત્તકા ચ ખન્ધા રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

ઉપાદાનો ચ નોઉપાદાનો ચ ધમ્મા ઉપાદાનસ્સ ચ નોઉપાદાનસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – નોઉપાદાનો એકો ખન્ધો ચ દિટ્ઠુપાદાનઞ્ચ તિણ્ણન્નં ખન્ધાનં કામુપાદાનસ્સ ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો…પે… દ્વે ખન્ધા ચ…પે… (ચક્કં). સહજાતં – દિટ્ઠુપાદાનઞ્ચ વત્થુ ચ કામુપાદાનસ્સ સમ્પયુત્તકાનઞ્ચ ખન્ધાનં અત્થિપચ્ચયેન પચ્ચયો (ચક્કં). (૩)