૧-૪. પચ્ચયાનુલોમાદિ

હેતુપચ્ચયો

૧૨. ઉપાદાનં ધમ્મં પચ્ચયા ઉપાદાનો ધમ્મો ઉપ્પજ્જતિ હેતુપચ્ચયા – દિટ્ઠુપાદાનં પચ્ચયા કામુપાદાનં… તીણિ (પટિચ્ચસદિસા).

નોઉપાદાનં ધમ્મં પચ્ચયા નોઉપાદાનો ધમ્મો ઉપ્પજ્જતિ હેતુપચ્ચયા – નોઉપાદાનં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… ખન્ધે પચ્ચયા વત્થુ…પે… (યાવ અજ્ઝત્તિકા મહાભૂતા) વત્થું પચ્ચયા નોઉપાદાના ખન્ધા. (૧)

નોઉપાદાનં ધમ્મં પચ્ચયા ઉપાદાનો ધમ્મો ઉપ્પજ્જતિ હેતુપચ્ચયા – નોઉપાદાને ખન્ધે પચ્ચયા ઉપાદાના, વત્થું પચ્ચયા ઉપાદાના. (૨)

નોઉપાદાનં ધમ્મં પચ્ચયા ઉપાદાનો ચ નોઉપાદાનો ચ ધમ્મા ઉપ્પજ્જન્તિ હેતુપચ્ચયા – નોઉપાદાનં એકં ખન્ધં પચ્ચયા તયો ખન્ધા ઉપાદાના ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે… વત્થું પચ્ચયા ઉપાદાના, મહાભૂતે પચ્ચયા ચિત્તસમુટ્ઠાનં રૂપં, વત્થું પચ્ચયા ઉપાદાના સમ્પયુત્તકા ચ ખન્ધા. (૩)

૧૩. ઉપાદાનઞ્ચ નોઉપાદાનઞ્ચ ધમ્મં પચ્ચયા ઉપાદાનો ધમ્મો ઉપ્પજ્જતિ હેતુપચ્ચયા – દિટ્ઠુપાદાનઞ્ચ સમ્પયુત્તકે ચ ખન્ધે પચ્ચયા કામુપાદાનં, કામુપાદાનઞ્ચ સમ્પયુત્તકે ચ ખન્ધે પચ્ચયા દિટ્ઠુપાદાનં (ચક્કં કાતબ્બં). દિટ્ઠુપાદાનઞ્ચ વત્થુઞ્ચ પચ્ચયા કામુપાદાનં (ચક્કં કાતબ્બં). (૧)

ઉપાદાનઞ્ચ નોઉપાદાનઞ્ચ ધમ્મં પચ્ચયા નોઉપાદાનો ધમ્મો ઉપ્પજ્જતિ હેતુપચ્ચયા – નોઉપાદાનં એકં ખન્ધઞ્ચ ઉપાદાનઞ્ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે… (ચક્કં કાતબ્બં). ઉપાદાને ચ મહાભૂતે ચ પચ્ચયા ચિત્તસમુટ્ઠાનં રૂપં, ઉપાદાનઞ્ચ વત્થુઞ્ચ પચ્ચયા નોઉપાદાના ખન્ધા. (૨)

ઉપાદાનઞ્ચ નોઉપાદાનઞ્ચ ધમ્મં પચ્ચયા ઉપાદાનો ચ નોઉપાદાનો ચ ધમ્મા ઉપ્પજ્જન્તિ હેતુપચ્ચયા – નોઉપાદાનં એકં ખન્ધઞ્ચ દિટ્ઠુપાદાનઞ્ચ પચ્ચયા તયો ખન્ધા કામુપાદાનં ચિત્તસમુટ્ઠાનઞ્ચ રૂપં…પે… (ચક્કં). દિટ્ઠુપાદાનઞ્ચ વત્થુઞ્ચ પચ્ચયા કામુપાદાનં સમ્પયુત્તકા ચ ખન્ધા…પે… (ચક્કં). (૩)

આરમ્મણપચ્ચયા… (આરમ્મણે નોઉપાદાનમૂલકે પઞ્ચાયતનઞ્ચ વત્થુઞ્ચ કાતબ્બા).

હેતુયા નવ, આરમ્મણે નવ, અધિપતિયા નવ (સબ્બત્થ નવ), વિપાકે એકં…પે… અવિગતે નવ.

અનુલોમં.

૧૪. નોઉપાદાનં ધમ્મં પચ્ચયા નોઉપાદાનો ધમ્મો ઉપ્પજ્જતિ નહેતુપચ્ચયા – અહેતુકં નોઉપાદાનં એકં ખન્ધં પચ્ચયા…પે… અહેતુકપટિસન્ધિક્ખણે…પે… (યાવ અસઞ્ઞસત્તા) ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા અહેતુકા નોઉપાદાના ખન્ધા, વિચિકિચ્છાસહગતે ઉદ્ધચ્ચસહગતે ખન્ધે ચ વત્થુઞ્ચ પચ્ચયા વિચિકિચ્છાસહગતો ઉદ્ધચ્ચસહગતો મોહો.

નહેતુયા એકં, નઆરમ્મણે તીણિ, નઅધિપતિયા નવ, નઅનન્તરે તીણિ, નસમનન્તરે તીણિ…પે… નપુરેજાતે નવ…પે… નકમ્મે તીણિ, નવિપાકે નવ (પટિચ્ચસદિસં)…પે… નોવિગતે તીણિ.

પચ્ચનીયં.