૧. વિભઙ્ગવારો

હેતુપચ્ચયો

૧. દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ હેતુપચ્ચયા – દસ્સનેન પહાતબ્બહેતુકં એકં ખન્ધં પટિચ્ચ તયો ખન્ધા…પે… દ્વે ખન્ધા. (૧)

દસ્સનેન પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા – દસ્સનેન પહાતબ્બહેતુકે ખન્ધે પટિચ્ચ ચિત્તસમુટ્ઠાનં રૂપં. (૨)

દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ હેતુપચ્ચયા – દસ્સનેન પહાતબ્બહેતુકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધા…પે…. (૩)

૨. ભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા – ભાવનાય પહાતબ્બહેતુકં એકં ખન્ધં પટિચ્ચ તયો ખન્ધા…પે… દ્વે ખન્ધા. (૧)

ભાવનાય પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા – ભાવનાય પહાતબ્બહેતુકે ખન્ધે પટિચ્ચ ચિત્તસમુટ્ઠાનં રૂપં. (૨)

ભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ હેતુપચ્ચયા – ભાવનાય પહાતબ્બહેતુકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે…. (૩)

૩. નેવદસ્સનેન નભાવનાય પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા – નેવદસ્સનેન નભાવનાય પહાતબ્બહેતુકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં; વિચિકિચ્છાસહગતં ઉદ્ધચ્ચસહગતં મોહં પટિચ્ચ ચિત્તસમુટ્ઠાનં રૂપં. પટિસન્ધિક્ખણે નેવદસ્સનેન નભાવનાય પહાતબ્બહેતુકં એકં ખન્ધં પટિચ્ચ તયો ખન્ધા કટત્તા ચ રૂપં…પે… દ્વે ખન્ધા…પે… ખન્ધે પટિચ્ચ વત્થુ, વત્થું પટિચ્ચ ખન્ધા; એકં મહાભૂતં પટિચ્ચ…પે… મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં. (૧)

નેવદસ્સનેન નભાવનાય પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ હેતુપચ્ચયા – વિચિકિચ્છાસહગતં મોહં પટિચ્ચ સમ્પયુત્તકા ખન્ધા. (૨)

નેવદસ્સનેન નભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા – ઉદ્ધચ્ચસહગતં મોહં પટિચ્ચ સમ્પયુત્તકા ખન્ધા. (૩)

નેવદસ્સનેન નભાવનાય પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ હેતુપચ્ચયા – વિચિકિચ્છાસહગતં મોહં પટિચ્ચ સમ્પયુત્તકા ખન્ધા ચિત્તસમુટ્ઠાનઞ્ચ રૂપં. (૪)

નેવદસ્સનેન નભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ હેતુપચ્ચયા – ઉદ્ધચ્ચસહગતં મોહં પટિચ્ચ સમ્પયુત્તકા ખન્ધા ચિત્તસમુટ્ઠાનઞ્ચ રૂપં. (૫)

૪. દસ્સનેન પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ હેતુપચ્ચયા – વિચિકિચ્છાસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા…પે… દ્વે ખન્ધે ચ મોહઞ્ચ પટિચ્ચ દ્વે ખન્ધા. (૧)

દસ્સનેન પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા – દસ્સનેન પહાતબ્બહેતુકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં; વિચિકિચ્છાસહગતે ખન્ધે ચ મોહઞ્ચ પટિચ્ચ ચિત્તસમુટ્ઠાનં રૂપં. (૨)

દસ્સનેન પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ દસ્સનેન પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ હેતુપચ્ચયા – વિચિકિચ્છાસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે ચ મોહઞ્ચ પટિચ્ચ દ્વે ખન્ધા…પે…. (૩)

૫. ભાવનાય પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ ભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા – ઉદ્ધચ્ચસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા…પે… દ્વે ખન્ધે ચ મોહઞ્ચ પટિચ્ચ દ્વે ખન્ધા. (૧)

ભાવનાય પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ હેતુપચ્ચયા – ભાવનાય પહાતબ્બહેતુકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં; ઉદ્ધચ્ચસહગતે ખન્ધે ચ મોહઞ્ચ પટિચ્ચ ચિત્તસમુટ્ઠાનં રૂપં. (૨)

ભાવનાય પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ ભાવનાય પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ હેતુપચ્ચયા – ઉદ્ધચ્ચસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે…. (૩)

આરમ્મણપચ્ચયો

૬. દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ આરમ્મણપચ્ચયા – દસ્સનેન પહાતબ્બહેતુકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

દસ્સનેન પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ આરમ્મણપચ્ચયા – વિચિકિચ્છાસહગતે ખન્ધે પટિચ્ચ વિચિકિચ્છાસહગતો મોહો. (૨)

દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ આરમ્મણપચ્ચયા – વિચિકિચ્છાસહગતં એકં ખન્ધં પટિચ્ચ તયો ખન્ધા ચ મોહો ચ…પે… દ્વે ખન્ધે પટિચ્ચ દ્વે ખન્ધા ચ મોહો ચ. (૩)

ભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ધમ્મો ઉપ્પજ્જતિ આરમ્મણપચ્ચયા… તીણિ. (દસ્સનેન સદિસં વિભજિતબ્બં.)

૭. નેવદસ્સનેન નભાવનાય પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ આરમ્મણપચ્ચયા – નેવદસ્સનેન નભાવનાય પહાતબ્બહેતુકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. પટિસન્ધિક્ખણે…પે… વત્થું પટિચ્ચ ખન્ધા. (૧)

નેવદસ્સનેન નભાવનાય પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ આરમ્મણપચ્ચયા – વિચિકિચ્છાસહગતં મોહં પટિચ્ચ સમ્પયુત્તકા ખન્ધા. (૨)

નેવદસ્સનેન નભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ધમ્મો ઉપ્પજ્જતિ આરમ્મણપચ્ચયા – ઉદ્ધચ્ચસહગતં મોહં પટિચ્ચ સમ્પયુત્તકા ખન્ધા. (૩)

૮. દસ્સનેન પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ આરમ્મણપચ્ચયા – વિચિકિચ્છાસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા…પે… દ્વે ખન્ધે ચ મોહઞ્ચ પટિચ્ચ દ્વે ખન્ધા. (૧)

ભાવનાય પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ ભાવનાય પહાતબ્બહેતુકો ધમ્મો ઉપ્પજ્જતિ આરમ્મણપચ્ચયા – ઉદ્ધચ્ચસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા…પે… દ્વે ખન્ધે ચ મોહઞ્ચ પટિચ્ચ દ્વે ખન્ધા. (૧)

અધિપતિપચ્ચયો

૯. દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ અધિપતિપચ્ચયા… તીણિ (હેતુસદિસા).

ભાવનાય પહાતબ્બહેતુકં ધમ્મં પટિચ્ચ…પે… તીણિ (હેતુસદિસા, અધિપતિયા મોહો નત્થિ).

નેવદસ્સનેન નભાવનાય પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ અધિપતિપચ્ચયા – નેવદસ્સનેન નભાવનાય પહાતબ્બહેતુકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધા. એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ ચિત્તસમુટ્ઠાનં રૂપં ઉપાદારૂપં. (૧)

૧૦. દસ્સનેન પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ અધિપતિપચ્ચયા – દસ્સનેન પહાતબ્બહેતુકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

ભાવનાય પહાતબ્બહેતુકઞ્ચ નેવદસ્સનેન નભાવનાય પહાતબ્બહેતુકઞ્ચ ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ અધિપતિપચ્ચયા – ભાવનાય પહાતબ્બહેતુકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

અનન્તર-સમનન્તરપચ્ચયા

૧૧. દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ અનન્તરપચ્ચયા. સમનન્તરપચ્ચયા (આરમ્મણસદિસં).

સહજાતપચ્ચયો

૧૨. દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ સહજાતપચ્ચયા – દસ્સનેન પહાતબ્બહેતુકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

દસ્સનેન પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ સહજાતપચ્ચયા – દસ્સનેન પહાતબ્બહેતુકે ખન્ધે પટિચ્ચ ચિત્તસમુટ્ઠાનં રૂપં; વિચિકિચ્છાસહગતે ખન્ધે પટિચ્ચ મોહો ચિત્તસમુટ્ઠાનઞ્ચ રૂપં. (૨)

દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ સહજાતપચ્ચયા – દસ્સનેન પહાતબ્બહેતુકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં; વિચિકિચ્છાસહગતં એકં ખન્ધં પટિચ્ચ તયો ખન્ધા મોહો ચ ચિત્તસમુટ્ઠાનઞ્ચ રૂપં…પે…. (૩)

૧૩. ભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ધમ્મો ઉપ્પજ્જતિ સહજાતપચ્ચયા – ભાવનાય પહાતબ્બહેતુકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

ભાવનાય પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ સહજાતપચ્ચયા – ભાવનાય પહાતબ્બહેતુકે ખન્ધે પટિચ્ચ ચિત્તસમુટ્ઠાનં રૂપં; ઉદ્ધચ્ચસહગતે ખન્ધે પટિચ્ચ મોહો ચ ચિત્તસમુટ્ઠાનઞ્ચ રૂપં. (૨)

ભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ચ નેવદસ્સનેન નભાવનાય પહાતબ્બહેતુકો ચ ધમ્મા ઉપ્પજ્જન્તિ સહજાતપચ્ચયા – ભાવનાય પહાતબ્બહેતુકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં; ઉદ્ધચ્ચસહગતં એકં ખન્ધં પટિચ્ચ તયો ખન્ધા મોહો ચ ચિત્તસમુટ્ઠાનઞ્ચ રૂપં…પે…. (૩)

૧૪. નેવદસ્સનેન નભાવનાય પહાતબ્બહેતુકં ધમ્મં પટિચ્ચ નેવદસ્સનેન નભાવનાય પહાતબ્બહેતુકો ધમ્મો ઉપ્પજ્જતિ સહજાતપચ્ચયા – નેવદસ્સનેન નભાવનાય પહાતબ્બહેતુકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… વિચિકિચ્છાસહગતં ઉદ્ધચ્ચસહગતં મોહં પટિચ્ચ ચિત્તસમુટ્ઠાનં રૂપં. પટિસન્ધિક્ખણે…પે… ખન્ધે પટિચ્ચ વત્થુ, વત્થું પટિચ્ચ ખન્ધા; એકં મહાભૂતં પટિચ્ચ તયો મહાભૂતા…પે… બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં…પે…. (૧)

નેવદસ્સનેન નભાવનાય પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ સહજાતપચ્ચયા – વિચિકિચ્છાસહગતં મોહં પટિચ્ચ સમ્પયુત્તકા ખન્ધા. (૨)

નેવદસ્સનેન નભાવનાય પહાતબ્બહેતુકં ધમ્મં પટિચ્ચ ભાવનાય પહાતબ્બહેતુકો ધમ્મો ઉપ્પજ્જતિ સહજાતપચ્ચયા (સંખિત્તં. હેતુસદિસં કાતબ્બં). (૩)

અઞ્ઞમઞ્ઞપચ્ચયાદિ

૧૫. દસ્સનેન પહાતબ્બહેતુકં ધમ્મં પટિચ્ચ દસ્સનેન પહાતબ્બહેતુકો ધમ્મો ઉપ્પજ્જતિ અઞ્ઞમઞ્ઞપચ્ચયા, નિસ્સયપચ્ચયા, ઉપનિસ્સયપચ્ચયા, પુરેજાતપચ્ચયા, આસેવનપચ્ચયા, કમ્મપચ્ચયા, વિપાકપચ્ચયા, આહારપચ્ચયા, ઇન્દ્રિયપચ્ચયા, ઝાનપચ્ચયા, મગ્ગપચ્ચયા, સમ્પયુત્તપચ્ચયા, વિપ્પયુત્તપચ્ચયા, અત્થિપચ્ચયા, નત્થિપચ્ચયા, વિગતપચ્ચયા, અવિગતપચ્ચયા.