૧. વિભઙ્ગવારો

હેતુપચ્ચયો

૬૦. દસ્સનેન પહાતબ્બં ધમ્મં સંસટ્ઠો દસ્સનેન પહાતબ્બો ધમ્મો ઉપ્પજ્જતિ હેતુપચ્ચયા – દસ્સનેન પહાતબ્બં એકં ખન્ધં સંસટ્ઠા તયો ખન્ધા…પે… દ્વે ખન્ધે સંસટ્ઠા દ્વે ખન્ધા. (૧)

ભાવનાય પહાતબ્બં ધમ્મં સંસટ્ઠો ભાવનાય પહાતબ્બો ધમ્મો ઉપ્પજ્જતિ હેતુપચ્ચયા – ભાવનાય પહાતબ્બં એકં ખન્ધં સંસટ્ઠા…પે…. (૧)

નેવદસ્સનેન નભાવનાય પહાતબ્બં ધમ્મં સંસટ્ઠો નેવદસ્સનેન નભાવનાય પહાતબ્બો ધમ્મો ઉપ્પજ્જતિ હેતુપચ્ચયા – નેવદસ્સનેન નભાવનાય પહાતબ્બં એકં ખન્ધં સંસટ્ઠા તયો ખન્ધા…પે… પટિસન્ધિક્ખણે નેવદસ્સનેન નભાવનાય પહાતબ્બં એકં ખન્ધં સંસટ્ઠા…પે…. (૧)

આરમ્મણપચ્ચયો

૬૧. દસ્સનેન પહાતબ્બં ધમ્મં સંસટ્ઠો દસ્સનેન પહાતબ્બો ધમ્મો ઉપ્પજ્જતિ આરમ્મણપચ્ચયા (સબ્બાનિ પદાનિ વિત્થારેતબ્બાનિ તીણિ, તીણિ).

૧. પચ્ચયાનુલોમં

૨. સઙ્ખ્યાવારો

૬૨. હેતુયા તીણિ, આરમ્મણે તીણિ, અધિપતિયા તીણિ, અનન્તરે તીણિ, સમનન્તરે તીણિ, સહજાતે તીણિ, અઞ્ઞમઞ્ઞે તીણિ, નિસ્સયે તીણિ, ઉપનિસ્સયે તીણિ, પુરેજાતે તીણિ, આસેવને તીણિ, કમ્મે તીણિ, વિપાકે એકં, આહારે તીણિ, ઇન્દ્રિયે તીણિ, ઝાને તીણિ, મગ્ગે તીણિ, સમ્પયુત્તે તીણિ, વિપ્પયુત્તે તીણિ, અત્થિયા તીણિ, નત્થિયા તીણિ, વિગતે તીણિ, અવિગતે તીણિ.

અનુલોમં.