૧. વિભઙ્ગવારો

હેતુપચ્ચયો

૩૬. દસ્સનેન પહાતબ્બં ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ હેતુપચ્ચયા… તીણિ.

ભાવનાય પહાતબ્બં ધમ્મં પચ્ચયા ભાવનાય… તીણિ.

૩૭. નેવદસ્સનેન નભાવનાય પહાતબ્બં ધમ્મં પચ્ચયા નેવદસ્સનેન નભાવનાય પહાતબ્બો ધમ્મો ઉપ્પજ્જતિ હેતુપચ્ચયા – નેવદસ્સનેન નભાવનાય પહાતબ્બં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે નેવદસ્સનેન નભાવનાય પહાતબ્બં એકં ખન્ધં પચ્ચયા તયો ખન્ધા કટત્તા ચ રૂપં…પે… દ્વે ખન્ધે પચ્ચયા દ્વે ખન્ધા…પે… ખન્ધે પચ્ચયા વત્થુ, વત્થું પચ્ચયા ખન્ધા. એકં મહાભૂતં પચ્ચયા તયો મહાભૂતા…પે… મહાભૂતે પચ્ચયા ચિત્તસમુટ્ઠાનં રૂપં કટત્તારૂપં ઉપાદારૂપં. વત્થું પચ્ચયા નેવદસ્સનેન નભાવનાય પહાતબ્બા ખન્ધા. (૧)

નેવદસ્સનેન નભાવનાય પહાતબ્બં ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ હેતુપચ્ચયા – વત્થું પચ્ચયા દસ્સનેન પહાતબ્બા ખન્ધા. (૨)

નેવદસ્સનેન નભાવનાય પહાતબ્બં ધમ્મં પચ્ચયા ભાવનાય પહાતબ્બો ધમ્મો ઉપ્પજ્જતિ હેતુપચ્ચયા – વત્થું પચ્ચયા ભાવનાય પહાતબ્બા ખન્ધા. (૩)

નેવદસ્સનેન નભાવનાય પહાતબ્બં ધમ્મં પચ્ચયા દસ્સનેન પહાતબ્બો ચ નેવદસ્સનેન નભાવનાય પહાતબ્બો ચ ધમ્મા ઉપ્પજ્જન્તિ હેતુપચ્ચયા – વત્થું પચ્ચયા દસ્સનેન પહાતબ્બા ખન્ધા; મહાભૂતે પચ્ચયા ચિત્તસમુટ્ઠાનં રૂપં. (૪)

નેવદસ્સનેન નભાવનાય પહાતબ્બં ધમ્મં પચ્ચયા ભાવનાય પહાતબ્બો ચ નેવદસ્સનેન નભાવનાય પહાતબ્બો ચ ધમ્મા ઉપ્પજ્જન્તિ હેતુપચ્ચયા – વત્થું પચ્ચયા ભાવનાય પહાતબ્બા ખન્ધા; મહાભૂતે પચ્ચયા ચિત્તસમુટ્ઠાનં રૂપં. (૫)

૩૮. દસ્સનેન પહાતબ્બઞ્ચ નેવદસ્સનેન નભાવનાય પહાતબ્બઞ્ચ ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ હેતુપચ્ચયા – દસ્સનેન પહાતબ્બં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે ચ વત્થુઞ્ચ પચ્ચયા દ્વે ખન્ધા. (૧)

દસ્સનેન પહાતબ્બઞ્ચ નેવદસ્સનેન નભાવનાય પહાતબ્બઞ્ચ ધમ્મં પચ્ચયા નેવદસ્સનેન નભાવનાય પહાતબ્બો ધમ્મો ઉપ્પજ્જતિ હેતુપચ્ચયા – દસ્સનેન પહાતબ્બે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં. (૨)

દસ્સનેન પહાતબ્બઞ્ચ નેવદસ્સનેન નભાવનાય પહાતબ્બઞ્ચ ધમ્મં પચ્ચયા દસ્સનેન પહાતબ્બો ચ નેવદસ્સનેન નભાવનાય પહાતબ્બો ચ ધમ્મા ઉપ્પજ્જન્તિ હેતુપચ્ચયા – દસ્સનેન પહાતબ્બં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે ચ વત્થુઞ્ચ પચ્ચયા દ્વે ખન્ધા, દસ્સનેન પહાતબ્બે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં. (૩)

૩૯. ભાવનાય પહાતબ્બઞ્ચ નેવદસ્સનેન નભાવનાય પહાતબ્બઞ્ચ ધમ્મં પચ્ચયા ભાવનાય પહાતબ્બો ધમ્મો ઉપ્પજ્જતિ હેતુપચ્ચયા – ભાવનાય પહાતબ્બં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે ચ વત્થુઞ્ચ…પે…. (૧)

ભાવનાય પહાતબ્બઞ્ચ નેવદસ્સનેન નભાવનાય પહાતબ્બઞ્ચ ધમ્મં પચ્ચયા નેવદસ્સનેન નભાવનાય પહાતબ્બો ધમ્મો ઉપ્પજ્જતિ હેતુપચ્ચયા – ભાવનાય પહાતબ્બે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં. (૨)

ભાવનાય પહાતબ્બઞ્ચ નેવદસ્સનેન નભાવનાય પહાતબ્બઞ્ચ ધમ્મં પચ્ચયા ભાવનાય પહાતબ્બો ચ નેવદસ્સનેન નભાવનાય પહાતબ્બો ચ ધમ્મા ઉપ્પજ્જન્તિ હેતુપચ્ચયા – ભાવનાય પહાતબ્બં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે ચ વત્થુઞ્ચ…પે… ભાવનાય પહાતબ્બે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં. (૩)

આરમ્મણપચ્ચયો

૪૦. દસ્સનેન પહાતબ્બં ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ આરમ્મણપચ્ચયા – દસ્સનેન પહાતબ્બં એકં ખન્ધં પચ્ચયા તયો ખન્ધા…પે… દ્વે ખન્ધે…પે…. (૧)

ભાવનાય પહાતબ્બં ધમ્મં પચ્ચયા ભાવનાય પહાતબ્બો ધમ્મો ઉપ્પજ્જતિ આરમ્મણપચ્ચયા – ભાવનાય પહાતબ્બં એકં ખન્ધં પચ્ચયા તયો ખન્ધા…પે…. (૧)

નેવદસ્સનેન નભાવનાય પહાતબ્બં ધમ્મં પચ્ચયા નેવદસ્સનેન નભાવનાય પહાતબ્બો ધમ્મો ઉપ્પજ્જતિ આરમ્મણપચ્ચયા – નેવદસ્સનેન નભાવનાય પહાતબ્બં એકં ખન્ધં પચ્ચયા તયો ખન્ધા…પે… દ્વે ખન્ધે…પે…. પટિસન્ધિક્ખણે નેવદસ્સનેન નભાવનાય પહાતબ્બં એકં ખન્ધં પચ્ચયા તયો ખન્ધા…પે… દ્વે ખન્ધે…પે… વત્થું પચ્ચયા ખન્ધા, ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા નેવદસ્સનેન નભાવનાય પહાતબ્બા ખન્ધા. (૧)

નેવદસ્સનેન નભાવનાય પહાતબ્બં ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ આરમ્મણપચ્ચયા – વત્થું પચ્ચયા દસ્સનેન પહાતબ્બા ખન્ધા. (૨)

નેવદસ્સનેન નભાવનાય પહાતબ્બં ધમ્મં પચ્ચયા ભાવનાય પહાતબ્બો ધમ્મો ઉપ્પજ્જતિ આરમ્મણપચ્ચયા – વત્થું પચ્ચયા ભાવનાય પહાતબ્બા ખન્ધા. (૩)

૪૧. દસ્સનેન પહાતબ્બઞ્ચ નેવદસ્સનેન નભાવનાય પહાતબ્બઞ્ચ ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ આરમ્મણપચ્ચયા – દસ્સનેન પહાતબ્બં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે ચ વત્થુઞ્ચ પચ્ચયા…પે…. (૧)

ભાવનાય પહાતબ્બઞ્ચ નેવદસ્સનેન નભાવનાય પહાતબ્બઞ્ચ ધમ્મં પચ્ચયા ભાવનાય પહાતબ્બો ધમ્મો ઉપ્પજ્જતિ આરમ્મણપચ્ચયા – ભાવનાય પહાતબ્બં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે ચ વત્થુઞ્ચ પચ્ચયા દ્વે ખન્ધા. (૧)

અધિપતિપચ્ચયાદિ

૪૨. દસ્સનેન પહાતબ્બં ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ અધિપતિપચ્ચયા… (પરિપુણ્ણં, પટિસન્ધિ નત્થિ) અનન્તરપચ્ચયા… સમનન્તરપચ્ચયા (આરમ્મણસદિસં).

સહજાતપચ્ચયો

દસ્સનેન પહાતબ્બં ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ સહજાતપચ્ચયા – દસ્સનેન પહાતબ્બં એકં ખન્ધં… તીણિ.

ભાવનાય પહાતબ્બં ધમ્મં પચ્ચયા… તીણિ.

૪૩. નેવદસ્સનેન નભાવનાય પહાતબ્બં ધમ્મં પચ્ચયા નેવદસ્સનેન નભાવનાય પહાતબ્બો ધમ્મો ઉપ્પજ્જતિ સહજાતપચ્ચયા – નેવદસ્સનેન નભાવનાય પહાતબ્બં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પચ્ચયા દ્વે ખન્ધા…પે… પટિસન્ધિક્ખણે…પે… ખન્ધે પચ્ચયા વત્થુ, વત્થું પચ્ચયા ખન્ધા; એકં મહાભૂતં પચ્ચયા તયો મહાભૂતા…પે… મહાભૂતે પચ્ચયા…પે… બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં…પે… ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા નેવદસ્સનેન નભાવનાય પહાતબ્બા ખન્ધા.

નેવદસ્સનેન નભાવનાય પહાતબ્બં ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ સહજાતપચ્ચયા (અવસેસા હેતુપચ્ચયસદિસા).

અઞ્ઞમઞ્ઞપચ્ચયાદિ

૪૪. દસ્સનેન પહાતબ્બં ધમ્મં પચ્ચયા દસ્સનેન પહાતબ્બો ધમ્મો ઉપ્પજ્જતિ અઞ્ઞમઞ્ઞપચ્ચયા… નિસ્સયપચ્ચયા… ઉપનિસ્સયપચ્ચયા… પુરેજાતપચ્ચયા (પટિસન્ધિ નત્થિ)… આસેવનપચ્ચયા… (પટિસન્ધિ નત્થિ, વિપાકઞ્ચ) કમ્મપચ્ચયા… વિપાકપચ્ચયા… આહારપચ્ચયા… ઇન્દ્રિયપચ્ચયા… ઝાનપચ્ચયા… મગ્ગપચ્ચયા… સમ્પયુત્તપચ્ચયા… વિપ્પયુત્તપચ્ચયા… અત્થિપચ્ચયા… નત્થિપચ્ચયા… વિગતપચ્ચયા… અવિગતપચ્ચયા.