૧. વિભઙ્ગવારો

હેતુપચ્ચયો

૧૩. પરિત્તારમ્મણો ધમ્મો પરિત્તારમ્મણસ્સ ધમ્મસ્સ હેતુપચ્ચયેન પચ્ચયો – પરિત્તારમ્મણા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. પટિસન્ધિક્ખણે પરિત્તારમ્મણા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

મહગ્ગતારમ્મણો ધમ્મો મહગ્ગતારમ્મણસ્સ ધમ્મસ્સ હેતુપચ્ચયેન પચ્ચયો – મહગ્ગતારમ્મણા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. પટિસન્ધિક્ખણે…પે…. (૧)

અપ્પમાણારમ્મણો ધમ્મો અપ્પમાણારમ્મણસ્સ ધમ્મસ્સ હેતુપચ્ચયેન પચ્ચયો – અપ્પમાણારમ્મણા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

આરમ્મણપચ્ચયો

૧૪. પરિત્તારમ્મણો ધમ્મો પરિત્તારમ્મણસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, અરિયા પરિત્તારમ્મણે પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ. પરિત્તારમ્મણે પરિત્તે ખન્ધે અનિચ્ચતો દુક્ખતો અનત્તતો વિપસ્સતિ, અસ્સાદેતિ અભિનન્દતિ, તં આરબ્ભ પરિત્તારમ્મણો રાગો ઉપ્પજ્જતિ…પે… દોમનસ્સં ઉપ્પજ્જતિ. ચેતોપરિયઞાણેન પરિત્તારમ્મણપરિત્તચિત્તસમઙ્ગિસ્સ ચિત્તં જાનાતિ. પરિત્તારમ્મણા પરિત્તા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

પરિત્તારમ્મણો ધમ્મો મહગ્ગતારમ્મણસ્સ ધમ્મસ્સ આરમ્મણપચ્ચયેન પચ્ચયો – દિબ્બં ચક્ખું પચ્ચવેક્ખતિ, દિબ્બં સોતધાતું પચ્ચવેક્ખતિ, પરિત્તારમ્મણં ઇદ્ધિવિધઞાણં પચ્ચવેક્ખતિ, ચેતોપરિયઞાણં…પે… પુબ્બેનિવાસાનુસ્સતિઞાણં…પે… યથાકમ્મૂપગઞાણં…પે… અનાગતંસઞાણં પચ્ચવેક્ખતિ. પરિત્તારમ્મણે મહગ્ગતે ખન્ધે અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ મહગ્ગતારમ્મણો રાગો ઉપ્પજ્જતિ…પે… દોમનસ્સં ઉપ્પજ્જતિ. ચેતોપરિયઞાણેન પરિત્તારમ્મણમહગ્ગતચિત્તસમઙ્ગિસ્સ ચિત્તં જાનાતિ. પરિત્તારમ્મણા મહગ્ગતા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૧૫. મહગ્ગતારમ્મણો ધમ્મો મહગ્ગતારમ્મણસ્સ ધમ્મસ્સ આરમ્મણપચ્ચયેન પચ્ચયો – વિઞ્ઞાણઞ્ચાયતનં પચ્ચવેક્ખતિ, નેવસઞ્ઞાનાસઞ્ઞાયતનં પચ્ચવેક્ખતિ, મહગ્ગતારમ્મણં ઇદ્ધિવિધઞાણં પચ્ચવેક્ખતિ, ચેતોપરિયઞાણં…પે… પુબ્બેનિવાસાનુસ્સતિઞાણં…પે… યથાકમ્મૂપગઞાણં…પે… અનાગતંસઞાણં પચ્ચવેક્ખતિ. મહગ્ગતારમ્મણે મહગ્ગતે ખન્ધે અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ મહગ્ગતારમ્મણો રાગો ઉપ્પજ્જતિ…પે… દોમનસ્સં ઉપ્પજ્જતિ. ચેતોપરિયઞાણેન મહગ્ગતારમ્મણમહગ્ગતચિત્તસમઙ્ગિસ્સ ચિત્તં જાનાતિ. મહગ્ગતારમ્મણા મહગ્ગતા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

મહગ્ગતારમ્મણો ધમ્મો પરિત્તારમ્મણસ્સ ધમ્મસ્સ આરમ્મણપચ્ચયેન પચ્ચયો – પઠમજ્ઝાનપચ્ચવેક્ખણં પચ્ચવેક્ખતિ…પે… નેવસઞ્ઞાનાસઞ્ઞાયતનપચ્ચવેક્ખણં પચ્ચવેક્ખતિ, દિબ્બચક્ખુપચ્ચવેક્ખણં પચ્ચવેક્ખતિ, દિબ્બસોતધાતુપચ્ચવેક્ખણં પચ્ચવેક્ખતિ, ઇદ્ધિવિધઞાણપચ્ચવેક્ખણં…પે… ચેતોપરિયઞાણપચ્ચવેક્ખણં…પે… પુબ્બેનિવાસાનુસ્સતિઞાણપચ્ચવેક્ખણં…પે… યથાકમ્મૂપગઞાણપચ્ચવેક્ખણં…પે… અનાગતંસઞાણપચ્ચવેક્ખણં પચ્ચવેક્ખતિ, અરિયા મહગ્ગતારમ્મણે પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ. મહગ્ગતારમ્મણે પરિત્તે ખન્ધે અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ પરિત્તારમ્મણો રાગો ઉપ્પજ્જતિ…પે… દોમનસ્સં ઉપ્પજ્જતિ. ચેતોપરિયઞાણેન મહગ્ગતારમ્મણપરિત્તચિત્તસમઙ્ગિસ્સ ચિત્તં જાનાતિ. મહગ્ગતારમ્મણા પરિત્તા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૧૬. અપ્પમાણારમ્મણો ધમ્મો અપ્પમાણારમ્મણસ્સ ધમ્મસ્સ આરમ્મણપચ્ચયેન પચ્ચયો – અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં પચ્ચવેક્ખન્તિ. ચેતોપરિયઞાણેન અપ્પમાણારમ્મણઅપ્પમાણચિત્તસમઙ્ગિસ્સ ચિત્તં જાનાતિ. અપ્પમાણારમ્મણા અપ્પમાણા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અપ્પમાણારમ્મણો ધમ્મો પરિત્તારમ્મણસ્સ ધમ્મસ્સ આરમ્મણપચ્ચયેન પચ્ચયો – અરિયા ગોત્રભું પચ્ચવેક્ખન્તિ, વોદાનં પચ્ચવેક્ખન્તિ, મગ્ગપચ્ચવેક્ખણં પચ્ચવેક્ખન્તિ, ફલપચ્ચવેક્ખણં પચ્ચવેક્ખન્તિ, નિબ્બાનપચ્ચવેક્ખણં પચ્ચવેક્ખન્તિ. અપ્પમાણારમ્મણે પરિત્તે ખન્ધે અનિચ્ચતો…પે… વિપસ્સતિ, ચેતોપરિયઞાણેન અપ્પમાણારમ્મણપરિત્તચિત્તસમઙ્ગિસ્સ ચિત્તં જાનાતિ. અપ્પમાણારમ્મણા પરિત્તા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ આવજ્જનાય આરમ્મણપચ્ચયેન પચ્ચયો. (૨)

અપ્પમાણારમ્મણો ધમ્મો મહગ્ગતારમ્મણસ્સ ધમ્મસ્સ આરમ્મણપચ્ચયેન પચ્ચયો – અરિયા અપ્પમાણારમ્મણં ચેતોપરિયઞાણં પચ્ચવેક્ખન્તિ, પુબ્બેનિવાસાનુસ્સતિઞાણં પચ્ચવેક્ખન્તિ, અનાગતંસઞાણં પચ્ચવેક્ખન્તિ. ચેતોપરિયઞાણેન અપ્પમાણારમ્મણમહગ્ગતચિત્તસમઙ્ગિસ્સ ચિત્તં જાનન્તિ. અપ્પમાણારમ્મણં મહગ્ગતા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૩)

અધિપતિપચ્ચયો

૧૭. પરિત્તારમ્મણો ધમ્મો પરિત્તારમ્મણસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા પચ્ચવેક્ખતિ, પુબ્બે સુચિણ્ણાનિ ગરું કત્વા પચ્ચવેક્ખતિ, પરિત્તારમ્મણે પરિત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા પરિત્તારમ્મણો રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – પરિત્તારમ્મણાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

પરિત્તારમ્મણો ધમ્મો મહગ્ગતારમ્મણસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દિબ્બં ચક્ખું ગરું કત્વા પચ્ચવેક્ખતિ, દિબ્બં સોતધાતું…પે… પરિત્તારમ્મણં ઇદ્ધિવિધઞાણં…પે… ચેતોપરિયઞાણં…પે… પુબ્બેનિવાસાનુસ્સતિઞાણં…પે… યથાકમ્મૂપગઞાણં…પે… અનાગતંસઞાણં ગરું કત્વા પચ્ચવેક્ખતિ. પરિત્તારમ્મણે મહગ્ગતે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા મહગ્ગતારમ્મણો રાગો ઉપ્પજ્જતિ, દિટ્ઠિ ઉપ્પજ્જતિ. (૨)

૧૮. મહગ્ગતારમ્મણો ધમ્મો મહગ્ગતારમ્મણસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – વિઞ્ઞાણઞ્ચાયતનં ગરું કત્વા પચ્ચવેક્ખતિ, નેવસઞ્ઞાનાસઞ્ઞાયતનં…પે… મહગ્ગતારમ્મણં ઇદ્ધિવિધઞાણં…પે… ચેતોપરિયઞાણં …પે… પુબ્બેનિવાસાનુસ્સતિઞાણં…પે… યથાકમ્મૂપગઞાણં…પે… અનાગતંસઞાણં ગરું કત્વા પચ્ચવેક્ખતિ. મહગ્ગતારમ્મણે મહગ્ગતે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા મહગ્ગતારમ્મણો રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – મહગ્ગતારમ્મણાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

મહગ્ગતારમ્મણો ધમ્મો પરિત્તારમ્મણસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – પઠમજ્ઝાનપચ્ચવેક્ખણં ગરું કત્વા પચ્ચવેક્ખતિ…પે… અનાગતંસઞાણપચ્ચવેક્ખણં ગરું કત્વા પચ્ચવેક્ખતિ. મહગ્ગતારમ્મણે પરિત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા પરિત્તારમ્મણો રાગો ઉપ્પજ્જતિ, દિટ્ઠિ ઉપ્પજ્જતિ. (૨)

૧૯. અપ્પમાણારમ્મણો ધમ્મો અપ્પમાણારમ્મણસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ, ફલં ગરું કત્વા પચ્ચવેક્ખન્તિ. સહજાતાધિપતિ – અપ્પમાણારમ્મણાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

અપ્પમાણારમ્મણો ધમ્મો પરિત્તારમ્મણસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – સેક્ખા ગોત્રભું ગરું કત્વા પચ્ચવેક્ખન્તિ, વોદાનં ગરું કત્વા પચ્ચવેક્ખન્તિ, મગ્ગપચ્ચવેક્ખણં ગરું કત્વા પચ્ચવેક્ખન્તિ, ફલપચ્ચવેક્ખણં ગરું કત્વા પચ્ચવેક્ખન્તિ, નિબ્બાનપચ્ચવેક્ખણં ગરું કત્વા પચ્ચવેક્ખન્તિ. (૨)

અપ્પમાણારમ્મણો ધમ્મો મહગ્ગતારમ્મણસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – સેક્ખા અપ્પમાણારમ્મણં ચેતોપરિયઞાણં ગરું કત્વા પચ્ચવેક્ખન્તિ. પુબ્બેનિવાસાનુસ્સતિઞાણં…પે… અનાગતંસઞાણં ગરું કત્વા પચ્ચવેક્ખન્તિ. (૩)

અનન્તરપચ્ચયો

૨૦. પરિત્તારમ્મણો ધમ્મો પરિત્તારમ્મણસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા પરિત્તારમ્મણા ખન્ધા પચ્છિમાનં પચ્છિમાનં પરિત્તારમ્મણાનં ખન્ધાનં અનન્તરપચ્ચયેન પચ્ચયો. (૧)

પરિત્તારમ્મણો ધમ્મો મહગ્ગતારમ્મણસ્સ ધમ્મસ્સ અનન્તરપચ્ચયેન પચ્ચયો – પરિત્તારમ્મણં ચુતિચિત્તં મહગ્ગતારમ્મણસ્સ ઉપપત્તિચિત્તસ્સ અનન્તરપચ્ચયેન પચ્ચયો. પરિત્તારમ્મણં ભવઙ્ગં મહગ્ગતારમ્મણાય આવજ્જનાય અનન્તરપચ્ચયેન પચ્ચયો. પરિત્તારમ્મણા ખન્ધા મહગ્ગતારમ્મણસ્સ વુટ્ઠાનસ્સ અનન્તરપચ્ચયેન પચ્ચયો. (૨)

પરિત્તારમ્મણો ધમ્મો અપ્પમાણારમ્મણસ્સ ધમ્મસ્સ અનન્તરપચ્ચયેન પચ્ચયો – પરિત્તારમ્મણં ભવઙ્ગં અપ્પમાણારમ્મણાય આવજ્જનાય અનન્તરપચ્ચયેન પચ્ચયો. પરિત્તારમ્મણં અનુલોમં ગોત્રભુસ્સ… અનુલોમં વોદાનસ્સ… અનુલોમં ફલસમાપત્તિયા અનન્તરપચ્ચયેન પચ્ચયો. (૩)

૨૧. મહગ્ગતારમ્મણો ધમ્મો મહગ્ગતારમ્મણસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા મહગ્ગતારમ્મણા ખન્ધા પચ્છિમાનં પચ્છિમાનં મહગ્ગતારમ્મણાનં ખન્ધાનં અનન્તરપચ્ચયેન પચ્ચયો. (૧)

મહગ્ગતારમ્મણો ધમ્મો પરિત્તારમ્મણસ્સ ધમ્મસ્સ અનન્તરપચ્ચયેન પચ્ચયો – મહગ્ગતારમ્મણં ચુતિચિત્તં પરિત્તારમ્મણસ્સ ઉપપત્તિચિત્તસ્સ અનન્તરપચ્ચયેન પચ્ચયો. મહગ્ગતારમ્મણં ભવઙ્ગં પરિત્તારમ્મણાય આવજ્જનાય અનન્તરપચ્ચયેન પચ્ચયો. મહગ્ગતારમ્મણા ખન્ધા પરિત્તારમ્મણસ્સ વુટ્ઠાનસ્સ અનન્તરપચ્ચયેન પચ્ચયો. (૨)

મહગ્ગતારમ્મણો ધમ્મો અપ્પમાણારમ્મણસ્સ ધમ્મસ્સ અનન્તરપચ્ચયેન પચ્ચયો – મહગ્ગતારમ્મણં ભવઙ્ગં અપ્પમાણારમ્મણાય આવજ્જનાય અનન્તરપચ્ચયેન પચ્ચયો. મહગ્ગતારમ્મણં અનુલોમં ગોત્રભુસ્સ… અનુલોમં વોદાનસ્સ… અનુલોમં ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનં ફલસમાપત્તિયા અનન્તરપચ્ચયેન પચ્ચયો. (૩)

૨૨. અપ્પમાણારમ્મણો ધમ્મો અપ્પમાણારમ્મણસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અપ્પમાણારમ્મણા ખન્ધા પચ્છિમાનં પચ્છિમાનં અપ્પમાણારમ્મણાનં ખન્ધાનં અનન્તરપચ્ચયેન પચ્ચયો. ગોત્રભુ મગ્ગસ્સ… વોદાનં મગ્ગસ્સ… મગ્ગો ફલસ્સ… ફલં ફલસ્સ અનન્તરપચ્ચયેન પચ્ચયો. (૧)

અપ્પમાણારમ્મણો ધમ્મો પરિત્તારમ્મણસ્સ ધમ્મસ્સ અનન્તરપચ્ચયેન પચ્ચયો – મગ્ગપચ્ચવેક્ખણં પરિત્તારમ્મણસ્સ વુટ્ઠાનસ્સ… ફલપચ્ચવેક્ખણં પરિત્તારમ્મણસ્સ વુટ્ઠાનસ્સ… નિબ્બાનપચ્ચવેક્ખણં પરિત્તારમ્મણસ્સ વુટ્ઠાનસ્સ… અપ્પમાણારમ્મણં ચેતોપરિયઞાણં પરિત્તારમ્મણસ્સ વુટ્ઠાનસ્સ… પુબ્બેનિવાસાનુસ્સતિઞાણં પરિત્તારમ્મણસ્સ વુટ્ઠાનસ્સ… અનાગતંસઞાણં પરિત્તારમ્મણસ્સ વુટ્ઠાનસ્સ… ફલં પરિત્તારમ્મણસ્સ વુટ્ઠાનસ્સ અનન્તરપચ્ચયેન પચ્ચયો. (૨)

અપ્પમાણારમ્મણો ધમ્મો મહગ્ગતારમ્મણસ્સ ધમ્મસ્સ અનન્તરપચ્ચયેન પચ્ચયો – મગ્ગપચ્ચવેક્ખણં મહગ્ગતારમ્મણસ્સ વુટ્ઠાનસ્સ… ફલપચ્ચવેક્ખણં મહગ્ગતારમ્મણસ્સ વુટ્ઠાનસ્સ… નિબ્બાનપચ્ચવેક્ખણં મહગ્ગતારમ્મણસ્સ વુટ્ઠાનસ્સ… ફલં મહગ્ગતારમ્મણસ્સ વુટ્ઠાનસ્સ અનન્તરપચ્ચયેન પચ્ચયો. (૩)

સમનન્તરપચ્ચયો

૨૩. પરિત્તારમ્મણો ધમ્મો પરિત્તારમ્મણસ્સ ધમ્મસ્સ સમનન્તરપચ્ચયેન પચ્ચયો (અનન્તરસદિસં).

સહજાતપચ્ચયાદિ

૨૪. પરિત્તારમ્મણો ધમ્મો પરિત્તારમ્મણસ્સ ધમ્મસ્સ સહજાતપચ્ચયેન પચ્ચયો… અઞ્ઞમઞ્ઞપચ્ચયેન પચ્ચયો… નિસ્સયપચ્ચયેન પચ્ચયો… તીણિ (પટિચ્ચવારસદિસા કાતબ્બા).

ઉપનિસ્સયપચ્ચયો

૨૫. પરિત્તારમ્મણો ધમ્મો પરિત્તારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પરિત્તારમ્મણં સદ્ધં ઉપનિસ્સાય દાનં દેતિ, સીલં…પે… ઉપોસથકમ્મં…પે… પરિત્તારમ્મણં ઝાનં ઉપ્પાદેતિ, વિપસ્સનં…પે… અભિઞ્ઞં…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ. પરિત્તારમ્મણં સીલં…પે… પઞ્ઞં… રાગં દોસં… મોહં… માનં… દિટ્ઠિં… પત્થનં… કાયિકં સુખં… કાયિકં દુક્ખં ઉપનિસ્સાય દાનં દેતિ, સીલં…પે… ઉપોસથકમ્મં…પે… પરિત્તારમ્મણં ઝાનં ઉપ્પાદેતિ, વિપસ્સનં…પે… અભિઞ્ઞં…પે… સમાપત્તિં ઉપ્પાદેતિ, પાણં હનતિ…પે… સઙ્ઘં ભિન્દતિ. પરિત્તારમ્મણા સદ્ધા…પે… પઞ્ઞા, રાગો…પે… પત્થના, કાયિકં સુખં… કાયિકં દુક્ખં… પરિત્તારમ્મણાય સદ્ધાય…પે… પઞ્ઞાય રાગસ્સ…પે… પત્થનાય, કાયિકસ્સ સુખસ્સ, કાયિકસ્સ દુક્ખસ્સ ઉપનિસ્સયપચ્ચયેન પચ્ચયો. (૧)

પરિત્તારમ્મણો ધમ્મો મહગ્ગતારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પરિત્તારમ્મણં સદ્ધં ઉપનિસ્સાય મહગ્ગતારમ્મણં ઝાનં ઉપ્પાદેતિ, વિપસ્સનં…પે… અભિઞ્ઞં…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ. પરિત્તારમ્મણં સીલં…પે… પઞ્ઞં… રાગં…પે… પત્થનં… કાયિકં સુખં, કાયિકં દુક્ખં ઉપનિસ્સાય મહગ્ગતારમ્મણં ઝાનં ઉપ્પાદેતિ, વિપસ્સનં…પે… અભિઞ્ઞં…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ. પરિત્તારમ્મણા સદ્ધા…પે… કાયિકં સુખં, કાયિકં દુક્ખં, મહગ્ગતારમ્મણાય સદ્ધાય…પે… પઞ્ઞાય રાગસ્સ…પે… પત્થનાય ઉપનિસ્સયપચ્ચયેન પચ્ચયો. (૨)

પરિત્તારમ્મણો ધમ્મો અપ્પમાણારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પરિત્તારમ્મણં સદ્ધં ઉપનિસ્સાય અપ્પમાણારમ્મણં ઝાનં ઉપ્પાદેતિ, મગ્ગં…પે… અભિઞ્ઞં…પે… સમાપત્તિં ઉપ્પાદેતિ. પરિત્તારમ્મણં સીલં…પે… પઞ્ઞં, રાગં…પે… કાયિકં સુખં, કાયિકં દુક્ખં ઉપનિસ્સાય અપ્પમાણારમ્મણં ઝાનં ઉપ્પાદેતિ, મગ્ગં… અભિઞ્ઞં… સમાપત્તિં ઉપ્પાદેતિ. પરિત્તારમ્મણા સદ્ધા…પે… કાયિકં સુખં, કાયિકં દુક્ખં અપ્પમાણારમ્મણાય સદ્ધાય…પે… પઞ્ઞાય ઉપનિસ્સયપચ્ચયેન પચ્ચયો. (૩)

૨૬. મહગ્ગતારમ્મણો ધમ્મો મહગ્ગતારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – મહગ્ગતારમ્મણં સદ્ધં ઉપનિસ્સાય મહગ્ગતારમ્મણં ઝાનં ઉપ્પાદેતિ, વિપસ્સનં… અભિઞ્ઞં… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ. મહગ્ગતારમ્મણં સીલં…પે… પઞ્ઞં, રાગં…પે… પત્થનં ઉપનિસ્સાય મહગ્ગતારમ્મણં ઝાનં ઉપ્પાદેતિ…પે… દિટ્ઠિં ગણ્હાતિ. મહગ્ગતારમ્મણા સદ્ધા…પે… પઞ્ઞા, રાગો…પે… પત્થના મહગ્ગતારમ્મણાય સદ્ધાય…પે… પત્થનાય ઉપનિસ્સયપચ્ચયેન પચ્ચયો. (૧)

મહગ્ગતારમ્મણો ધમ્મો પરિત્તારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – મહગ્ગતારમ્મણં સદ્ધં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, પરિત્તારમ્મણં ઝાનં ઉપ્પાદેતિ, વિપસ્સનં… અભિઞ્ઞં… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ. મહગ્ગતારમ્મણં સીલં…પે… પત્થનં ઉપનિસ્સાય દાનં દેતિ…પે… દિટ્ઠિં ગણ્હાતિ. મહગ્ગતારમ્મણા સદ્ધા…પે… પત્થના પરિત્તારમ્મણાય સદ્ધાય…પે… પત્થનાય કાયિકસ્સ સુખસ્સ, કાયિકસ્સ દુક્ખસ્સ ઉપનિસ્સયપચ્ચયેન પચ્ચયો. (૨)

મહગ્ગતારમ્મણો ધમ્મો અપ્પમાણારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – મહગ્ગતારમ્મણં સદ્ધં ઉપનિસ્સાય અપ્પમાણારમ્મણં ઝાનં ઉપ્પાદેતિ, મગ્ગં… અભિઞ્ઞં… સમાપત્તિં ઉપ્પાદેતિ. મહગ્ગતારમ્મણં સીલં…પે… પત્થનં ઉપનિસ્સાય અપ્પમાણારમ્મણં ઝાનં ઉપ્પાદેતિ…પે… સમાપત્તિં ઉપ્પાદેતિ. મહગ્ગતારમ્મણા સદ્ધા…પે… પત્થના અપ્પમાણારમ્મણાય સદ્ધાય…પે… પઞ્ઞાય ઉપનિસ્સયપચ્ચયેન પચ્ચયો (૩)

૨૭. અપ્પમાણારમ્મણો ધમ્મો અપ્પમાણારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અપ્પમાણારમ્મણં સદ્ધં ઉપનિસ્સાય અપ્પમાણારમ્મણં ઝાનં ઉપ્પાદેતિ, મગ્ગં… અભિઞ્ઞં… સમાપત્તિં ઉપ્પાદેતિ. અપ્પમાણારમ્મણં સીલં…પે… પઞ્ઞં ઉપનિસ્સાય અપ્પમાણારમ્મણં ઝાનં ઉપ્પાદેતિ. મગ્ગં…પે… અભિઞ્ઞં…પે… સમાપત્તિં ઉપ્પાદેતિ અપ્પમાણારમ્મણા સદ્ધા…પે… પઞ્ઞા અપ્પમાણારમ્મણાય સદ્ધાય…પે… પઞ્ઞાય મગ્ગસ્સ ફલસમાપત્તિયા ઉપનિસ્સયપચ્ચયેન પચ્ચયો. (૧)

અપ્પમાણારમ્મણો ધમ્મો પરિત્તારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અપ્પમાણારમ્મણં સદ્ધં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, પરિત્તારમ્મણં ઝાનં ઉપ્પાદેતિ, વિપસ્સનં… અભિઞ્ઞં… સમાપત્તિં ઉપ્પાદેતિ. અપ્પમાણારમ્મણં સીલં…પે… પઞ્ઞં ઉપનિસ્સાય દાનં દેતિ…પે… સમાપત્તિં ઉપ્પાદેતિ. અપ્પમાણારમ્મણા સદ્ધા…પે… પઞ્ઞા પરિત્તારમ્મણાય સદ્ધાય…પે… પઞ્ઞાય કાયિકસ્સ સુખસ્સ, કાયિકસ્સ દુક્ખસ્સ ઉપનિસ્સયપચ્ચયેન પચ્ચયો. (૨)

અપ્પમાણારમ્મણો ધમ્મો મહગ્ગતારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અપ્પમાણારમ્મણં સદ્ધં ઉપનિસ્સાય મહગ્ગતારમ્મણં ઝાનં ઉપ્પાદેતિ, વિપસ્સનં… અભિઞ્ઞં… સમાપત્તિં ઉપ્પાદેતિ. અપ્પમાણારમ્મણં સીલં…પે… પઞ્ઞં ઉપનિસ્સાય મહગ્ગતારમ્મણં ઝાનં ઉપ્પાદેતિ, વિપસ્સનં… અભિઞ્ઞં… સમાપત્તિં ઉપ્પાદેતિ. અપ્પમાણારમ્મણા સદ્ધા…પે… પઞ્ઞા મહગ્ગતારમ્મણાય સદ્ધાય…પે… પઞ્ઞાય ઉપનિસ્સયપચ્ચયેન પચ્ચયો. (૩)

આસેવનપચ્ચયો

૨૮. પરિત્તારમ્મણો ધમ્મો પરિત્તારમ્મણસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા પરિત્તારમ્મણા ખન્ધા પચ્છિમાનં પચ્છિમાનં પરિત્તારમ્મણાનં ખન્ધાનં આસેવનપચ્ચયેન પચ્ચયો. (૧)

પરિત્તારમ્મણો ધમ્મો અપ્પમાણારમ્મણસ્સ ધમ્મસ્સ આસેવનપચ્ચયેન પચ્ચયો – પરિત્તારમ્મણં અનુલોમં ગોત્રભુસ્સ… અનુલોમં વોદાનસ્સ આસેવનપચ્ચયેન પચ્ચયો. (૨)

૨૯. મહગ્ગતારમ્મણો ધમ્મો મહગ્ગતારમ્મણસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા મહગ્ગતારમ્મણા ખન્ધા પચ્છિમાનં પચ્છિમાનં મહગ્ગતારમ્મણાનં ખન્ધાનં આસેવનપચ્ચયેન પચ્ચયો. (૧)

મહગ્ગતારમ્મણો ધમ્મો અપ્પમાણારમ્મણસ્સ ધમ્મસ્સ આસેવનપચ્ચયેન પચ્ચયો – મહગ્ગતારમ્મણં અનુલોમં ગોત્રભુસ્સ… અનુલોમં વોદાનસ્સ આસેવનપચ્ચયેન પચ્ચયો. (૨)

૩૦. અપ્પમાણારમ્મણો ધમ્મો અપ્પમાણારમ્મણસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા અપ્પમાણારમ્મણા ખન્ધા પચ્છિમાનં પચ્છિમાનં અપ્પમાણારમ્મણાનં ખન્ધાનં આસેવનપચ્ચયેન પચ્ચયો. ગોત્રભુ મગ્ગસ્સ… વોદાનં મગ્ગસ્સ આસેવનપચ્ચયેન પચ્ચયો. (૧)

કમ્મપચ્ચયો

૩૧. પરિત્તારમ્મણો ધમ્મો પરિત્તારમ્મણસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – પરિત્તારમ્મણા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. પટિસન્ધિક્ખણે…પે…. નાનાક્ખણિકા – પરિત્તારમ્મણા ચેતના વિપાકાનં પરિત્તારમ્મણાનં ખન્ધાનં કમ્મપચ્ચયેન પચ્ચયો. (૧)

મહગ્ગતારમ્મણો ધમ્મો મહગ્ગતારમ્મણસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – મહગ્ગતારમ્મણા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. પટિસન્ધિક્ખણે…પે…. નાનાક્ખણિકા – મહગ્ગતારમ્મણા ચેતના વિપાકાનં મહગ્ગતારમ્મણાનં ખન્ધાનં કમ્મપચ્ચયેન પચ્ચયો. (૧)

મહગ્ગતારમ્મણો ધમ્મો પરિત્તારમ્મણસ્સ ધમ્મસ્સ કમ્મપચ્ચયેન પચ્ચયો. નાનાક્ખણિકા – મહગ્ગતારમ્મણા ચેતના વિપાકાનં પરિત્તારમ્મણાનં ખન્ધાનં કમ્મપચ્ચયેન પચ્ચયો. (૨)

૩૨. અપ્પમાણારમ્મણો ધમ્મો અપ્પમાણારમ્મણસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અપ્પમાણારમ્મણા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. નાનાક્ખણિકા – અપ્પમાણારમ્મણા ચેતના વિપાકાનં અપ્પમાણારમ્મણાનં ખન્ધાનં કમ્મપચ્ચયેન પચ્ચયો. (૧)

અપ્પમાણારમ્મણો ધમ્મો પરિત્તારમ્મણસ્સ ધમ્મસ્સ કમ્મપચ્ચયેન પચ્ચયો. નાનાક્ખણિકા – અપ્પમાણારમ્મણા ચેતના વિપાકાનં પરિત્તારમ્મણાનં ખન્ધાનં કમ્મપચ્ચયેન પચ્ચયો. (૨)

વિપાકપચ્ચયાદિ

૩૩. પરિત્તારમ્મણો ધમ્મો પરિત્તારમ્મણસ્સ ધમ્મસ્સ વિપાકપચ્ચયેન પચ્ચયો… આહારપચ્ચયેન પચ્ચયો… ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો… મગ્ગપચ્ચયેન પચ્ચયો… સમ્પયુત્તપચ્ચયેન પચ્ચય… અત્થિપચ્ચયેન પચ્ચયો… નત્થિપચ્ચયેન પચ્ચયો… વિગતપચ્ચયેન પચ્ચય… અવિગતપચ્ચયેન પચ્ચયો.