૧. વિભઙ્ગવારો

હેતુપચ્ચયો

૪૨. સેક્ખો ધમ્મો સેક્ખસ્સ ધમ્મસ્સ હેતુપચ્ચયેન પચ્ચયો – સેક્ખા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

સેક્ખો ધમ્મો નેવસેક્ખનાસેક્ખસ્સ ધમ્મસ્સ હેતુપચ્ચયેન પચ્ચયો – સેક્ખા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૨)

સેક્ખો ધમ્મો સેક્ખસ્સ ચ નેવસેક્ખનાસેક્ખસ્સ ચ ધમ્મસ્સ હેતુપચ્ચયેન પચ્ચયો – સેક્ખા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

અસેક્ખો ધમ્મો અસેક્ખસ્સ ધમ્મસ્સ (તીણિ).

નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ હેતુપચ્ચયેન પચ્ચયો – નેવસેક્ખનાસેક્ખા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. પટિસન્ધિક્ખણે…પે…. (૧)

આરમ્મણપચ્ચયો

૪૩. સેક્ખો ધમ્મો નેવસેક્ખનાસેક્ખસ્સ ધમ્મસ્સ આરમ્મણપચ્ચયેન પચ્ચયો – અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, સેક્ખં ફલં પચ્ચવેક્ખન્તિ, ચેતોપરિયઞાણેન સેક્ખચિત્તસમઙ્ગિસ્સ ચિત્તં જાનન્તિ, સેક્ખા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અસેક્ખો ધમ્મો નેવસેક્ખનાસેક્ખસ્સ ધમ્મસ્સ આરમ્મણપચ્ચયેન પચ્ચયો – અરહા અસેક્ખં ફલં પચ્ચવેક્ખતિ, ચેતોપરિયઞાણેન અસેક્ખચિત્તસમઙ્ગિસ્સ ચિત્તં જાનાતિ, અસેક્ખા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

૪૪. નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ…પે… ઝાના વુટ્ઠહિત્વા ઝાનં પચ્ચવેક્ખતિ, અરિયા નિબ્બાનં પચ્ચવેક્ખન્તિ. નિબ્બાનં ગોત્રભુસ્સ, વોદાનસ્સ, આવજ્જનાય આરમ્મણપચ્ચયેન પચ્ચયો. અરિયા પહીને કિલેસે પચ્ચવેક્ખન્તિ વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ, ચક્ખું અનિચ્ચતો દુક્ખતો અનત્તતો વિપસ્સન્તિ, અસ્સાદેન્તિ અભિનન્દન્તિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ, સોતં…પે… વત્થું નેવસેક્ખનાસેક્ખે ખન્ધે અનિચ્ચતો દુક્ખતો અનત્તતો વિપસ્સન્તિ, અસ્સાદેન્તિ…પે… દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન નેવસેક્ખનાસેક્ખચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ આરમ્મણપચ્ચયેન પચ્ચયો. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… નેવસેક્ખનાસેક્ખા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

નેવસેક્ખનાસેક્ખો ધમ્મો સેક્ખસ્સ ધમ્મસ્સ આરમ્મણપચ્ચયેન પચ્ચયો – નિબ્બાનં મગ્ગસ્સ, સેક્ખસ્સ ફલસ્સ આરમ્મણપચ્ચયેન પચ્ચયો. (૨)

નેવસેક્ખનાસેક્ખો ધમ્મો અસેક્ખસ્સ ધમ્મસ્સ આરમ્મણપચ્ચયેન પચ્ચયો – નિબ્બાનં અસેક્ખસ્સ ફલસ્સ આરમ્મણપચ્ચયેન પચ્ચયો. (૩)

અધિપતિપચ્ચયો

૪૫. સેક્ખો ધમ્મો સેક્ખસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – સેક્ખાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

સેક્ખો ધમ્મો નેવસેક્ખનાસેક્ખસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ, સહજાતાધિપતિ. આરમ્મણાધિપતિ – અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ, સેક્ખં ફલં ગરું કત્વા પચ્ચવેક્ખન્તિ. સહજાતાધિપતિ – સેક્ખાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

સેક્ખો ધમ્મો સેક્ખસ્સ ચ નેવસેક્ખનાસેક્ખસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – સેક્ખાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૪૬. અસેક્ખો ધમ્મો અસેક્ખસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અસેક્ખાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

અસેક્ખો ધમ્મો નેવસેક્ખનાસેક્ખસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરહા અસેક્ખં ફલં ગરું કત્વા પચ્ચવેક્ખતિ. સહજાતાધિપતિ – અસેક્ખાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

અસેક્ખો ધમ્મો અસેક્ખસ્સ ચ નેવસેક્ખનાસેક્ખસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અસેક્ખાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૪૭. નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા પચ્ચવેક્ખતિ, પુબ્બે સુચિણ્ણાનિ ગરું કત્વા પચ્ચવેક્ખતિ, ઝાના વુટ્ઠહિત્વા ઝાનં ગરું કત્વા પચ્ચવેક્ખતિ, અરિયા નિબ્બાનં ગરું કત્વા પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ અધિપતિપચ્ચયેન પચ્ચયો. ચક્ખું ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સોતં…પે… વત્થું નેવસેક્ખનાસેક્ખે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – નેવસેક્ખનાસેક્ખાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

નેવસેક્ખનાસેક્ખો ધમ્મો સેક્ખસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – નિબ્બાનં મગ્ગસ્સ, સેક્ખસ્સ ફલસ્સ અધિપતિપચ્ચયેન પચ્ચયો. (૨)

નેવસેક્ખનાસેક્ખો ધમ્મો અસેક્ખસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – નિબ્બાનં અસેક્ખસ્સ ફલસ્સ અધિપતિપચ્ચયેન પચ્ચયો. (૩)

અનન્તરપચ્ચયો

૪૮. સેક્ખો ધમ્મો સેક્ખસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા સેક્ખા ખન્ધા પચ્છિમાનં પચ્છિમાનં સેક્ખાનં ખન્ધાનં અનન્તરપચ્ચયેન પચ્ચયો. મગ્ગો સેક્ખસ્સ ફલસ્સ… સેક્ખં ફલં સેક્ખસ્સ ફલસ્સ અનન્તરપચ્ચયેન પચ્ચયો. (૧)

સેક્ખો ધમ્મો અસેક્ખસ્સ ધમ્મસ્સ અનન્તરપચ્ચયેન પચ્ચયો – મગ્ગો અસેક્ખસ્સ ફલસ્સ અનન્તરપચ્ચયેન પચ્ચયો. (૨)

સેક્ખો ધમ્મો નેવસેક્ખનાસેક્ખસ્સ ધમ્મસ્સ અનન્તરપચ્ચયેન પચ્ચયો – સેક્ખં ફલં વુટ્ઠાનસ્સ અનન્તરપચ્ચયેન પચ્ચયો. (૩)

૪૯. અસેક્ખો ધમ્મો અસેક્ખસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અસેક્ખા ખન્ધા પચ્છિમાનં પચ્છિમાનં અસેક્ખાનં ખન્ધાનં અનન્તરપચ્ચયેન પચ્ચયો. અસેક્ખં ફલં અસેક્ખસ્સ ફલસ્સ અનન્તરપચ્ચયેન પચ્ચયો. (૧)

અસેક્ખો ધમ્મો નેવસેક્ખનાસેક્ખસ્સ ધમ્મસ્સ અનન્તરપચ્ચયેન પચ્ચયો – અસેક્ખં ફલં વુટ્ઠાનસ્સ અનન્તરપચ્ચયેન પચ્ચયો. (૨)

૫૦. નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા નેવસેક્ખનાસેક્ખા ખન્ધા પચ્છિમાનં પચ્છિમાનં નેવસેક્ખનાસેક્ખાનં ખન્ધાનં…પે… અનુલોમં ગોત્રભુસ્સ… અનુલોમં વોદાનસ્સ… આવજ્જના નેવસેક્ખનાસેક્ખાનં ખન્ધાનં અનન્તરપચ્ચયેન પચ્ચયો. (૧)

નેવસેક્ખનાસેક્ખો ધમ્મો સેક્ખસ્સ ધમ્મસ્સ અનન્તરપચ્ચયેન પચ્ચયો – ગોત્રભુ મગ્ગસ્સ… વોદાનં મગ્ગસ્સ… અનુલોમં સેક્ખાય ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકુસલં સેક્ખાય ફલસમાપત્તિયા અનન્તરપચ્ચયેન પચ્ચયો. (૨)

નેવસેક્ખનાસેક્ખો ધમ્મો અસેક્ખસ્સ ધમ્મસ્સ અનન્તરપચ્ચયેન પચ્ચયો – અનુલોમં અસેક્ખાય ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકિરિયં અસેક્ખાય ફલસમાપત્તિયા અનન્તરપચ્ચયેન પચ્ચયો. (૩)

સમનન્તરપચ્ચયો

૫૧. સેક્ખો ધમ્મો સેક્ખસ્સ ધમ્મસ્સ સમનન્તરપચ્ચયેન પચ્ચયો…પે… (અનન્તરસદિસં, અટ્ઠ પઞ્હા).

સહજાતપચ્ચયાદિ

૫૨. સેક્ખો ધમ્મો સેક્ખસ્સ ધમ્મસ્સ સહજાતપચ્ચયેન પચ્ચયો…પે… (પટિચ્ચવારે સહજાતસદિસં, નવ પઞ્હા) અઞ્ઞમઞ્ઞપચ્ચયેન પચ્ચયો (પટિચ્ચવારે અઞ્ઞમઞ્ઞસદિસં, તીણિ. નિસ્સયપચ્ચયે કુસલત્તિકે નિસ્સયપચ્ચયસદિસં, તેરસ પઞ્હા).

ઉપનિસ્સયપચ્ચયો

૫૩. સેક્ખો ધમ્મો સેક્ખસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પઠમો મગ્ગો દુતિયસ્સ મગ્ગસ્સ ઉપનિસ્સયપચ્ચયેન પચ્ચયો. દુતિયો મગ્ગો તતિયસ્સ મગ્ગસ્સ ઉપનિસ્સયપચ્ચયેન પચ્ચયો. તતિયો મગ્ગો ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. મગ્ગો સેક્ખાય ફલસમાપત્તિયા ઉપનિસ્સયપચ્ચયેન પચ્ચયો. (૧)

સેક્ખો ધમ્મો અસેક્ખસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – મગ્ગો અસેક્ખાય ફલસમાપત્તિયા ઉપનિસ્સયપચ્ચયેન પચ્ચયો. (૨)

સેક્ખો ધમ્મો નેવસેક્ખનાસેક્ખસ્સ ધમ્મસ્સ ઉપનિસ્સયપચ્ચયેન પચ્ચય – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અરિયા મગ્ગં ઉપનિસ્સાય અનુપ્પન્નં કુસલસમાપત્તિં ઉપ્પાદેન્તિ, ઉપ્પન્નં સમાપજ્જન્તિ, સઙ્ખારે અનિચ્ચતો…પે… વિપસ્સન્તિ, મગ્ગો અરિયાનં અત્થપ્પટિસમ્ભિદાય…પે… પટિભાનપ્પટિસમ્ભિદાય… ઠાનાઠાનકોસલ્લસ્સ ઉપનિસ્સયપચ્ચયેન પચ્ચયો. સેક્ખા ફલસમાપત્તિયા કાયિકસ્સ સુખસ્સ ઉપનિસ્સયપચ્ચયેન પચ્ચયો. (૩)

૫૪. અસેક્ખો ધમ્મો અસેક્ખસ્સ ધમ્મસ્સ ઉપનિસ્સયપચ્ચયેન પચ્ચયો. અનન્તરૂપનિસ્સયો – પુરિમા પુરિમા અસેક્ખા ખન્ધા પચ્છિમાનં પચ્છિમાનં અસેક્ખાનં ખન્ધાનં…પે… અસેક્ખં ફલં અસેક્ખસ્સ ફલસ્સ ઉપનિસ્સયપચ્ચયેન પચ્ચયો. (૧)

અસેક્ખો ધમ્મો નેવસેક્ખનાસેક્ખસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અસેક્ખા ફલસમાપત્તિ કાયિકસ્સ સુખસ્સ ઉપનિસ્સયપચ્ચયેન પચ્ચયો. (૨)

૫૫. નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – નેવસેક્ખનાસેક્ખં સદ્ધં ઉપનિસ્સાય દાનં દેતિ. સીલં…પે… ઉપોસથકમ્મં…પે… ઝાનં…પે… વિપસ્સનં…પે… અભિઞ્ઞં…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ. નેવસેક્ખનાસેક્ખં સીલં…પે… પઞ્ઞં… રાગં…પે… પત્થનં… કાયિકં સુખં…પે… ઉતું… ભોજનં… સેનાસનં ઉપનિસ્સાય દાનં દેતિ, સીલં…પે… સમાપત્તિં ઉપ્પાદેતિ, પાણં હનતિ…પે… સઙ્ઘં ભિન્દતિ. નેવસેક્ખનાસેક્ખા સદ્ધા…પે… પઞ્ઞા, રાગો…પે… પત્થના, કાયિકં સુખં…પે… સેનાસનં નેવસેક્ખનાસેક્ખાય સદ્ધાય…પે… પઞ્ઞાય, રાગસ્સ…પે… પત્થનાય, કાયિકસ્સ સુખસ્સ, કાયિકસ્સ દુક્ખસ્સ ઉપનિસ્સયપચ્ચયેન પચ્ચયો. પઠમસ્સ ઝાનસ્સ પરિકમ્મં પઠમસ્સ ઝાનસ્સ ઉપનિસ્સયપચ્ચયેન પચ્ચયો…પે… નેવસઞ્ઞાનાસઞ્ઞાયતનસ્સ પરિકમ્મં નેવસઞ્ઞાનાસઞ્ઞાયતનસ્સ…પે… પઠમં ઝાનં દુતિયસ્સ ઝાનસ્સ ઉપનિસ્સયપચ્ચયેન પચ્ચયો…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. (૧)

નેવસેક્ખનાસેક્ખો ધમ્મો સેક્ખસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પઠમસ્સ મગ્ગસ્સ પરિકમ્મં પઠમસ્સ મગ્ગસ્સ ઉપનિસ્સયપચ્ચયેન પચ્ચયો…પે… ચતુત્થસ્સ મગ્ગસ્સ પરિકમ્મં ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. (૨)

નેવસેક્ખનાસેક્ખો ધમ્મો અસેક્ખસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – કાયિકં સુખં… કાયિકં દુક્ખં… ઉતું… ભોજનં… સેનાસનં અસેક્ખાય ફલસમાપત્તિયા ઉપનિસ્સયપચ્ચયેન પચ્ચયો. (૩)

પુરેજાતપચ્ચયો

૫૬. નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું અનિચ્ચતો…પે… વિપસ્સતિ, અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ. સોતં…પે… વત્થું અનિચ્ચતો દુક્ખતો અનત્તતો વિપસ્સતિ…પે… દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ, વત્થુ નેવસેક્ખનાસેક્ખાનં ખન્ધાનં પુરેજાતપચ્ચયેન પચ્ચયો. (૧)

નેવસેક્ખનાસેક્ખો ધમ્મો સેક્ખસ્સ ધમ્મસ્સ પુરેજાતપચ્ચયેન પચ્ચયો. વત્થુપુરેજાતં – વત્થુ સેક્ખાનં ખન્ધાનં પુરેજાતપચ્ચયેન પચ્ચયો. (૨)

નેવસેક્ખનાસેક્ખો ધમ્મો અસેક્ખસ્સ ધમ્મસ્સ પુરેજાતપચ્ચયેન પચ્ચયો. વત્થુપુરેજાતં – વત્થુ અસેક્ખાનં ખન્ધાનં પુરેજાતપચ્ચયેન પચ્ચયો. (૩)

પચ્છાજાતપચ્ચયો

૫૭. સેક્ખો ધમ્મો નેવસેક્ખનાસેક્ખસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા સેક્ખા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

અસેક્ખો ધમ્મો નેવસેક્ખનાસેક્ખસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા અસેક્ખા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા નેવસેક્ખનાસેક્ખા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

આસેવનપચ્ચયો

૫૮. નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા નેવસેક્ખનાસેક્ખા ખન્ધા પચ્છિમાનં પચ્છિમાનં નેવસેક્ખનાસેક્ખાનં ખન્ધાનં આસેવનપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ આસેવનપચ્ચયેન પચ્ચયો. (૧)

નેવસેક્ખનાસેક્ખો ધમ્મો સેક્ખસ્સ ધમ્મસ્સ આસેવનપચ્ચયેન પચ્ચયો – ગોત્રભુ મગ્ગસ્સ… વોદાનં મગ્ગસ્સ આસેવનપચ્ચયેન પચ્ચયો. (૨)

કમ્મપચ્ચયો

૫૯. સેક્ખો ધમ્મો સેક્ખસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – સેક્ખા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. નાનાક્ખણિકા – સેક્ખા ચેતના વિપાકાનં સેક્ખાનં ખન્ધાનં કમ્મપચ્ચયેન પચ્ચયો. (૧)

સેક્ખો ધમ્મો અસેક્ખસ્સ ધમ્મસ્સ કમ્મપચ્ચયેન પચ્ચયો. નાનાક્ખણિકા – સેક્ખા ચેતના અસેક્ખાનં ખન્ધાનં કમ્મપચ્ચયેન પચ્ચયો. (૨)

સેક્ખો ધમ્મો નેવસેક્ખનાસેક્ખસ્સ ધમ્મસ્સ કમ્મપચ્ચયેન પચ્ચયો. સહજાતા – સેક્ખા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. (૩)

સેક્ખો ધમ્મો સેક્ખસ્સ ચ નેવસેક્ખનાસેક્ખસ્સ ચ ધમ્મસ્સ કમ્મપચ્ચયેન પચ્ચયો – સેક્ખા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૪)

૬૦. અસેક્ખો ધમ્મો અસેક્ખસ્સ ધમ્મસ્સ કમ્મપચ્ચયેન પચ્ચયો – અસેક્ખા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

અસેક્ખો ધમ્મો નેવસેક્ખનાસેક્ખસ્સ ધમ્મસ્સ કમ્મપચ્ચયેન પચ્ચયો – અસેક્ખા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. (૨)

અસેક્ખો ધમ્મો અસેક્ખસ્સ ચ નેવસેક્ખનાસેક્ખસ્સ ચ ધમ્મસ્સ કમ્મપચ્ચયેન પચ્ચયો – અસેક્ખા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

૬૧. નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – નેવસેક્ખનાસેક્ખા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. પટિસન્ધિક્ખણે…પે…. નાનાક્ખણિકા – નેવસેક્ખનાસેક્ખા ચેતના વિપાકાનં નેવસેક્ખનાસેક્ખાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

વિપાકપચ્ચયો

૬૨. સેક્ખો ધમ્મો સેક્ખસ્સ ધમ્મસ્સ વિપાકપચ્ચયેન પચ્ચયો – વિપાકો સેક્ખો એકો ખન્ધો તિણ્ણન્નં ખન્ધાનં…પે… (સેક્ખમૂલકે તીણિ ).

અસેક્ખો ધમ્મો અસેક્ખસ્સ ધમ્મસ્સ વિપાકપચ્ચયેન પચ્ચયો – અસેક્ખો એકો ખન્ધો તિણ્ણન્નં ખન્ધાનં…પે… (અસેક્ખમૂલકે તીણિ).

નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ વિપાકપચ્ચયેન પચ્ચયો – વિપાકો નેવસેક્ખનાસેક્ખો એકો ખન્ધો તિણ્ણન્નં ખન્ધાનં…પે… પટિસન્ધિક્ખણે…પે… ખન્ધા વત્થુસ્સ વિપાકપચ્ચયેન પચ્ચયો. (૧)

આહારપચ્ચયાદિ

૬૩. સેક્ખો ધમ્મો સેક્ખસ્સ ધમ્મસ્સ આહારપચ્ચયેન પચ્ચયો… ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો… મગ્ગપચ્ચયેન પચ્ચયો… સમ્પયુત્તપચ્ચયેન પચ્ચયો…પે….

વિપ્પયુત્તપચ્ચયો

૬૪. સેક્ખો ધમ્મો નેવસેક્ખનાસેક્ખસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – સેક્ખા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – સેક્ખા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો (૧).

અસેક્ખો ધમ્મો નેવસેક્ખનાસેક્ખસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં (સેક્ખસદિસં).

નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં. સહજાતા – નેવસેક્ખનાસેક્ખા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પટિસન્ધિક્ખણે નેવસેક્ખનાસેક્ખા ખન્ધા કટત્તારૂપાનં વિપ્પયુત્તપચ્ચયેન પચ્ચયો. ખન્ધા વત્થુસ્સ વિપ્પયુત્તપચ્ચયેન પચ્ચયો. વત્થુ ખન્ધાનં વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ, વત્થુ નેવસેક્ખનાસેક્ખાનં ખન્ધાનં વિપ્પયુત્તપચ્ચયેન પચ્ચયો. પચ્છાજાતા – નેવસેક્ખનાસેક્ખા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

નેવસેક્ખનાસેક્ખો ધમ્મો સેક્ખસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ સેક્ખાનં ખન્ધાનં વિપ્પયુત્તપચ્ચયેન પચ્ચયો. (૨)

નેવસેક્ખનાસેક્ખો ધમ્મો અસેક્ખસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ અસેક્ખાનં ખન્ધાનં વિપ્પયુત્તપચ્ચયેન પચ્ચયો. (૩)

અત્થિપચ્ચયો

૬૫. સેક્ખો ધમ્મો સેક્ખસ્સ ધમ્મસ્સ અત્થિપચ્ચયેન પચ્ચયો – સેક્ખો એકો ખન્ધો તિણ્ણન્નં ખન્ધાનં…પે…. (૧)

સેક્ખો ધમ્મો નેવસેક્ખનાસેક્ખસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં. સહજાતા – સેક્ખા ખન્ધા ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – સેક્ખા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. (૨)

સેક્ખો ધમ્મો સેક્ખસ્સ ચ નેવસેક્ખનાસેક્ખસ્સ ચ ધમ્મસ્સ અત્થિપચ્ચયેન પચ્ચયો – સેક્ખો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે…. (૩)

અસેક્ખો ધમ્મો અસેક્ખસ્સ ધમ્મસ્સ અત્થિપચ્ચયેન પચ્ચયો…પે… તીણિ (સેક્ખસદિસં).

૬૬. નેવસેક્ખનાસેક્ખો ધમ્મો નેવસેક્ખનાસેક્ખસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતો – નેવસેક્ખનાસેક્ખો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે… ખન્ધા વત્થુસ્સ અત્થિપચ્ચયેન પચ્ચયો. વત્થુ ખન્ધાનં અત્થિપચ્ચયેન પચ્ચયો, એકં મહાભૂતં…પે… બાહિરં…પે… અસઞ્ઞસત્તાનં…પે…. પુરેજાતં – ચક્ખું અનિચ્ચતો દુક્ખતો અનત્તતો વિપસ્સતિ; અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ. સોતં…પે… વત્થું અનિચ્ચતો…પે… વિપસ્સતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ… વત્થુ નેવસેક્ખનાસેક્ખાનં ખન્ધાનં અત્થિપચ્ચયેન પચ્ચયો. પચ્છાજાતા – નેવસેક્ખનાસેક્ખા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. કબળીકારો આહારો ઇમસ્સ કાયસ્સ અત્થિપચ્ચયેન પચ્ચયો. રૂપજીવિતિન્દ્રિયં કટત્તારૂપાનં અત્થિપચ્ચયેન પચ્ચયો. (૧)

નેવસેક્ખનાસેક્ખો ધમ્મો સેક્ખસ્સ ધમ્મસ્સ અત્થિપચ્ચયેન પચ્ચયો. પુરેજાતં – વત્થુ સેક્ખાનં ખન્ધાનં અત્થિપચ્ચયેન પચ્ચયો. (૨)

નેવસેક્ખનાસેક્ખો ધમ્મો અસેક્ખસ્સ ધમ્મસ્સ અત્થિપચ્ચયેન પચ્ચયો. પુરેજાતં – વત્થુ અસેક્ખાનં ખન્ધાનં અત્થિપચ્ચયેન પચ્ચયો. (૩)

૬૭. સેક્ખો ચ નેવસેક્ખનાસેક્ખો ચ ધમ્મા સેક્ખસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – સેક્ખો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા…પે…. (૧)

સેક્ખો ચ નેવસેક્ખનાસેક્ખો ચ ધમ્મા નેવસેક્ખનાસેક્ખસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – સેક્ખા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – સેક્ખા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – સેક્ખા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

અસેક્ખો ચ નેવસેક્ખનાસેક્ખો ચ ધમ્મા અસેક્ખસ્સ ધમ્મસ્સ અત્થિપચ્ચયેન પચ્ચયો…પે… (દ્વે પઞ્હા કાતબ્બા, સેક્ખસદિસા).