૧. વિભઙ્ગવારો

હેતુપચ્ચયો

૪૫. આચયગામી [આચયગામિ (સી. સ્યા.) એવમુપરિપિ] ધમ્મો આચયગામિસ્સ ધમ્મસ્સ હેતુપચ્ચયેન પચ્ચયો – આચયગામી હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

આચયગામી ધમ્મો નેવાચયગામિનાપચયગામિસ્સ ધમ્મસ્સ હેતુપચ્ચયેન પચ્ચયો – આચયગામી હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૨)

આચયગામી ધમ્મો આચયગામિસ્સ ચ નેવાચયગામિનાપચયગામિસ્સ ચ ધમ્મસ્સ હેતુપચ્ચયેન પચ્ચયો – આચયગામી હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

અપચયગામી ધમ્મો અપચયગામિસ્સ ધમ્મસ્સ હેતુપચ્ચયેન પચ્ચયો… તીણિ.

નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ હેતુપચ્ચયેન પચ્ચયો – નેવાચયગામિનાપચયગામી હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. પટિસન્ધિક્ખણે નેવાચયગામિનાપચયગામી હેતૂ સમ્પયુત્તકાનં ખન્ધાનં કટત્તા ચ રૂપાનં હેતુપચ્ચયેન પચ્ચયો. (૧)

આરમ્મણપચ્ચયો

૪૬. આચયગામી ધમ્મો આચયગામિસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, ઝાના વુટ્ઠહિત્વા ઝાનં પચ્ચવેક્ખતિ. સેક્ખા પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ. સેક્ખા વા પુથુજ્જના વા આચયગામી ખન્ધે અનિચ્ચતો દુક્ખતો અનત્તતો વિપસ્સન્તિ, અસ્સાદેન્તિ અભિનન્દન્તિ, તં આરબ્ભ રાગો ઉપ્પજ્જતિ, દિટ્ઠિ…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ, ચેતોપરિયઞાણેન આચયગામિચિત્તસમઙ્ગિસ્સ ચિત્તં જાનન્તિ, આકાસાનઞ્ચાયતનકુસલં વિઞ્ઞાણઞ્ચાયતનકુસલસ્સ આરમ્મણપચ્ચયેન પચ્ચયો. આકિઞ્ચઞ્ઞાયતનકુસલં નેવસઞ્ઞાનાસઞ્ઞાયતનકુસલસ્સ…પે… આચયગામી ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ આરમ્મણપચ્ચયેન પચ્ચયો. (૧)

આચયગામી ધમ્મો નેવાચયગામિનાપચયગામિસ્સ ધમ્મસ્સ આરમ્મણપચ્ચયેન પચ્ચયો – અરહા પહીને કિલેસે પચ્ચવેક્ખતિ, પુબ્બે સમુદાચિણ્ણે કિલેસે જાનાતિ, આચયગામી ખન્ધે અનિચ્ચતો દુક્ખતો અનત્તતો વિપસ્સતિ; ચેતોપરિયઞાણેન આચયગામિચિત્તસમઙ્ગિસ્સ ચિત્તં જાનાતિ. સેક્ખા વા પુથુજ્જના વા આચયગામી ખન્ધે અનિચ્ચતો દુક્ખતો અનત્તતો વિપસ્સન્તિ, કુસલે નિરુદ્ધે વિપાકો તદારમ્મણતા ઉપ્પજ્જતિ, આચયગામી ખન્ધે અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ, અકુસલે નિરુદ્ધે વિપાકો તદારમ્મણતા ઉપ્પજ્જતિ, આકાસાનઞ્ચાયતનકુસલં વિઞ્ઞાણઞ્ચાયતનવિપાકસ્સ ચ કિરિયસ્સ ચ આરમ્મણપચ્ચયેન પચ્ચયો. આકિઞ્ચઞ્ઞાયતનકુસલં નેવસઞ્ઞાનાસઞ્ઞાયતનવિપાકસ્સ ચ કિરિયસ્સ ચ આરમ્મણપચ્ચયેન પચ્ચયો. આચયગામી ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૪૭. અપચયગામી ધમ્મો આચયગામિસ્સ ધમ્મસ્સ આરમ્મણપચ્ચયેન પચ્ચયો – સેક્ખા મગ્ગા વુટ્ઠહિત્વા મગ્ગં પચ્ચવેક્ખન્તિ, ચેતોપરિયઞાણેન અપચયગામિચિત્તસમઙ્ગિસ્સ ચિત્તં જાનન્તિ, અપચયગામી ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આરમ્મણપચ્ચયેન પચ્ચયો. (૧)

અપચયગામી ધમ્મો નેવાચયગામિનાપચયગામિસ્સ ધમ્મસ્સ આરમ્મણપચ્ચયેન પચ્ચયો – અરહા મગ્ગા વુટ્ઠહિત્વા મગ્ગં પચ્ચવેક્ખતિ, ચેતોપરિયઞાણેન અપચયગામિચિત્તસમઙ્ગિસ્સ ચિત્તં જાનાતિ, અપચયગામી ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૪૮. નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ આરમ્મણપચ્ચયેન પચ્ચયો – અરહા ફલં પચ્ચવેક્ખતિ, નિબ્બાનં પચ્ચવેક્ખતિ, નિબ્બાનં ફલસ્સ આવજ્જનાય આરમ્મણપચ્ચયેન પચ્ચયો. અરહા ચક્ખું અનિચ્ચતો દુક્ખતો અનત્તતો વિપસ્સતિ, સોતં…પે… વત્થું… નેવાચયગામિનાપચયગામી ખન્ધે અનિચ્ચતો દુક્ખતો અનત્તતો વિપસ્સતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન નેવાચયગામિનાપચયગામિચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનકિરિયં વિઞ્ઞાણઞ્ચાયતનકિરિયસ્સ આરમ્મણપચ્ચયેન પચ્ચયો. આકિઞ્ચઞ્ઞાયતનકિરિયં નેવસઞ્ઞાનાસઞ્ઞાયતનકિરિયસ્સ…પે… રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… નેવાચયગામિનાપચયગામી ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ આવજ્જનાય આરમ્મણપચ્ચયેન પચ્ચયો. (૧)

નેવાચયગામિનાપચયગામી ધમ્મો આચયગામિસ્સ ધમ્મસ્સ આરમ્મણપચ્ચયેન પચ્ચયો – સેક્ખા ફલં પચ્ચવેક્ખન્તિ, નિબ્બાનં પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ આરમ્મણપચ્ચયેન પચ્ચયો. સેક્ખા વા પુથુજ્જના વા ચક્ખું અનિચ્ચતો દુક્ખતો અનત્તતો વિપસ્સન્તિ, અસ્સાદેન્તિ અભિનન્દન્તિ; તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ. સોતં…પે… વત્થું… નેવાચયગામિનાપચયગામી ખન્ધે અનિચ્ચતો દુક્ખતો અનત્તતો વિપસ્સન્તિ, અસ્સાદેન્તિ અભિનન્દન્તિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા…પે… ઉદ્ધચ્ચં…પે… દોમનસ્સં…પે… દિબ્બેન ચક્ખુના રૂપં પસ્સન્તિ, દિબ્બાય સોતધાતુયા સદ્દં સુણન્તિ, ચેતોપરિયઞાણેન નેવાચયગામિનાપચયગામિચિત્તસમઙ્ગિસ્સ ચિત્તં જાનન્તિ, નેવાચયગામિનાપચયગામી ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ આરમ્મણપચ્ચયેન પચ્ચયો. (૨)

નેવાચયગામિનાપચયગામી ધમ્મો અપચયગામિસ્સ ધમ્મસ્સ આરમ્મણપચ્ચયેન પચ્ચયો – નિબ્બાનં મગ્ગસ્સ આરમ્મણપચ્ચયેન પચ્ચયો. (૩)

અધિપતિપચ્ચયો

૪૯. આચયગામી ધમ્મો આચયગામિસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા પચ્ચવેક્ખતિ, પુબ્બે સુચિણ્ણાનિ ગરું કત્વા પચ્ચવેક્ખતિ, ઝાના વુટ્ઠહિત્વા ઝાનં ગરું કત્વા પચ્ચવેક્ખતિ, આચયગામી ખન્ધે ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – આચયગામી અધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

આચયગામી ધમ્મો નેવાચયગામિનાપચયગામિસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – આચયગામી અધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

આચયગામી ધમ્મો આચયગામિસ્સ ચ નેવાચયગામિનાપચયગામિસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – આચયગામી અધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૫૦. અપચયગામી ધમ્મો અપચયગામિસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અપચયગામી અધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

અપચયગામી ધમ્મો આચયગામિસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – સેક્ખા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ. (૨)

અપચયગામી ધમ્મો નેવાચયગામિનાપચયગામિસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરહા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખતિ. સહજાતાધિપતિ – અપચયગામી અધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૩)

અપચયગામી ધમ્મો અપચયગામિસ્સ ચ નેવાચયગામિનાપચયગામિસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અપચયગામી અધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૪)

૫૧. નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરહા ફલં ગરું કત્વા પચ્ચવેક્ખતિ, નિબ્બાનં ગરું કત્વા પચ્ચવેક્ખતિ, નિબ્બાનં ફલસ્સ અધિપતિપચ્ચયેન પચ્ચયો. સહજાતાધિપતિ – નેવાચયગામિનાપચયગામી અધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

નેવાચયગામિનાપચયગામી ધમ્મો આચયગામિસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – સેક્ખા ફલં ગરું કત્વા પચ્ચવેક્ખન્તિ, નિબ્બાનં ગરું કત્વા પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ અધિપતિપચ્ચયેન પચ્ચયો. ચક્ખું ગરું કત્વા અસ્સાદેતિ…પે… વત્થું… નેવાચયગામિનાપચયગામી ખન્ધે ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૨)

નેવાચયગામિનાપચયગામી ધમ્મો અપચયગામિસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – નિબ્બાનં મગ્ગસ્સ અધિપતિપચ્ચયેન પચ્ચયો. (૩)

અનન્તરપચ્ચયો

૫૨. આચયગામી ધમ્મો આચયગામિસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા આચયગામી ખન્ધા પચ્છિમાનં પચ્છિમાનં આચયગામીનં ખન્ધાનં અનન્તરપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ અનન્તરપચ્ચયેન પચ્ચયો. (૧)

આચયગામી ધમ્મો અપચયગામિસ્સ ધમ્મસ્સ અનન્તરપચ્ચયેન પચ્ચયો – ગોત્રભુ મગ્ગસ્સ… વોદાનં મગ્ગસ્સ અનન્તરપચ્ચયેન પચ્ચયો. (૨)

આચયગામી ધમ્મો નેવાચયગામિનાપચયગામિસ્સ ધમ્મસ્સ અનન્તરપચ્ચયેન પચ્ચયો – આચયગામી ખન્ધા વુટ્ઠાનસ્સ અનન્તરપચ્ચયેન પચ્ચયો. સેક્ખાનં અનુલોમં ફલસમાપત્તિયા, નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકુસલં ફલસમાપત્તિયા અનન્તરપચ્ચયેન પચ્ચયો. (૩)

અપચયગામી ધમ્મો નેવાચયગામિનાપચયગામિસ્સ ધમ્મસ્સ અનન્તરપચ્ચયેન પચ્ચયો – મગ્ગો ફલસ્સ અનન્તરપચ્ચયેન પચ્ચયો. (૧)

નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા નેવાચયગામિનાપચયગામી ખન્ધા પચ્છિમાનં પચ્છિમાનં નેવાચયગામિનાપચયગામીનં ખન્ધાનં અનન્તરપચ્ચયેન પચ્ચયો. ભવઙ્ગં આવજ્જનાય… કિરિયં વુટ્ઠાનસ્સ… અરહતો અનુલોમં ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકિરિયં ફલસમાપત્તિયા અનન્તરપચ્ચયેન પચ્ચયો. (૧)

નેવાચયગામિનાપચયગામી ધમ્મો આચયગામિસ્સ ધમ્મસ્સ અનન્તરપચ્ચયેન પચ્ચયો – આવજ્જના આચયગામીનં ખન્ધાનં અનન્તરપચ્ચયેન પચ્ચયો. (૨)

સમનન્તરપચ્ચયાદિ

૫૩. આચયગામી ધમ્મો આચયગામિસ્સ ધમ્મસ્સ સમનન્તરપચ્ચયેન પચ્ચયો…પે… (અનન્તરસદિસં). (સહજાતપચ્ચયે પટિચ્ચવારે સહજાતવારસદિસા નવ પઞ્હા. અઞ્ઞમઞ્ઞપચ્ચયે પટિચ્ચવારે અઞ્ઞમઞ્ઞસદિસં તીણિ. નિસ્સયપચ્ચયે પચ્ચયવારે નિસ્સયવારસદિસં. ચત્તારિપિ હિ વિસું ઘટના નત્થિ. તેરસ પઞ્હા.)

ઉપનિસ્સયપચ્ચયો

૫૪. આચયગામી ધમ્મો આચયગામિસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – આચયગામિં સદ્ધં ઉપનિસ્સાય દાનં દેતિ, સીલં…પે… ઉપોસથકમ્મં…પે… ઝાનં…પે… વિપસ્સનં…પે… અભિઞ્ઞં…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ, આચયગામિં સીલં… સુતં… ચાગં… પઞ્ઞં… રાગં… દોસં… મોહં… માનં… દિટ્ઠિં… પત્થનં ઉપનિસ્સાય દાનં દેતિ. સીલં…પે… ઉપોસથકમ્મં…પે… ઝાનં…પે… વિપસ્સનં…પે… અભિઞ્ઞં…પે… સમાપત્તિં…પે… પાણં હનતિ…પે… સઙ્ઘં ભિન્દતિ. આચયગામી સદ્ધા…પે… પઞ્ઞા, રાગો…પે… પત્થના આચયગામિયા સદ્ધાય…પે… પઞ્ઞાય, રાગસ્સ…પે… પત્થનાય ઉપનિસ્સયપચ્ચયેન પચ્ચયો. પઠમસ્સ ઝાનસ્સ પરિકમ્મં પઠમસ્સ ઝાનસ્સ ઉપનિસ્સયપચ્ચયેન પચ્ચયો…પે…. નેવસઞ્ઞાનાસઞ્ઞાયતનસ્સ પરિકમ્મં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. પઠમં ઝાનં દુતિયસ્સ ઝાનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. (૧)

આચયગામી ધમ્મો અપચયગામિસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પઠમસ્સ મગ્ગસ્સ પરિકમ્મં પઠમસ્સ મગ્ગસ્સ…પે… ચતુત્થસ્સ મગ્ગસ્સ પરિકમ્મં ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. (૨)

આચયગામી ધમ્મો નેવાચયગામિનાપચયગામિસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – આચયગામિં સદ્ધં ઉપનિસ્સાય અત્તાનં આતાપેતિ પરિતાપેતિ પરિયિટ્ઠિમૂલકં દુક્ખં પચ્ચનુભોતિ. આચયગામિં સીલં…પે… પઞ્ઞં. રાગં…પે… પત્થનં ઉપનિસ્સાય અત્તાનં આતાપેતિ પરિતાપેતિ પરિયિટ્ઠિમૂલકં દુક્ખં પચ્ચનુભોતિ. આચયગામી સદ્ધા…પે… પઞ્ઞા. રાગો…પે… પત્થના, કાયિકસ્સ સુખસ્સ, કાયિકસ્સ દુક્ખસ્સ ફલસમાપત્તિયા ઉપનિસ્સયપચ્ચયેન પચ્ચયો. કુસલાકુસલં કમ્મં વિપાકસ્સ ઉપનિસ્સયપચ્ચયેન પચ્ચયો. (૩)

૫૫. અપચયગામી ધમ્મો અપચયગામિસ્સ ધમ્મસ્સ ઉપનિસ્સયપચ્ચયેન પચ્ચયો. પકતૂપનિસ્સયો – પઠમો મગ્ગો દુતિયસ્સ મગ્ગસ્સ…પે… તતિયો મગ્ગો ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. (૧)

અપચયગામી ધમ્મો આચયગામિસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, પકતૂપનિસ્સયો…પે…. પકતૂપનિસ્સયો – સેક્ખા મગ્ગં ઉપનિસ્સાય અનુપ્પન્નં કુસલસમાપત્તિં ઉપ્પાદેન્તિ, ઉપ્પન્નં સમાપજ્જન્તિ, સઙ્ખારે અનિચ્ચતો દુક્ખતો અનત્તતો વિપસ્સન્તિ, મગ્ગો સેક્ખાનં અત્થપ્પટિસમ્ભિદાય…પે… પટિભાનપટિસમ્ભિદાય ઠાનાઠાનકોસલ્લસ્સ ઉપનિસ્સયપચ્ચયેન પચ્ચયો. (૨)

અપચયગામી ધમ્મો નેવાચયગામિનાપચયગામિસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અરહા મગ્ગં ઉપનિસ્સાય અનુપ્પન્નં કિરિયસમાપત્તિં ઉપ્પાદેતિ, ઉપ્પન્નં સમાપજ્જતિ…પે… ઠાનાઠાનકોસલ્લસ્સ ઉપનિસ્સયપચ્ચયેન પચ્ચયો. મગ્ગો ફલસમાપત્તિયા ઉપનિસ્સયપચ્ચયેન પચ્ચયો. (૩)

૫૬. નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – કાયિકં સુખં ઉપનિસ્સાય અત્તાનં આતાપેતિ પરિતાપેતિ પરિયિટ્ઠિમૂલકં દુક્ખં પચ્ચનુભોતિ. કાયિકં દુક્ખં… ઉતું… ભોજનં… સેનાસનં ઉપનિસ્સાય અત્તાનં આતાપેતિ પરિતાપેતિ…પે… કાયિકં સુખં… કાયિકં દુક્ખં… ઉતુ… ભોજનં… સેનાસનં કાયિકસ્સ સુખસ્સ, કાયિકસ્સ દુક્ખસ્સ ફલસમાપત્તિયા ઉપનિસ્સયપચ્ચયેન પચ્ચયો. અરહા કાયિકં સુખં ઉપનિસ્સાય અનુપ્પન્નં કિરિયસમાપત્તિં ઉપ્પાદેતિ…પે… વિપસ્સતિ. કાયિકં દુક્ખં… ઉતું… ભોજનં… સેનાસનં ઉપનિસ્સાય…પે… વિપસ્સતિ. (૧)

નેવાચયગામીનાપચયગામી ધમ્મો આચયગામિસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – કાયિકં સુખં ઉપનિસ્સાય દાનં દેતિ…પે… સમાપત્તિં ઉપ્પાદેતિ, પાણં હનતિ…પે… સઙ્ઘં ભિન્દતિ. કાયિકં દુક્ખં… ઉતું… ભોજનં… સેનાસનં ઉપનિસ્સાય દાનં દેતિ…પે… સઙ્ઘં ભિન્દતિ, કાયિકં સુખં…પે… સેનાસનં આચયગામિયા સદ્ધાય…પે… પઞ્ઞાય, રાગસ્સ…પે… પત્થનાય ઉપનિસ્સયપચ્ચયેન પચ્ચયો. (૨)

નેવાચયગામિનાપચયગામી ધમ્મો અપચયગામિસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, પકતૂપનિસ્સયો…પે…. પકતૂપનિસ્સયો – કાયિકં સુખં ઉપનિસ્સાય મગ્ગં ઉપ્પાદેતિ. કાયિકં દુક્ખં …પે… સેનાસનં ઉપનિસ્સાય મગ્ગં ઉપ્પાદેતિ, કાયિકં સુખં, કાયિકં દુક્ખં…પે… સેનાસનં મગ્ગસ્સ ઉપનિસ્સયપચ્ચયેન પચ્ચયો. (૩)

પુરેજાતપચ્ચયો

૫૭. નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – અરહા ચક્ખું…પે… વત્થું અનિચ્ચતો દુક્ખતો અનત્તતો વિપસ્સતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ નેવાચયગામિનાપચયગામીનં ખન્ધાનં પુરેજાતપચ્ચયેન પચ્ચયો. (૧)

નેવાચયગામિનાપચયગામી ધમ્મો આચયગામિસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – સેક્ખા વા પુથુજ્જના વા ચક્ખું…પે… વત્થું અનિચ્ચતો દુક્ખતો અનત્તતો વિપસ્સન્તિ, અસ્સાદેન્તિ અભિનન્દન્તિ; તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. વત્થુપુરેજાતં – વત્થુ આચયગામીનં ખન્ધાનં પુરેજાતપચ્ચયેન પચ્ચયો. (૨)

નેવાચયગામિનાપચયગામી ધમ્મો અપચયગામિસ્સ ધમ્મસ્સ પુરેજાતપચ્ચયેન પચ્ચયો. વત્થુપુરેજાતં – વત્થુ અપચયગામીનં ખન્ધાનં પુરેજાતપચ્ચયેન પચ્ચયો. (૩)

પચ્છાજાતપચ્ચયો

૫૮. આચયગામી ધમ્મો નેવાચયગામિનાપચયગામિસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા આચયગામી ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

અપચયગામી ધમ્મો નેવાચયગામિનાપચયગામિસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા અપચયગામી ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા નેવાચયગામિનાપચયગામી ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો.

આસેવનપચ્ચયો

૫૯. આચયગામી ધમ્મો આચયગામિસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા આચયગામી ખન્ધા પચ્છિમાનં પચ્છિમાનં આચયગામીનં ખન્ધાનં આસેવનપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ આસેવનપચ્ચયેન પચ્ચયો. (૧)

આચયગામી ધમ્મો અપચયગામિસ્સ ધમ્મસ્સ આસેવનપચ્ચયેન પચ્ચયો – ગોત્રભુ મગ્ગસ્સ… વોદાનં મગ્ગસ્સ આસેવનપચ્ચયેન પચ્ચયો. (૨)

નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા નેવાચયગામિનાપચયગામી ખન્ધા પચ્છિમાનં પચ્છિમાનં નેવાચયગામિનાપચયગામીનં ખન્ધાનં આસેવનપચ્ચયેન પચ્ચયો. (૧)

કમ્મપચ્ચયો

૬૦. આચયગામી ધમ્મો આચયગામિસ્સ ધમ્મસ્સ કમ્મપચ્ચયેન પચ્ચયો – આચયગામી ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

આચયગામી ધમ્મો નેવાચયગામિનાપચયગામિસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – આચયગામી ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – આચયગામી ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૨)

આચયગામી ધમ્મો આચયગામિસ્સ ચ નેવાચયગામિનાપચયગામિસ્સ ચ ધમ્મસ્સ કમ્મપચ્ચયેન પચ્ચયો – આચયગામી ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

૬૧. અપચયગામી ધમ્મો અપચયગામિસ્સ ધમ્મસ્સ કમ્મપચ્ચયેન પચ્ચયો – અપચયગામી ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

અપચયગામી ધમ્મો નેવાચયગામિનાપચયગામિસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અપચયગામી ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – અપચયગામી ચેતના વિપાકાનં ખન્ધાનં કમ્મપચ્ચયેન પચ્ચયો. (૨)

અપચયગામી ધમ્મો અપચયગામિસ્સ ચ નેવાચયગામિનાપચયગામિસ્સ ચ ધમ્મસ્સ કમ્મપચ્ચયેન પચ્ચયો – અપચયગામી ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ કમ્મપચ્ચયેન પચ્ચયો – નેવાચયગામિનાપચયગામી ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. પટિસન્ધિક્ખણે નેવાચયગામિનાપચયગામી ચેતના સમ્પયુત્તકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

વિપાકપચ્ચયો

૬૨. નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ વિપાકપચ્ચયેન પચ્ચયો – વિપાકો નેવાચયગામિનાપચયગામી એકો ખન્ધો તિણ્ણન્નં ખન્ધાનં…પે… પટિસન્ધિક્ખણે…પે… ખન્ધા વત્થુસ્સ વિપાકપચ્ચયેન પચ્ચયો. (૧)

આહારપચ્ચયાદિ

૬૩. આચયગામી ધમ્મો આચયગામિસ્સ ધમ્મસ્સ આહારપચ્ચયેન પચ્ચયો… ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો… મગ્ગપચ્ચયેન પચ્ચયો… સમ્પયુત્તપચ્ચયેન પચ્ચયો.

વિપ્પયુત્તપચ્ચયો

૬૪. આચયગામી ધમ્મો નેવાચયગામિનાપચયગામિસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – આચયગામી ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – આચયગામી ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અપચયગામી ધમ્મો નેવાચયગામિનાપચયગામિસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – અપચયગામી ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – અપચયગામી ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં. સહજાતા – નેવાચયગામિનાપચયગામી ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પટિસન્ધિક્ખણે નેવાચયગામિનાપચયગામી ખન્ધા કટત્તારૂપાનં વિપ્પયુત્તપચ્ચયેન પચ્ચયો. ખન્ધા વત્થુસ્સ વિપ્પયુત્તપચ્ચયેન પચ્ચયો. વત્થુ ખન્ધાનં વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ નેવાચયગામિનાપચયગામીનં ખન્ધાનં વિપ્પયુત્તપચ્ચયેન પચ્ચયો. પચ્છાજાતા – નેવાચયગામિનાપચયગામી ખન્ધા પુરેજાતસ્સ ઇમસ્સ કાયસ્સ…પે…. (૧)

નેવાચયગામિનાપચયગામી ધમ્મો આચયગામિસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ આચયગામીનં ખન્ધાનં વિપ્પયુત્તપચ્ચયેન પચ્ચયો. (૨)

નેવાચયગામિનાપચયગામી ધમ્મો અપચયગામિસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ અપચયગામીનં ખન્ધાનં વિપ્પયુત્તપચ્ચયેન પચ્ચયો. (૩)

અત્થિપચ્ચયાદિ

૬૫. આચયગામી ધમ્મો આચયગામિસ્સ ધમ્મસ્સ અત્થિપચ્ચયેન પચ્ચયો – આચયગામી એકો ખન્ધો તિણ્ણન્નં ખન્ધાનં…પે…. (૧)

આચયગામી ધમ્મો નેવાચયગામિનાપચયગામિસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં. સહજાતા – આચયગામી ખન્ધા ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – આચયગામી ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. (૨)

આચયગામી ધમ્મો આચયગામિસ્સ ચ નેવાચયગામિનાપચયગામિસ્સ ચ ધમ્મસ્સ અત્થિપચ્ચયેન પચ્ચયો – આચયગામી એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે…. (૩)

અપચયગામી ધમ્મો… તીણિ (આચયગામિનયેન કાતબ્બં).

૬૬. નેવાચયગામિનાપચયગામી ધમ્મો નેવાચયગામિનાપચયગામિસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતો – નેવાચયગામિનાપચયગામી એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે… ખન્ધા વત્થુસ્સ અત્થિપચ્ચયેન પચ્ચયો. વત્થુ ખન્ધાનં અત્થિપચ્ચયેન પચ્ચયો. એકં મહાભૂતં…પે… બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં…પે…. પુરેજાતં – અરહા ચક્ખું…પે… વત્થું અનિચ્ચતો દુક્ખતો અનત્તતો વિપસ્સતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ નેવાચયગામિનાપચયગામીનં ખન્ધાનં અત્થિપચ્ચયેન પચ્ચયો. પચ્છાજાતા – નેવાચયગામિનાપચયગામી ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. કબળીકારો આહારો ઇમસ્સ કાયસ્સ…પે… રૂપજીવિતિન્દ્રિયં કટત્તારૂપાનં…પે…. (૧)

નેવાચયગામિનાપચયગામી ધમ્મો આચયગામિસ્સ ધમ્મસ્સ અત્થિપચ્ચયેન પચ્ચયો. પુરેજાતં – સેક્ખા વા પુથુજ્જના વા ચક્ખું અનિચ્ચતો દુક્ખતો અનત્તતો વિપસ્સન્તિ, અસ્સાદેન્તિ અભિનન્દન્તિ; તં આરબ્ભ રાગો…પે… દોમનસ્સં ઉપ્પજ્જતિ, સોતં…પે… વત્થું અનિચ્ચતો…પે… વિપસ્સન્તિ, અસ્સાદેન્તિ અભિનન્દન્તિ; તં આરબ્ભ રાગો…પે… દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, વત્થુ આચયગામીનં ખન્ધાનં અત્થિપચ્ચયેન પચ્ચયો. (૨)

નેવાચયગામિનાપચયગામી ધમ્મો અપચયગામિસ્સ ધમ્મસ્સ અત્થિપચ્ચયેન પચ્ચયો. પુરેજાતં – વત્થુ અપચયગામીનં ખન્ધાનં અત્થિપચ્ચયેન પચ્ચયો. (૩)

૬૭. આચયગામી ચ નેવાચયગામિનાપચયગામી ચ ધમ્મા આચયગામિસ્સ ધમ્મસ્સ અત્થિપચ્ચયેન પચ્ચયો સહજાતં, પુરેજાતં. સહજાતો – આચયગામી એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા…પે…. (૧)

આચયગામી ચ નેવાચયગામિનાપચયગામી ચ ધમ્મા નેવાચયગામિનાપચયગામિસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – આચયગામી ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – આચયગામી ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – આચયગામી ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

અપચયગામી ચ નેવાચયગામિનાપચયગામી ચ ધમ્મા અપચયગામિસ્સ ધમ્મસ્સ અત્થિપચ્ચયેન પચ્ચયો (દ્વે કાતબ્બા દસ્સિતનયેન), નત્થિપચ્ચયેન પચ્ચયો, વિગતપચ્ચયેન પચ્ચયો, અવિગતપચ્ચયેન પચ્ચયો.