(૧૯) ૧૦. વોહારકથા

૩૪૭. બુદ્ધસ્સ ભગવતો વોહારો લોકુત્તરોતિ? આમન્તા. લોકુત્તરે સોતે પટિહઞ્ઞતિ નો લોકિયે, લોકુત્તરેન વિઞ્ઞાણેન પટિવિજાનન્તિ નો લોકિયેન, સાવકા પટિવિજાનન્તિ નો પુથુજ્જનાતિ? ન હેવં વત્તબ્બે…પે….

નનુ બુદ્ધસ્સ ભગવતો વોહારો લોકિયે સોતે પટિહઞ્ઞતીતિ? આમન્તા. હઞ્ચિ બુદ્ધસ્સ ભગવતો વોહારો લોકિયે સોતે પટિહઞ્ઞતિ, નો ચ વત રે વત્તબ્બે – ‘‘બુદ્ધસ્સ ભગવતો વોહારો લોકુત્તરો’’તિ.

નનુ બુદ્ધસ્સ ભગવતો વોહારં લોકિયેન વિઞ્ઞાણેન પટિવિજાનન્તીતિ? આમન્તા. હઞ્ચિ બુદ્ધસ્સ ભગવતો વોહારં લોકિયેન વિઞ્ઞાણેન પટિવિજાનન્તિ, નો ચ વત રે વત્તબ્બે – ‘‘બુદ્ધસ્સ ભગવતો વોહારો લોકુત્તરો’’તિ.

નનુ બુદ્ધસ્સ ભગવતો વોહારં પુથુજ્જના પટિવિજાનન્તીતિ? આમન્તા. હઞ્ચિ બુદ્ધસ્સ ભગવતો વોહારં પુથુજ્જના પટિવિજાનન્તિ, નો ચ વત રે વત્તબ્બે – ‘‘બુદ્ધસ્સ ભગવતો વોહારો લોકુત્તરો’’તિ.

૩૪૮. બુદ્ધસ્સ ભગવતો વોહારો લોકુત્તરોતિ? આમન્તા. મગ્ગો ફલં નિબ્બાનં, સોતાપત્તિમગ્ગો સોતાપત્તિફલં, સકદાગામિમગ્ગો સકદાગામિફલં, અનાગામિમગ્ગો અનાગામિફલં, અરહત્તમગ્ગો અરહત્તફલં, સતિપટ્ઠાનં સમ્મપ્પધાનં ઇદ્ધિપાદો ઇન્દ્રિયં બલં બોજ્ઝઙ્ગોતિ? ન હેવં વત્તબ્બે…પે….

બુદ્ધસ્સ ભગવતો વોહારો લોકુત્તરોતિ? આમન્તા. અત્થિ કેચિ બુદ્ધસ્સ ભગવતો વોહારં સુણન્તીતિ? આમન્તા. લોકુત્તરો ધમ્મો સોતવિઞ્ઞેય્યો, સોતસ્મિં પટિહઞ્ઞતિ, સોતસ્સ આપાથં આગચ્છતીતિ? ન હેવં વત્તબ્બે…પે….

નનુ લોકુત્તરો ધમ્મો ન સોતવિઞ્ઞેય્યો, ન સોતસ્મિં પટિહઞ્ઞતિ, ન સોતસ્સ આપાથં આગચ્છતીતિ? આમન્તા. હઞ્ચિ લોકુત્તરો ધમ્મો ન સોતવિઞ્ઞેય્યો, ન સોતસ્મિં પટિહઞ્ઞતિ, ન સોતસ્સ આપાથં આગચ્છતિ, નો ચ વત રે વત્તબ્બે – ‘‘બુદ્ધસ્સ ભગવતો વોહારો લોકુત્તરો’’તિ.

૩૪૯. બુદ્ધસ્સ ભગવતો વોહારો લોકુત્તરોતિ? આમન્તા. અત્થિ કેચિ બુદ્ધસ્સ ભગવતો વોહારે રજ્જેય્યુન્તિ? આમન્તા. લોકુત્તરો ધમ્મો રાગટ્ઠાનિયો રજનીયો કમનીયો મદનીયો બન્ધનીયો મુચ્છનીયોતિ? ન હેવં વત્તબ્બે…પે….

નનુ લોકુત્તરો ધમ્મો ન રાગટ્ઠાનિયો ન રજનીયો ન કમનીયો ન મદનીયો ન બન્ધનીયો ન મુચ્છનીયોતિ? આમન્તા. હઞ્ચિ લોકુત્તરો ધમ્મો ન રાગટ્ઠાનિયો ન રજનીયો ન કમનીયો ન મદનીયો ન બન્ધનીયો ન મુચ્છનીયો, નો ચ વત રે વત્તબ્બે – ‘‘બુદ્ધસ્સ ભગવતો વોહારો લોકુત્તરો’’તિ.

બુદ્ધસ્સ ભગવતો વોહારો લોકુત્તરોતિ? આમન્તા. અત્થિ કેચિ બુદ્ધસ્સ ભગવતો વોહારે દુસ્સેય્યુન્તિ? આમન્તા. લોકુત્તરો ધમ્મો દોસટ્ઠાનિયો કોપટ્ઠાનિયો પટિઘટ્ઠાનિયોતિ? ન હેવં વત્તબ્બે…પે….

નનુ લોકુત્તરો ધમ્મો ન દોસટ્ઠાનિયો ન કોપટ્ઠાનિયો ન પટિઘટ્ઠાનિયોતિ? આમન્તા. હઞ્ચિ લોકુત્તરો ધમ્મો ન દોસટ્ઠાનિયો ન કોપટ્ઠાનિયો ન પટિઘટ્ઠાનિયો, નો ચ વત રે વત્તબ્બે – ‘‘બુદ્ધસ્સ ભગવતો વોહારો લોકુત્તરો’’તિ.

બુદ્ધસ્સ ભગવતો વોહારો લોકુત્તરોતિ? આમન્તા. અત્થિ કેચિ બુદ્ધસ્સ ભગવતો વોહારે મુય્હેય્યુન્તિ? આમન્તા. લોકુત્તરો ધમ્મો મોહટ્ઠાનિયો અઞ્ઞાણકરણો અચક્ખુકરણો પઞ્ઞાનિરોધિકો વિઘાતપક્ખિકો અનિબ્બાનસંવત્તનિકોતિ? ન હેવં વત્તબ્બે…પે….

નનુ લોકુત્તરો ધમ્મો ન મોહટ્ઠાનિયો ન અઞ્ઞાણકરણો ન અચક્ખુકરણો પઞ્ઞાવુદ્ધિકો અવિઘાતપક્ખિકો નિબ્બાનસંવત્તનિકોતિ? આમન્તા. હઞ્ચિ લોકુત્તરો ધમ્મો ન મોહટ્ઠાનિયો ન અઞ્ઞાણકરણો ન અચક્ખુકરણો પઞ્ઞાવુદ્ધિકો અવિઘાતપક્ખિકો નિબ્બાનસંવત્તનિકો, નો ચ વત રે વત્તબ્બે – ‘‘બુદ્ધસ્સ ભગવતો વોહારો લોકુત્તરો’’તિ.

૩૫૦. બુદ્ધસ્સ ભગવતો વોહારો લોકુત્તરોતિ? આમન્તા. યે કેચિ બુદ્ધસ્સ ભગવતો વોહારં સુણન્તિ, સબ્બે તે મગ્ગં ભાવેન્તીતિ? ન હેવં વત્તબ્બે…પે….

યે કેચિ બુદ્ધસ્સ ભગવતો વોહારં સુણન્તિ, સબ્બે તે મગ્ગં ભાવેન્તીતિ? આમન્તા. બાલપુથુજ્જના બુદ્ધસ્સ ભગવતો વોહારં સુણન્તિ, બાલપુથુજ્જના મગ્ગં ભાવેન્તીતિ? ન હેવં વત્તબ્બે…પે… માતુઘાતકો મગ્ગં ભાવેતિ…પે… પિતુઘાતકો… અરહન્તઘાતકો… રુહિરુપ્પાદકો… સઙ્ઘભેદકો બુદ્ધસ્સ ભગવતો વોહારં સુણાતિ, સઙ્ઘભેદકો મગ્ગં ભાવેતીતિ? ન હેવં વત્તબ્બે…પે….

૩૫૧. લબ્ભા સોવણ્ણમયાય લટ્ઠિયા ધઞ્ઞપુઞ્જોપિ સુવણ્ણપુઞ્જોપિ આચિક્ખિતુન્તિ? આમન્તા. એવમેવં ભગવા લોકુત્તરેન વોહારેન લોકિયમ્પિ લોકુત્તરમ્પિ ધમ્મં વોહરતીતિ.

લબ્ભા એલણ્ડિયાય લટ્ઠિયા ધઞ્ઞપુઞ્જોપિ સુવણ્ણપુઞ્જોપિ આચિક્ખિતુન્તિ? આમન્તા. એવમેવં ભગવા લોકિયેન વોહારેન લોકિયમ્પિ લોકુત્તરમ્પિ ધમ્મં વોહરતીતિ.

૩૫૨. બુદ્ધસ્સ ભગવતો વોહારો લોકિયં વોહરન્તસ્સ લોકિયો હોતિ, લોકુત્તરં વોહરન્તસ્સ લોકુત્તરો હોતીતિ? આમન્તા. લોકિયં વોહરન્તસ્સ લોકિયે સોતે પટિહઞ્ઞતિ, લોકુત્તરં વોહરન્તસ્સ લોકુત્તરે સોતે પટિહઞ્ઞતિ; લોકિયં વોહરન્તસ્સ લોકિયેન વિઞ્ઞાણેન પટિવિજાનન્તિ, લોકુત્તરં વોહરન્તસ્સ લોકુત્તરેન વિઞ્ઞાણેન પટિવિજાનન્તિ; લોકિયં વોહરન્તસ્સ પુથુજ્જના પટિવિજાનન્તિ, લોકુત્તરં વોહરન્તસ્સ સાવકા પટિવિજાનન્તીતિ? ન હેવં વત્તબ્બે…પે….

ન વત્તબ્બં – ‘‘બુદ્ધસ્સ ભગવતો વોહારો લોકિયં વોહરન્તસ્સ લોકિયો હોતિ, લોકુત્તરં વોહરન્તસ્સ લોકુત્તરો હોતીતિ? આમન્તા. નનુ ભગવા લોકિયમ્પિ લોકુત્તરમ્પિ ધમ્મં વોહરતીતિ? આમન્તા. હઞ્ચિ ભગવા લોકિયમ્પિ લોકુત્તરમ્પિ ધમ્મં વોહરતિ, તેન વત રે વત્તબ્બે – ‘‘બુદ્ધસ્સ ભગવતો વોહારો લોકિયં વોહરન્તસ્સ લોકિયો હોતિ, લોકુત્તરં વોહરન્તસ્સ લોકુત્તરો હોતી’’તિ.

બુદ્ધસ્સ ભગવતો વોહારો લોકિયં વોહરન્તસ્સ લોકિયો હોતિ, લોકુત્તરં વોહરન્તસ્સ લોકુત્તરો હોતીતિ? આમન્તા. મગ્ગં વોહરન્તસ્સ મગ્ગો હોતિ, અમગ્ગં વોહરન્તસ્સ અમગ્ગો હોતિ, ફલં વોહરન્તસ્સ ફલં હોતિ, અફલં વોહરન્તસ્સ અફલં હોતિ, નિબ્બાનં વોહરન્તસ્સ નિબ્બાનં હોતિ, અનિબ્બાનં વોહરન્તસ્સ અનિબ્બાનં હોતિ, સઙ્ખતં વોહરન્તસ્સ સઙ્ખતં હોતિ, અસઙ્ખતં વોહરન્તસ્સ અસઙ્ખતં હોતિ, રૂપં વોહરન્તસ્સ રૂપં હોતિ, અરૂપં વોહરન્તસ્સ અરૂપં હોતિ, વેદનં વોહરન્તસ્સ વેદના હોતિ, અવેદનં વોહરન્તસ્સ અવેદના હોતિ, સઞ્ઞં વોહરન્તસ્સ સઞ્ઞા હોતિ, અસઞ્ઞં વોહરન્તસ્સ અસઞ્ઞા હોતિ, સઙ્ખારે વોહરન્તસ્સ સઙ્ખારા હોન્તિ, અસઙ્ખારે વોહરન્તસ્સ અસઙ્ખારા હોન્તિ, વિઞ્ઞાણં વોહરન્તસ્સ વિઞ્ઞાણં હોતિ, અવિઞ્ઞાણં વોહરન્તસ્સ અવિઞ્ઞાણં હોતીતિ? ન હેવં વત્તબ્બે…પે….

વોહારકથા નિટ્ઠિતા.