૧૯. પટિવેધાનુયોગો

૨૦૧. ન વત્તબ્બં – ‘‘પુગ્ગલો ઉપલબ્ભતિ સચ્ચિકટ્ઠપરમત્થેના’’તિ? આમન્તા. નનુ સોતાપન્નો અત્થીતિ? આમન્તા. હઞ્ચિ સોતાપન્નો અત્થિ, તેન વત રે વત્તબ્બે – ‘‘પુગ્ગલો ઉપલબ્ભતિ સચ્ચિકટ્ઠપરમત્થેના’’તિ.

૨૦૨. ન વત્તબ્બં – ‘‘પુગ્ગલો ઉપલબ્ભતિ સચ્ચિકટ્ઠપરમત્થેના’’તિ? આમન્તા. નનુ સકદાગામી અત્થિ…પે… અનાગામી અત્થિ… અરહા અત્થિ… ઉભતોભાગવિમુત્તો અત્થિ… પઞ્ઞાવિમુત્તો અત્થિ… કાયસક્ખિ [કાયસક્ખી (સ્યા.)] અત્થિ… દિટ્ઠિપ્પત્તો અત્થિ… સદ્ધાવિમુત્તો અત્થિ… ધમ્માનુસારી અત્થિ… સદ્ધાનુસારી અત્થીતિ? આમન્તા.

હઞ્ચિ સદ્ધાનુસારી અત્થિ, તેન વત રે વત્તબ્બે – ‘‘પુગ્ગલો ઉપલબ્ભતિ સચ્ચિકટ્ઠપરમત્થેના’’તિ.

૨૦૩. સોતાપન્નો અત્થીતિ કત્વા તેન ચ કારણેન પુગ્ગલો ઉપલબ્ભતિ સચ્ચિકટ્ઠપરમત્થેનાતિ? આમન્તા. અત્થિ કોચિ ન સોતાપન્નો હુત્વા સોતાપન્નો હોતીતિ? આમન્તા. અત્થિ કોચિ ન પુગ્ગલો હુત્વા પુગ્ગલો હોતીતિ? ન હેવં વત્તબ્બે…પે….

૨૦૪. અત્થિ કોચિ ન સકદાગામી હુત્વા… ન અનાગામી હુત્વા… ન અરહા હુત્વા… ન ઉભતોભાગવિમુત્તો હુત્વા… ન પઞ્ઞાવિમુત્તો હુત્વા… ન કાયસક્ખિ હુત્વા… ન દિટ્ઠિપ્પત્તો હુત્વા… ન સદ્ધાવિમુત્તો હુત્વા… ન ધમ્માનુસારી હુત્વા… ન સદ્ધાનુસારી હુત્વા સદ્ધાનુસારી હોતીતિ? આમન્તા. અત્થિ કોચિ ન પુગ્ગલો હુત્વા પુગ્ગલો હોતીતિ? ન હેવં વત્તબ્બે…પે….

૨૦૫. સોતાપન્નો અત્થીતિ કત્વા તેન ચ કારણેન પુગ્ગલો ઉપલબ્ભતિ સચ્ચિકટ્ઠપરમત્થેનાતિ? આમન્તા. અત્થિ કોચિ સોતાપન્નો હુત્વા ન સોતાપન્નો હોતીતિ? આમન્તા. અત્થિ કોચિ પુગ્ગલો હુત્વા ન પુગ્ગલો હોતીતિ? ન હેવં વત્તબ્બે…પે….

અત્થિ કોચિ સકદાગામી હુત્વા… અનાગામી હુત્વા ન અનાગામી હોતીતિ? આમન્તા. અત્થિ કોચિ પુગ્ગલો હુત્વા ન પુગ્ગલો હોતીતિ? ન હેવં વત્તબ્બે…પે….

પટિવેધાનુયોગો.