૧૪. અભિઞ્ઞાનુયોગો

૧૯૩. ન વત્તબ્બં – ‘‘પુગ્ગલો ઉપલબ્ભતિ સચ્ચિકટ્ઠપરમત્થેના’’તિ? આમન્તા. નનુ અત્થિ કોચિ ઇદ્ધિં વિકુબ્બતીતિ? આમન્તા. હઞ્ચિ અત્થિ કોચિ ઇદ્ધિં વિકુબ્બતિ, તેન વત રે વત્તબ્બે – ‘‘પુગ્ગલો ઉપલબ્ભતિ સચ્ચિકટ્ઠપરમત્થેના’’તિ.

૧૯૪. ન વત્તબ્બં – ‘‘પુગ્ગલો ઉપલબ્ભતિ સચ્ચિકટ્ઠપરમત્થેના’’તિ? આમન્તા. નનુ અત્થિ કોચિ દિબ્બાય સોતધાતુયા સદ્દં સુણાતિ…પે… પરચિત્તં વિજાનાતિ… પુબ્બેનિવાસં અનુસ્સરતિ… દિબ્બેન ચક્ખુના રૂપં પસ્સતિ… આસવાનં ખયં સચ્છિકરોતીતિ? આમન્તા. હઞ્ચિ અત્થિ કોચિ આસવાનં ખયં સચ્છિકરોતિ, તેન વત રે વત્તબ્બે – ‘‘પુગ્ગલો ઉપલબ્ભતિ સચ્ચિકટ્ઠપરમત્થેના’’તિ.

૧૯૫. અત્થિ કોચિ ઇદ્ધિં વિકુબ્બતીતિ કત્વા તેન ચ કારણેન પુગ્ગલો ઉપલબ્ભતિ સચ્ચિકટ્ઠપરમત્થેનાતિ? આમન્તા. યો ઇદ્ધિં વિકુબ્બતિ, સ્વેવ પુગ્ગલો? યો ઇદ્ધિં ન વિકુબ્બતિ, ન સો પુગ્ગલોતિ? ન હેવં વત્તબ્બે…પે….

૧૯૬. યો દિબ્બાય સોતધાતુયા સદ્દં સુણાતિ…પે… યો પરચિત્તં વિજાનાતિ… યો પુબ્બેનિવાસં અનુસ્સરતિ… યો દિબ્બેન ચક્ખુના રૂપં પસ્સતિ… યો આસવાનં ખયં સચ્છિકરોતિ, સ્વેવ પુગ્ગલો? યો આસવાનં ખયં ન સચ્છિકરોતિ, ન સો પુગ્ગલોતિ? ન હેવં વત્તબ્બે…પે….

અભિઞ્ઞાનુયોગો.