૧. સઞ્ઞાપરિભાસાનિદ્દેસ-પઠમપરિચ્છેદ

૧. નમ’ત્થુ જન સન્તાન, તમ સન્તાન ભેદિનો;

ધમ્મુ’જ્જલન્ત રુચિનો, મુનિન્દો’દાત રોચિનો.

૨. પિઙ્ગલા’ચરિયાદીહિ, છન્દં ય મુદિતં પુરા;

સુદ્ધમાગધિકાનં તં, ન સાધેતિ યથિચ્છિતં [ય’દિચ્છિતં યતિ’ચ્છિતં (ક.)].

૩. તતો માગધભાસાય, મત્તા,વણ્ણ,વિભેદનં;

લક્ખ્ય લક્ખણ સંયુત્તં, પસન્ન’ત્થ,પદ,ક્કમં.

૪. ઇદં વુત્તોદયં નામ, લોકિય’ચ્છન્દનિસ્સિતં;

આરભિસ્સ’મહં દાનિ, તેસં સુખવિબુદ્ધિયા.

૫. સબ્બગ્લા મ્ના,’દિગલહૂ, ભ્યા’,મજ્ઝ’ન્ત ગરૂ જસા;

મજ્ઝ’ન્તલા ર,તે’તે’ટ્ઠ, ગણા ગો ગરુ,લો લહુ.

૬. ભ,જ,સા સબ્બગ,લહૂ, પઞ્ચિ’મે સણ્ઠિતા ગણા;

અરિયાદિમ્હિ વિઞ્ઞેય્યા, ગણો ઇધ ચતુ’ક્કલો.

૭. સંયોગા’દિ ચ, દીઘો ચ, નિગ્ગહીતપરો ચ, યો;

ગરુ, વઙ્કો, પાદન્તો,વા, રસ્સો’ઞ્ઞો મત્તિકો લુ’જુ.

૮. પરે પાદાદિસંયોગે, યો પુબ્બો ગરુક’ક્ખરો;

લહુ સ ક્વચિ વિઞ્ઞેય્યો, તદુદાહરણં યથા.

૯. દસ્સનરસા’નુભાવને, નિબદ્ધગેધા જિનસ્સ’યં જનતા;

વિમ્હયજનની સઞ્ઞત, ક્રિયા નુ કં ના’નુરઞ્જયતિ.

૧૦. વિઞ્ઞેય્યા લોકતો સઞ્ઞા, સમુદ્દો,સુ,રસાદિનં;

પાદોઞેય્યો ચતુત્થં’સો, પદચ્છેદો યતી ભવે.

૧૧. સમ,મડ્ઢસમં, વુત્તં, વિસમં ચા’પરં તિધા;

સમા લક્ખણતો પાદા, ચત્તારો યસ્સ તં સમં.

૧૨. યસ્સ’ન્તિમેન દુતિયો, તતિયેના’દિમો સમો;

ત’દડ્ઢસમ, મઞ્ઞં તુ, ભિન્ન લક્ખણ પાદિકં.

૧૩. પાદ’મેકક્ખરા’રબ્ભ, યાવ છબ્બીસત’ક્ખરા;

ભવે પાદેહિ તં છન્દં, નાનાનામો’દિતં તતો.

૧૪. દણ્ડકા ચણ્ડવુટ્ઠ્યા’દિ, પાદેહિ છહિ, તીહિ તુ;

‘ગાથા’તિ ચ પરત્થે’વં, છન્દો સઞ્ઞા પકાસિતા.

૧૫. અનન્તરો’દિતં ચ’ઞ્ઞ, મેતં સામઞ્ઞ નામતો;

‘ગાથા’ઇચ્ચેવ નિદ્દિટ્ઠં, મુનિન્દવચને પન.

૧૬. વિસેસનામતો કિઞ્ચિ, ગહેત્વા સબ્બથો’ચિતં;

દસ્સયિસ્સામ’હં તે’ત્થ, નામાના’વિ ભવિસ્સરે.

ઇતિ વુત્તોદયે છન્દસિ સઞ્ઞાપરિભાસા નિદ્દેસો નામ

પઠમો પરિચ્છેદો.