૪. યોનકરટ્ઠસાસનવંસકથામગ્ગો

૪. ઇદાનિ પન યોનકરટ્ઠે સાસનસ્સુપ્પત્તિં કથેસ્સામિ. ભગવા હિ વેનેય્યહિતાવહો યોનકરટ્ઠે મમસાસનં ચિરકાલં પભિટ્ઠહિસ્સતીતિ આપેક્ખિત્વા સદ્ધિં ભિક્ખુ સઙ્ઘેન દેસચારિકં આહિણ્ડન્તો લભુઞ્જં નામ નગરં અગમાસિ. તદા એકો નેસાદો હરિફલં દત્વા તં પરિભુઞ્જિત્વા હરિબીજે ખિપિતે પથવિયં અપતિત્વા આકાસેયેવ પતિટ્ઠાસિ. તં દિસ્વા સિતં પત્વાકાસિ. તમત્થં દિસ્વા આનન્દત્થેરો પુચ્છિ. અનાગતે ખો આનન્દ ઇમસ્મિં ઠાને મમ ધાતુચેતિયં પતિટ્ઠહિસ્સતિ, સાસનં વિરૂળમાપજ્જિસ્સતીતિ બ્યાકાસિ. ભગવતા પન હરિફલસ્સ ભુઞ્જિતટ્ઠાનત્તાહરિભુઞ્જોતિ તસ્સ રટ્ઠસ્સ નામં અહોસિ. દ્વિન્નં તાપસાનં ઠપિતં જલસુત્તિકં પટિચ્ચ યોનકાનં ભાસાય લભુઞ્જોતિ નામં અહોસિ.

તદા તત્થ મપિન્નાય નામ એકિસ્સા માતિકાય સમીપે નિસિન્નો એકો લવકુલિકજેટ્ઠકો અત્તનો પુત્તં સત્તવસ્સિકં ભગવતો નિય્યાદેત્વા પબ્બાજેસિ. કમ્મટ્ઠાનાનુયોગવસેન અચિરેનેવ અરહત્તં પાપુણિ. સત્તવસ્સિ કસ્સચ સામણેરસ્સ અરહત્તં સચ્છિકતટ્ઠાનતં પટિચ્ચ યોનકભાસાય એતં ઠાનં ચઙ્ગમઙ્ઘ ઇતિ વુચ્ચતિ. ચિરકાલ વસેન જઙ્ગમઙ્ઘ ઇતિ વુચ્ચતિ. તતો પટ્ઠાયયેવ યોનકરટ્ઠે સાસનં પતિટ્ઠાતીતિ.

ઇદં યોનકરટ્ઠે પઠમં સાસનસ્સ પતિટ્ઠાનં.

સાસને પન પઞ્ચતિંસાધિકે દ્વિવસ્સસતે સમ્પત્તે મહારક્ખિતત્થેરો યોનકરટ્ઠં ગન્ત્વા કમ્બોજખેમાવર હરિભુઞ્જાયુદ્ધયાદીસુ અનેકેસુ રટ્ઠેસુ સાસનં પતિટ્ઠાપેતિ. તાનિ હિ સબ્બાનિ રટ્ઠાનિ સઙ્ગહેત્વા દસ્સેન્તેહિ અટ્ઠકથાચરિયેહિ યોનકલોકન્તિ ઓકાસકાલોકવાચકેન સામઞ્ઞસદ્દેન વુત્તં. પકતિ હેસા ગન્થકારાનં યેન કેનચાકારેન અત્થન્તરસ્સ વિઞ્ઞાપનાતિ.

મહારક્ખિતત્થેરો ચ સદ્ધિં પઞ્ચહિ ભિક્ખૂહિ પાટલિપુત્તતો અનિલપથમગ્ગેન યોનકલોકં આગન્ત્વા કાળકારામસુત્તેન યોનકે પસાદેસિ. સત્તતિસહસ્સાધિકપાણસતસહસ્સં મગ્ગફલાલઙ્કારં અદાસિ. સન્તિકે ચસ્સ દસસહસ્સાનિ પબ્બજિંસુ. એવં સો તત્થસાસનં પતિટ્ઠાપેસિ. તથા ચ વુત્તં અટ્ઠકથાયં,–

યોનકરટ્ઠં તદા ગન્ત્વા, સો મહારક્ખિતો ઇસિ;

કાળકારામસુત્તેન, તે પસાદેસિ યોનકેતિ.

તતો પટ્ઠાય તેસં સિસ્સપરમ્પરા બહૂ હોન્તિ, ગણનપથં વીતિવત્તા.

ઇદં યોનકરટ્ઠે મહારક્ખિતત્થેરાદયો પટિચ્ચ

દુતિયં સાસનસ્સ પતિટ્ઠાનં.

યોનકરટ્ઠે લકુન્નનગરે જિનચક્કે પઞ્ચવસ્સસતે મણિમયં બુદ્ધપ્પટિમં માપેત્વા વિસુકમ્મદેવપુત્તો નાગસેનત્થેરસ્સ અદાસિ. નાગેસેનત્થેરો ચ તસ્મિં પટિમમ્હિ ધાતુ આગન્ત્વા પતિટ્ઠાતૂતિ અધિટ્ઠાસિ. અધિટ્ઠાનવસેનેવ સત્તધાતુયો આગન્ત્વા તત્થ પતિટ્ઠહિત્વા પાટિહારિયં દસ્સેસુન્તિ રાજવંસે વુત્તં.

તઞ્ચ વચનં મમ પરિનિબ્બાનતો પઞ્ચવસ્સસતે અતિક્કન્તે એતે ઉપ્પજ્જિસ્સન્તીતિ મિલિન્દપઞ્હાયં વુત્તવચનેન કાલપરિમાણવસેન ચ સમેતિ. યોનકરટ્ઠે મિલિન્દરઞ્ઞો કાલે જિનચક્કે પઞ્ચવસ્સસતેયેવ નાગસેનત્થેરં પટિસ્સ જિનચક્કં વિરૂળં હુત્વા પતિટ્ઠાસિ.

ઇદં યોનકરટ્ઠે નાગસેનત્થેરં પટિચ્ચ તતિયં

સાસનસ્સ પતિટ્ઠાનં.

કલિયુગે પઞ્ચસટ્ઠિવસ્સેલભુઞ્જનગરતો સઙ્કમિત્વા ક્યુઙ્ગરનગરે માપિકસ્સ બઞ્ઞાચોમઙ્ગર નામકસ્સ રઞ્ઞો કાલે મજ્ઝિમદેસતો કસ્સપત્થેરો પઞ્ચહિ થેરેહિ સદ્ધિં આગચ્છિ.

તદા સો રાજા વિહારં કત્વા તેસં અદાસિ. સીહળદીપતો ચ ધાતુયો આનેત્વા એકો થેરો આગચ્છિ. ધાતુતો પાટિહારિયં દિસ્વા પસીદિત્વા લભુઞ્જચેતિય નિધાનં અકાસિ. તે ચ થેરે પટિચ્ચ યોનકરટ્ઠે સાસન વંસો આગતો.

ઇદં યોનકરટ્ઠે ચતુત્થં સાસનસ્સ પતિટ્ઠાનં.

કલિયુગે દ્વાસટ્ઠાધિકે સત્તસતે સમ્પત્થે ચિનરટ્ઠિન્દો રાજા અભિભવિત્વા સકલમ્પિ યોનકરટ્ઠં સઙ્ખુબ્ભિતં હોતિ. તદા મહાધમ્મગમ્ભીરત્થેરો મહામેધઙ્કરત્થે રોચાતિ દ્વે થેરો યોનકરટ્ઠતો સદ્ધિં બહૂહિ ભિક્ખૂહિ સીહળદીપં અગમંસુ. તદા ચ સીહળદીપે દુબ્ભિક્ખભયેન અભિભૂતો હુત્વા તતો સ્યામરટ્ઠે સોક્કતયનગરં પુન અગમંસુ.

તતો પચ્છા લકુન્નનગરં ગન્ત્વા સાસનં પગ્ગણ્હન્તાનં લજ્જિપેસલાનં ભિક્ખૂનં સન્તિકે પુન સિક્ખં ગણ્હિંસુ. તે ચ થેરો સ્યામરટ્ઠે યોનકરટ્ઠે ચ સબ્બત્થ સાસનં પતિટ્ઠાપેસુન્તિ.

ઇદં યોનકરટ્ઠે પત્તલઙ્કે દ્વે થેરે પટિચ્ચ પઞ્ચમં

સાસનસ્સ પતિટ્ઠાનં.

કલિયુગે પઞ્ચવીસાધિકે અટ્ઠવસ્સસતે સમ્પત્તે સિરિસદ્ધમ્મલોકપતિચક્કવત્તિરાજા લભુઞ્જચેતિયં પુન મહન્તં કત્વા તસ્સ ચેતિયસ્સ સમીપે ચત્તારો વિહારે કારાપેત્વા મહામેધઙ્કરત્થેરસ્સ સારિપુત્તત્થેરસ્સ ચ અદાસિ. તદાપિ તે દ્વે થેરા સાસનં પરિસુદ્ધં કત્વા પતિટ્ઠાપેસુન્તિ.

ઇદં યોનકરટ્ઠે મહામેધઙ્કરસારિપુત્તત્થેરે

પટિચ્ચ છટ્ઠં સાસનસ્સ પતિટ્ઠાનં.

કલિયુગે તેચત્તાલીસાધિકે નવવસ્સસતે સમ્પત્તે હંસાવતીનગરે અનેકસેતિભિન્દો નામ રાજા યોનકરટ્ઠં અભિભવિત્વા અત્તનો હત્થગતં કત્વા બલિ ભુઞ્જનત્થાય જેટ્ઠપુત્તસ્સ અનુરુદ્ધસ્સ નામ રાજકુમારસ્સ દત્વા બહૂહિ અમચ્ચેહિ સદ્ધિં તત્થ ગન્ત્વા અનુરાજતાવેન રજ્જં કારાપેસિ. સાસનઞ્ચ વિસોધાપેતું સદ્ધમ્મચક્કસામિત્થેરં તેન સદ્ધિં પહિણિ.

અનેકસેતિભિન્નો કિર રાજા યોનકરટ્ઠં વિજયકાલે પઠમં સાસનસ્સ પતિટ્ઠાનભૂતમિદન્તિ કત્વા તંરટ્ઠવાસિનો કરમરાનીતભાવેન ન અગ્ગહેસીતિ.

યથાવુત્તત્થેરવંસેસુ ચ એકો લકુન્નનગરે અરઞ્ઞવાસી થેરો તત્થ નગરે અજ્જ અસુકસ્મિં ઠાને એકો મતોતિ ગિહીનં કથેત્વા યથાકથિતં ભૂતં હુત્વા અયં અભિઞ્ઞાલાભીતિ પાકટો અહોસિ.

તસ્મિંયેવ ચ નગરે મહામઙ્ગલો નામ થેરો અનેકસેતિભિન્દસ્સ રઞ્ઞો યુજ્ઝિતું આગતકાલે અનેકસેતિભિન્દો રાજા મં પક્કોસિસ્સતિ, સમાનજાતિકં દૂતં પેસ્સેસ્સતીતિ પક્કોસિતકાલતો પઠમમેવવદિ. યથાવુત્તનિયામેનેવ પક્કોસનતો અયં અભિઞ્ઞા લાભીતિ કિત્તિ ઘોસો અહોસિ.

તત્થ નગરે ઞાણવિલાસત્થેરો સઙ્ખ્યાપકાસકં નામ પકરણં અકાસિ. તંળીકં પન પત્તલઙ્કત્થેરસ્સ વિહારે વસન્તો સિરિમઙ્ગલોનામ થેરો અકાસિ.

વિસુદ્ધિમગ્ગદીપનિં પન સંઞ્ઞ્વત્તઅરઞ્ઞવાસી ઉત્તરારામો નામ એકો થેરો. મઙ્ગલદીપનિં સિરિમઙ્ગલત્થેરો. ઉપ્પાતસન્તિં અઞ્ઞતરો થેરો. તં કિર ઉપ્પાતસન્તિં સજ્ઝાયિત્વા ચીનરઞ્ઞો સેનં અજિનીતિ. ઇચ્ચેવં યોનકરટ્ઠે અભિઞ્ઞાલાભીનં ગન્થકારાનઞ્ચ થેરાનં આનુભાવેન જિનસાસનં પરિસુદ્ધં હુત્વા પતિટ્ઠાતિ. એવં હેતુફલસમ્બન્ધવસેન આદિ અન્ત સમ્બન્ધવસેન ચ યથાવુત્તેહિ તીહિ નયેહિ થેરપરમ્પરા ઘટ્ટેત્વા ગહેતબ્બા.

ઇતિ સાસનવંસે યોનકરટ્ઠસાસનવંસકથા

મગ્ગો નામ ચતુત્થો પરિચ્છેદો.