૧૦. ચિનરટ્ઠસાસનવંસકથામગ્ગો

૧૦. તતો પરં પવક્ખામિ ચીનરટ્ઠસાસનવંસકથામગ્ગં યથાટ્ઠવિતમાતિકાવસેન.

તતિયસઙ્ગીતાવસાને હિ મહામોગ્ગલિપુત્તતિસ્સત્થેરો મજ્ઝિમત્થેરં ચિનરટ્ઠં પેસેસિ,-ત્વં એતં રટ્ઠં ગન્ત્વા એત્થ સાસનં પતિટ્ઠાપેહીતિ.

મજ્ઝિમત્થેરોચ કસ્સપગોત્તરેન અળકરેવત્થેરેન દુન્દભિયત્થેરેન મહારેવત્થેરેનચ સદ્ધિં હિમવન્તપ્પદેસે પઞ્ચચીનરટ્ઠં ગન્ત્વા ધમ્મચક્કપ્પવત્તનસુત્તન્તકથાયતં દેસં પસાદેત્વા અસીતિપાણકોટિયો મગ્ગફલરતનાનિ પટિલાભેસિ. પઞ્ચપિચ તે થેરા પઞ્ચરટ્ઠાનિ પસાદેસું. એકમેકસ્સ સન્તિકે સહસ્સમત્તા પબ્બજિંસુ. એવં તે તત્થ સાસનં પતિટ્ઠાપેસું.

ગન્ત્વા મજ્ઝિમત્થેરો, હિમવન્તં પસાદયિ;

યક્ખસેનં પકાસેન્તો, ધમ્મચક્કપ્પવત્તનન્તિ.

તત્થ કિર મનુસ્સા યેભુય્યેન ચન્દીપરમીસ્વારાનં યક્ખાનં પૂજં કરોન્તિ. તેનેવ તે પઞ્ચ થેરા તેસં યક્ખસેનં પકાસયિત્વા ધમ્મં દેસેસું. કસ્મીરગન્ધારરટ્ઠં પન કદાચિ કદાચિ ચીનરટ્ઠિન્દસ્સ વિજિતં હોતિ, કદાચિ કદાચિ પન વિસું હોતિ. તદા પન વિસુંયેવ અહોસીતિ દટ્ઠબ્બં.

ચીરનટ્ઠે પન ભગવતો સાસનં દુબ્બલંયેવ હુત્વા અટ્ઠાસિ, ન થિરં હુત્વા. તેનેવ ઇદાનિ તત્થ કત્થચિયેવ સાસનં છાયામત્તંવ પઞ્ઞાયતિ, વાતવેગેન વિકિણ્ણઅબ્ભંવિય તિટ્ઠતીતિ.

ઇતિ સાસનવંસે ચીનરટ્ઠસાસનવંસકથામગ્ગો નામ

દસમો પરિચ્છેદો.

એવં સબ્બેન સબ્બં સાસનવંસકથામગ્ગો નિટ્ઠિતો.

એત્તાવતાચ –

લઙ્કાગતેન સન્તેન, ચિત્રઞાણેન ભિક્ખુના;

સરણઙ્કરનામેન, સદ્ધમ્મટ્ઠિતિકામિના.

દૂરતોયેવ દીપમ્હા, સુમઙ્ગલેન જોતિના;

વિસુદ્ધસીલિનાચેવ, દીપન્તરટ્ઠભિક્ખુના.

અઞ્ઞેહિચાભિયાચિતો, પઞ્ઞાસામીતિ નામકો;

અકાસિં સુટ્ઠુકં ગન્થં, સાસનવંસપ્પદીપિકં.

દ્વિસતેચ સહસ્સેચ, તેવીસાધિકે ગતે;

પુણ્ણાયં મિગસીરસ્સ, નિટ્ઠં ગતાવ સબ્બસો.

કોચિ એત્થેવ દોસો ચે, પઞ્ઞાયતિ સુચિત્તકા;

તં ખમન્તુ ચ સુદ્ધિયા, ગણ્હન્તુ યુત્તિકં હવેતિ.