સીલક્ખન્ધવગ્ગસુત્ત

સંગાયનસ્સ પુચ્છા વિસ્સજ્જના

પુચ્છા – પઠમમહાધમ્મસંગીતિકાલે આવુસો ધમ્મસંગાહકા મહાકસ્સપાદયો મહાથેરવરા પઠમં વિનયં સંગાયિત્વા તદનન્તરં કં નામ પાવચનં સંગાયિંસુ.

વિસ્સજ્જના – પઠમમહાધમ્મસંગીતિયં ભન્તે ધમ્મસંગાહકા મહાકસ્સપાદયો મહાથેરવરા પઠમં વિનયં સંગાયિત્વા તદનન્તરં ધમ્મં સંગાયિંસુ.

પુચ્છા – ધમ્મો નામ આવુસો સુત્તન્તાભિધમ્મવસેન દુવિધો, તત્થ કતરં ધમ્મં પઠમં સંગાયિંસુ.

વિસ્સજ્જના – દ્વીસુ ભન્તે ધમ્મેસુ સુત્તન્તાભિધમ્મપિટકેસુ પઠમં સુત્તન્તં પિટકં ધમ્મં સંગાયિંસુ.

પુચ્છા – સુત્તન્તપિટકે પિ આવુસો દીઘમજ્ઝિમસંયુત્તઅઙ્ગુત્તરખુદ્દકનિકાયવસેન પઞ્ચ નિકાયા, તેસુ પઠમં કતરં નિકાયં સંગાયિંસુ.

વિસ્સજ્જના – પઞ્ચસુ ભન્તે નિકાયેસુ પઠમં દીઘનિકાયં સંગાયિંસુ.

પુચ્છા – દીઘનિકાયેપિ આવુસો તયો વગ્ગા ચતુત્તિંસા ચ સુત્તાનિ, તેસુ કતરં વગ્ગં કતરઞ્ચ સુત્તં પઠમં સંગાયિંસુ.

વિસ્સજ્જના – દીઘનિકાયેપિ ભન્તે તીસુ વગ્ગેસુ પઠમં સીલક્ખન્ધવગ્ગં, ચતુત્તિંસતિયા ચ સુત્તેસુ પઠમં બ્રહ્મજાલસુત્તં સંગાયિંસુ.