નમો તસ્સ ભગવતો અરહતો સમ્માસમ્બુદ્ધસ્સ

બુદ્ધગુણગાથાવલી

યથેવ પુપ્ફરાસિમ્હા, ગન્થેય્ય માલા સોભના;

એવં બુદ્ધગુણગાથા, વિરચિં સહસ્સાધિકા.

સોપિ ભગવા અરહં, સમ્માસમ્બુદ્ધો સયમ્ભૂ;

વિજ્જાચરણસમ્પન્નો, બુદ્ધં તં પણમામ્યહં.૧.

પુરિસદમ્મસારથી, લોકવિદૂ અનુત્તરો;

સત્થાદેવમનુસ્સાનં, બુદ્ધં તં પણમામ્યહં.૨.

સુગતો સુગદો સામી, સુખદો સન્તિપદાયકો;

સબ્બલોકાનુકમ્પકો, બુદ્ધં તં પણમામ્યહં.૩.

વરો વરઞ્ઞૂ વરદો, વરુત્તમો વરાહરો;

વરધમ્મં અદેસયિ, બુદ્ધં તં પણમામ્યહં.૪.

મહામઙ્ગલમઙ્ગલ્યો, મઙ્ગલો મઙ્ગલાલયો;

મઙ્ગલાયતનો નાથો, બુદ્ધં તં પણમામ્યહં.૫.

મઙ્ગલિન્દો મઙ્ગલિકો, મહામઙ્ગલનાયકો;

મઙ્ગલધમ્મં દેસેસિ, બુદ્ધં તં પણમામ્યહં.૬.

મઙ્ગલગ્ગો મઙ્ગલઞ્ઞૂ, મઙ્ગલત્થપદાયકો;

મઙ્ગલપન્થદસ્સાવી, બુદ્ધં તં પણમામ્યહં.૭.

મઙ્ગલિચ્છો મઙ્ગલિદ્ધો, મઙ્ગલમભિવદ્ધનો;

મઙ્ગલેહિ પરિપુણ્ણો, બુદ્ધં તં પણમામ્યહં.૮.

મઙ્ગલાભા ઉજ્જોતેસિ, મઙ્ગલત્થપભાકરો;

મઙ્ગલાલોકમણ્ડિતો, બુદ્ધં તં પણમામ્યહં.૯.

મઙ્ગલત્થમનુપ્પત્તો, મઙ્ગલત્થપરાયણો;

સબ્બદા મઙ્ગલકરો, બુદ્ધં તં પણમામ્યહં.૧૦.

મઙ્ગલમગ્ગમન્વેસિ, પત્તો મઙ્ગલમુત્તમં;

મઙ્ગલાયનં દસ્સેતા, બુદ્ધં તં પણમામ્યહં.૧૧.

મઙ્ગલમહિમાધારી, મઙ્ગલકારી નાયકો;

સબ્બધિ મઙ્ગલદાતા, બુદ્ધં તં પણમામ્યહં.૧૨.

મઙ્ગલસ્સ કોવિદો ચ, અમઙ્ગલસ્સ કોવિદો;

પરમં મઙ્ગલં લદ્ધો, બુદ્ધં તં પણમામ્યહં.૧૩.

સબ્બમઙ્ગલસમ્પન્નો, મઙ્ગલઘોસઘોસકો;

મઙ્ગલુત્તમં દેસેસિ, બુદ્ધં તં પણમામ્યહં.૧૪.

મહામઙ્ગલત્થં મગ્ગી, લદ્ધો ધમ્મસુમઙ્ગલો;

મઙ્ગલ’દ્ધાનં ઞાપેસિ, બુદ્ધં તં પણમામ્યહં.૧૫.

અગારિકત્થં ઞાપેસિ, મહામઙ્ગલમુત્તમં;

ગિહી સહાયકો સામી, બુદ્ધં તં પણમામ્યહં.૧૬.

મહામઙ્ગલ’લઙ્કિતો, મહામઙ્ગલભૂસનો;

મહામઙ્ગલસેખરો, બુદ્ધં તં પણમામ્યહં.૧૭.

મહામઙ્ગલંસુમાલી, મઙ્ગલાભો સમુજ્જલો;

મઙ્ગલંસું ઉજ્જોતેસિ, બુદ્ધં તં પણમામ્યહં.૧૮.

મહગ્ઘ મઙ્ગલોદધિ, મહન્તમઙ્ગલણ્ણવો;

મહામઙ્ગલસાગરો, બુદ્ધં તં પણમામ્યહં.૧૯.

અમઙ્ગલનિસાહન્તા, મઙ્ગલભાનુભસ્સરો;

મઙ્ગલાલોકવિકિણ્ણો, બુદ્ધં તં પણમામ્યહં.૨૦.

બાહુસચ્ચો બુજ્ઝનકો, ધમ્મચક્ખુઉપ્પાદકો;

તિભવમઙ્ગલઙ્કારી, બુદ્ધં તં પણમામ્યહં.૨૧.

મહાવત્તા પવત્તા ચ, અત્થસ્સ નિન્નેતા પભૂ;

અમતસ્સ દાતા વિઞ્ઞૂ, બુદ્ધં તં પણમામ્યહં.૨૨.

દિવા તપતિ આદિચ્ચો, રત્તિં દિપ્પતિ ચન્દિમા;

રત્તિંદિવં તપિ નાથો, બુદ્ધં તં પણમામ્યહં.૨૩.

સન્નદ્ધો ખત્તિયો તપતિ, ઝાયી તપતિ બ્રાહ્મણો;

નિરન્તરં તપિ નાથો, બુદ્ધં તં પણમામ્યહં.૨૪.

દુક્ખદોમનસ્સનાસી, સોકપરિદેવક્ખયો;

જાતિમચ્ચુજરાતિગો, બુદ્ધં તં પણમામ્યહં.૨૫.

યથાવાદી તથાકારી, તથવાદી તથાગતો;

યથાકારી તથાવાદી, બુદ્ધં તં પણમામ્યહં.૨૬.

ભગ્ગરાગો ભગ્ગદોસો, ભગ્ગમોહો સો ભગવા;

ભગ્ગમાનો ભગ્ગમાયો, બુદ્ધં તં પણમામ્યહં.૨૭.

ભગ્ગકામો ભગ્ગકોધો, ભગ્ગકોપો ભગ્ગકુહો;

ભગ્ગકસાવો ભગ્ગિન્ધો, બુદ્ધં તં પણમામ્યહં.૨૮.

ભગ્ગજાતિ ભગ્ગમચ્ચૂ, ભગ્ગલોકો ભગ્ગભવો;

ભગ્ગસંસારો ભગ્ગોઘો, બુદ્ધં તં પણમામ્યહં.૨૯.

ભોગભગ્ગો સોકભગ્ગો, રોગભગ્ગો ભગ્ગરજો;

સૂલભગ્ગો સલ્લભગ્ગો, બુદ્ધં તં પણમામ્યહં.૩૦.

આસાભગ્ગો ઇસ્સાભગ્ગો, એજાભગ્ગો ભગ્ગજટા;

છન્દભગ્ગો બન્ધભગ્ગો, બુદ્ધં તં પણમામ્યહં.૩૧.

વીતરાગો વીતદોસો, વીતમોહો વીતાસવો;

વીતકામો વીતકોધો, બુદ્ધં તં પણમામ્યહં.૩૨.

વીતપાપો વીતપુઞ્ઞો, વીતભારો વીતમલો;

વીતવિકારો વીતિન્ધો, બુદ્ધં તં પણમામ્યહં.૩૩.

વન્તરાગો વન્તદોસો, વન્તમોહો વન્તમલો;

વન્તકસાવો વન્તીઘો, બુદ્ધં તં પણમામ્યહં.૩૪.

વન્તરાગો વન્તદોસો, વન્તમોહો વન્તમલો;

વન્તકસાવો વન્તીઘો, બુદ્ધં તં પણમામ્યહં.૩૫.

સગ્ગુરુ તિલોકગુરુ, સબ્બસત્તાનમગ્ગગુરૂ;

નેતારેસુ મહાનેતા, બુદ્ધં તં પણમામ્યહં.૩૬.

મહાગુરુ નરગુરુ, દેવગુરુ ગુરુત્તમો!

જેટ્ઠગુરુ સેટ્ઠગુરુ, બુદ્ધં તં પણમામ્યહં.૩૭.

વિસ્સગુરુ લોકગુરુ, ધમ્મગુરુ ગુરૂત્તમો;

નત્થિ એતાદિસો ગુરુ, બુદ્ધં તં પણમામ્યહં.૩૮.

મહાસત્થા મહાસોત્થિ, મહામિત્તો મહાસખા;

મહાકલ્યાણમિત્તો યો, બુદ્ધં તં પણમામ્યહં.૩૯.

મહાપઞ્ઞો મહાવિઞ્ઞૂ, મહાવિદ્વા મહાવિદૂ;

મહામેધાવી સુમેધો, બુદ્ધં તં પણમામ્યહં.૪૦.

મહાસુદ્ધો મહાભદ્દો, મહાદયો મહાસયો;

મહાદિબ્બો મહાભબ્બો, બુદ્ધં તં પણમામ્યહં.૪૧.

મહાવીરો મહાધીરો, મહાસૂરો મહબ્બલો;

મહામારચમૂ મદ્દિ, બુદ્ધં તં પણમામ્યહં.૪૨.

મહાજેટ્ઠો મહાસેટ્ઠો, મહગ્ગો મહાનાયકો;

મહાછેકો મહાદક્ખો, બુદ્ધં તં પણમામ્યહં.૪૩.

મહાબ્યત્તો મહાઞાતો, મહાખ્યાતો મહાયસી;

મહિદ્ધો મહાવિખ્યાતો, બુદ્ધં તં પણમામ્યહં.૪૪.

મહાતુટ્ઠો મહાહટ્ઠો, મહાજવો મહાજયો;

મહાસન્તુટ્ઠો વિસિટ્ઠો, બુદ્ધં તં પણમામ્યહં.૪૫.

મહાનાથો મહાસામી, મહાપભૂ મહાવિભૂ;

મહિસ્સરો બોધિસ્સરો, બુદ્ધં તં પણમામ્યહં.૪૬.

મહાવણ્ણો મહાકન્તો, મનોપિયો મનાપિકો;

મહાસોભનો મનુઞ્ઞો, બુદ્ધં તં પણમામ્યહં.૪૭.

મહાઝાયી મહાઞાણી, મહાધીમા મહાસુધી;

મહાવિભાવી મેધાવી, બુદ્ધં તં પણમામ્યહં.૪૮.

મહાખન્તી ચ તિતિક્ખો, મહાનિક્કઙ્ખો ધમ્મગૂ;

મહાસંયતો સંવુતો, બુદ્ધં તં પણમામ્યહં.૪૯.

મહાથોમિતો પૂજિતો, મહામાનિતો વન્દિતો;

મહાભિવાદિતો ભિય્યો, બુદ્ધં તં પણમામ્યહં.૫૦.

મહતત્થો મહત્થિકો, મહન્તત્થો મહત્તરો;

મહન્તો મહત્તપ્પત્તો, બુદ્ધં તં પણમામ્યહં.૫૧.

મહાલાભી મહાકારી, મહાદાયી મહાધની;

મહાવિજ્જો મહાપુજ્જો, બુદ્ધં તં પણમામ્યહં.૫૨.

મહાબુદ્ધિ મહાબુધા, મહાપબોધિપુઙ્ગવો;

મહાભવણ્ણવં તિણ્ણો, બુદ્ધં તં પણમામ્યહં.૫૩.

મહાનાગો મહાભાગો, મહાબાહો મહિદ્ધિકો;

મહાયોધો મહગ્ગતો, બુદ્ધં તં પણમામ્યહં.૫૪.

મહાદન્તો મહાસન્તો, મહાગણી મહાગુણી;

મહાસન્તિપદાયકો, બુદ્ધં તં પણમામ્યહં.૫૫.

મહાસીલો મહાચિત્તો, મહાબુધો મહેસિનો;

મહામોહોદધિં તિણ્ણો, બુદ્ધં તં પણમામ્યહં.૫૬.

મહાતપસ્સી ધમ્મેસી, મહાયસસ્સી નાયકો;

મહાપતાપી તેજસ્સી, બુદ્ધં તં પણમામ્યહં.૫૭.

મહાઆભો મહાપભો, મોહન્ધકારભિન્દકો;

ઞાણપદીપં દીપેસિ, બુદ્ધં તં પણમામ્યહં.૫૮.

મહાપસ્સદ્ધિદાયકો, મુનિરાજા મુનિસ્સરો;

સન્તિદદો સુખદદો, બુદ્ધં તં પણમામ્યહં.૫૯.

મહાનીવરણા’તીતો, મહામોહસમૂહતો;

મહોઘતિણ્ણો મોક્ખકો, બુદ્ધં તં પણમામ્યહં.૬૦.

મહાભવોપધિચત્તો, લોભદોસવિનાસકો;

મહારિપું નિમદ્દેસિ, બુદ્ધં તં પણમામ્યહં.૬૧.

મહા’ભિઞ્ઞાબલપ્પત્તો, મહામઞ્ઞિતનાસકો;

મહાસદ્ધમં નિદ્દિસિ, બુદ્ધં તં પણમામ્યહં.૬૨.

અહોરત્તિં સદાસુદ્ધો, મહાલોકગ્ગનાયકો;

સમત્તવિસ્સવિસ્સુતો, બુદ્ધં તં પણમામ્યહં.૬૩.

મહાઅવિજ્જાઉચ્છિન્નો, મહાઆસત્તિરિઞ્ચકો;

મહાજટા વિજટેસિ, બુદ્ધં તં પણમામ્યહં.૬૪.

મહાસૂલવિવત્તકો, મહાસલ્લવિનોદનો;

મહાસવં બ્યન્તિકરો, બુદ્ધં તં પણમામ્યહં.૬૫.

મહાપરક્કમી સૂરો, સબ્બથા અપરાજયો;

અચ્ચન્તઅભયો વીરો, બુદ્ધં તં પણમામ્યહં.૬૬.

મહાતણ્હાવીતિવત્તો, મહાસોકપનૂદનો;

મહાદુક્ખમતિક્કન્તો, બુદ્ધં તં પણમામ્યહં.૬૭.

મહામાનમતિક્કમો, મારસેનનિમ્મદ્દનો;

કમ્મક્લેસં નિજ્જરેસિ, બુદ્ધં તં પણમામ્યહં.૬૮.

મહાભવોદધિત્તિણ્ણો, પાપણ્ણવપારઙ્ગતો;

મહાસંસરણાતિગો, બુદ્ધં તં પણમામ્યહં.૬૯.

મહાસંયોજનાતીતો, મહાવટ્ટવિનાસકો;

મહાસંસારોઘતિણ્ણો, બુદ્ધં તં પણમામ્યહં.૭૦.

મહારાગવિરઞ્જકો, મહાદોસનિમ્મદ્દકો;

મહાસોતં વિસોસેસિ, બુદ્ધં તં પણમામ્યહં.૭૧.

મહામેત્તાવિહારી યો, મહાપુઞ્ઞો મહારહો;

મહાકરુણાસાગરો, બુદ્ધં તં પણમામ્યહં.૭૨.

મહાભવસિન્ધુલઙ્ઘી, ભવમુત્તો ભવન્તગૂ;

સોકસૂલસમુચ્છિન્નો, બુદ્ધં તં પણમામ્યહં.૭૩.