૧૧. તિકવગ્ગો

૧. રાગસુત્તં

૧૦૭. ‘‘તયોમે, ભિક્ખવે, ધમ્મા. કતમે તયો? રાગો, દોસો, મોહો. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? રાગસ્સ પહાનાય અસુભા ભાવેતબ્બા, દોસસ્સ પહાનાય મેત્તા ભાવેતબ્બા, મોહસ્સ પહાનાય પઞ્ઞા ભાવેતબ્બા. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. પઠમં.

૨. દુચ્ચરિતસુત્તં

૧૦૮. ‘‘તયોમે, ભિક્ખવે, ધમ્મા. કતમે તયો? કાયદુચ્ચરિતં, વચીદુચ્ચરિતં, મનોદુચ્ચરિતં. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? કાયદુચ્ચરિતસ્સ પહાનાય કાયસુચરિતં ભાવેતબ્બં, વચીદુચ્ચરિતસ્સ પહાનાય વચીસુચરિતં ભાવેતબ્બં, મનોદુચ્ચરિતસ્સ પહાનાય મનોસુચરિતં ભાવેતબ્બં. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. દુતિયં.

૩. વિતક્કસુત્તં

૧૦૯. ‘‘તયોમે, ભિક્ખવે, ધમ્મા. કતમે તયો? કામવિતક્કો, બ્યાપાદવિતક્કો, વિહિંસાવિતક્કો. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? કામવિતક્કસ્સ પહાનાય નેક્ખમ્મવિતક્કો ભાવેતબ્બો, બ્યાપાદવિતક્કસ્સ પહાનાય અબ્યાપાદવિતક્કો ભાવેતબ્બો, વિહિંસાવિતક્કસ્સ પહાનાય અવિહિંસાવિતક્કો ભાવેતબ્બો. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. તતિયં.

૪. સઞ્ઞાસુત્તં

૧૧૦. ‘‘તયોમે, ભિક્ખવે, ધમ્મા. કતમે તયો? કામસઞ્ઞા, બ્યાપાદસઞ્ઞા, વિહિંસાસઞ્ઞા. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? કામસઞ્ઞાય પહાનાય નેક્ખમ્મસઞ્ઞા ભાવેતબ્બા, બ્યાપાદસઞ્ઞાય પહાનાય અબ્યાપાદસઞ્ઞા ભાવેતબ્બા, વિહિંસાસઞ્ઞાય પહાનાય અવિહિંસાસઞ્ઞા ભાવેતબ્બા. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. ચતુત્થં.

૫. ધાતુસુત્તં

૧૧૧. ‘‘તયોમે, ભિક્ખવે, ધમ્મા. કતમે તયો? કામધાતુ, બ્યાપાદધાતુ, વિહિંસાધાતુ. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? કામધાતુયા પહાનાય નેક્ખમ્મધાતુ ભાવેતબ્બા, બ્યાપાદધાતુયા પહાનાય અબ્યાપાદધાતુ ભાવેતબ્બા, વિહિંસાધાતુયા પહાનાય અવિહિંસાધાતુ ભાવેતબ્બા. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. પઞ્ચમં.

૬. અસ્સાદસુત્તં

૧૧૨. ‘‘તયોમે, ભિક્ખવે, ધમ્મા. કતમે તયો? અસ્સાદદિટ્ઠિ, અત્તાનુદિટ્ઠિ, મિચ્છાદિટ્ઠિ. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? અસ્સાદદિટ્ઠિયા પહાનાય અનિચ્ચસઞ્ઞા ભાવેતબ્બા, અત્તાનુદિટ્ઠિયા પહાનાય અનત્તસઞ્ઞા ભાવેતબ્બા, મિચ્છાદિટ્ઠિયા પહાનાય સમ્માદિટ્ઠિ ભાવેતબ્બા. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. છટ્ઠં.

૭. અરતિસુત્તં

૧૧૩. ‘‘તયોમે, ભિક્ખવે, ધમ્મા. કતમે તયો? અરતિ, વિહિંસા [વિહેસા (ક.)], અધમ્મચરિયા. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? અરતિયા પહાનાય મુદિતા ભાવેતબ્બા, વિહિંસાય પહાનાય અવિહિંસા ભાવેતબ્બા, અધમ્મચરિયાય પહાનાય ધમ્મચરિયા ભાવેતબ્બા. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. સત્તમં.

૮. સન્તુટ્ઠિતાસુત્તં

૧૧૪. ‘‘તયોમે, ભિક્ખવે, ધમ્મા. કતમે તયો? અસન્તુટ્ઠિતા, અસમ્પજઞ્ઞં, મહિચ્છતા. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? અસન્તુટ્ઠિતાય પહાનાય સન્તુટ્ઠિતા ભાવેતબ્બા, અસમ્પજઞ્ઞસ્સ પહાનાય સમ્પજઞ્ઞં ભાવેતબ્બં, મહિચ્છતાય પહાનાય અપ્પિચ્છતા ભાવેતબ્બા. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. અટ્ઠમં.

૯. દોવચસ્સતાસુત્તં

૧૧૫. ‘‘તયોમે, ભિક્ખવે, ધમ્મા. કતમે તયો? દોવચસ્સતા, પાપમિત્તતા, ચેતસો વિક્ખેપો. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? દોવચસ્સતાય પહાનાય સોવચસ્સતા ભાવેતબ્બા, પાપમિત્તતાય પહાનાય કલ્યાણમિત્તતા ભાવેતબ્બા, ચેતસો વિક્ખેપસ્સ પહાનાય આનાપાનસ્સતિ ભાવેતબ્બા. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. નવમં.

૧૦. ઉદ્ધચ્ચસુત્તં

૧૧૬. ‘‘તયોમે, ભિક્ખવે, ધમ્મા. કતમે તયો? ઉદ્ધચ્ચં, અસંવરો, પમાદો. ઇમે ખો, ભિક્ખવે, તયો ધમ્મા. ઇમેસં ખો, ભિક્ખવે, તિણ્ણં ધમ્માનં પહાનાય તયો ધમ્મા ભાવેતબ્બા. કતમે તયો? ઉદ્ધચ્ચસ્સ પહાનાય સમથો ભાવેતબ્બો, અસંવરસ્સ પહાનાય સંવરો ભાવેતબ્બો, પમાદસ્સ પહાનાય અપ્પમાદો ભાવેતબ્બો. ઇમેસં ખો, ભિક્ખવે, તિણ્ણં ધમ્માનં પહાનાય ઇમે તયો ધમ્મા ભાવેતબ્બા’’તિ. દસમં.

તિકવગ્ગો એકાદસમો. [પઠમો (સ્યા.)]