૮. આરઞ્ઞકસુત્તં

૯૮. ‘‘પઞ્ચહિ, ભિક્ખવે, ધમ્મેહિ સમન્નાગતો ભિક્ખુ આનાપાનસ્સતિં બહુલીકરોન્તો નચિરસ્સેવ અકુપ્પં પટિવિજ્ઝતિ. કતમેહિ પઞ્ચહિ? ઇધ, ભિક્ખવે, ભિક્ખુ અપ્પટ્ઠો હોતિ અપ્પકિચ્ચો સુભરો સુસન્તોસો જીવિતપરિક્ખારેસુ; અપ્પાહારો હોતિ અનોદરિકત્તં અનુયુત્તો; અપ્પમિદ્ધો હોતિ જાગરિયં અનુયુત્તો; આરઞ્ઞકો હોતિ પન્તસેનાસનો; યથાવિમુત્તં ચિત્તં પચ્ચવેક્ખતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો ભિક્ખુ આનાપાનસ્સતિં બહુલીકરોન્તો નચિરસ્સેવ અકુપ્પં પટિવિજ્ઝતી’’તિ. અટ્ઠમં.