(૯) ૪. થેરવગ્ગો

૧. રજનીયસુત્તં

૮૧. ‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ. કતમેહિ પઞ્ચહિ? રજનીયે રજ્જતિ, દુસ્સનીયે [દુસનીયે (સી. સ્યા. કં. પી.)] દુસ્સતિ, મોહનીયે મુય્હતિ, કુપ્પનીયે [કુપનીયે (સી. સ્યા. કં.), કોપનીયે (પી.)] કુપ્પતિ, મદનીયે મજ્જતિ – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ.

‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચ. કતમેહિ પઞ્ચહિ? રજનીયે ન રજ્જતિ, દુસ્સનીયે ન દુસ્સતિ, મોહનીયે ન મુય્હતિ, કુપ્પનીયે ન કુપ્પતિ, મદનીયે ન મજ્જતિ – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચા’’તિ. પઠમં.

૨. વીતરાગસુત્તં

૮૨. ‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ. કતમેહિ પઞ્ચહિ? અવીતરાગો હોતિ, અવીતદોસો હોતિ, અવીતમોહો હોતિ, મક્ખી ચ, પળાસી ચ – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ.

‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચ. કતમેહિ પઞ્ચહિ? વીતરાગો હોતિ, વીતદોસો હોતિ, વીતમોહો હોતિ, અમક્ખી ચ, અપળાસી ચ – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચા’’તિ. દુતિયં.

૩. કુહકસુત્તં

૮૩. ‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ. કતમેહિ પઞ્ચહિ? કુહકો ચ હોતિ, લપકો ચ, નેમિત્તિકો [નિમિત્તિકો (સ્યા. કં.), નિમિત્તકો (ક.)] ચ, નિપ્પેસિકો ચ, લાભેન ચ લાભં નિજિગીસિતા [નિજિગિંસિતા (સી. સ્યા. કં. પી.)] – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ.

‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચ. કતમેહિ પઞ્ચહિ? ન ચ કુહકો હોતિ, ન ચ લપકો, ન ચ નેમિત્તિકો, ન ચ નિપ્પેસિકો, ન ચ લાભેન લાભં નિજિગીસિતા – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચા’’તિ. તતિયં.

૪. અસ્સદ્ધસુત્તં

૮૪. ‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ, અમનાપો ચ અગરુ ચ અભાવનીયો ચ. કતમેહિ પઞ્ચહિ? અસ્સદ્ધો હોતિ, અહિરિકો હોતિ, અનોત્તપ્પી હોતિ, કુસીતો હોતિ, દુપ્પઞ્ઞો હોતિ – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ.

‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચ. કતમેહિ પઞ્ચહિ? સદ્ધો હોતિ, હિરીમા હોતિ, ઓત્તપ્પી હોતિ, આરદ્ધવીરિયો હોતિ, પઞ્ઞવા હોતિ – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચા’’તિ. ચતુત્થં.

૫. અક્ખમસુત્તં

૮૫. ‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ. કતમેહિ પઞ્ચહિ? અક્ખમો હોતિ રૂપાનં, અક્ખમો સદ્દાનં, અક્ખમો ગન્ધાનં, અક્ખમો રસાનં, અક્ખમો ફોટ્ઠબ્બાનં – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં અપ્પિયો ચ હોતિ અમનાપો ચ અગરુ ચ અભાવનીયો ચ.

‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચ. કતમેહિ પઞ્ચહિ? ખમો હોતિ રૂપાનં, ખમો સદ્દાનં, ખમો ગન્ધાનં, ખમો રસાનં, ખમો ફોટ્ઠબ્બાનં – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચા’’તિ. પઞ્ચમં.

૬. પટિસમ્ભિદાપત્તસુત્તં

૮૬. ‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચ. કતમેહિ પઞ્ચહિ? અત્થપટિસમ્ભિદાપત્તો હોતિ, ધમ્મપટિસમ્ભિદાપત્તો હોતિ, નિરુત્તિપટિસમ્ભિદાપત્તો હોતિ, પટિભાનપટિસમ્ભિદાપત્તો હોતિ, યાનિ તાનિ સબ્રહ્મચારીનં ઉચ્ચાવચાનિ કિંકરણીયાનિ તત્થ દક્ખો હોતિ અનલસો તત્રુપાયાય વીમંસાય સમન્નાગતો અલં કાતું અલં સંવિધાતું – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચા’’તિ. છટ્ઠં.

૭. સીલવન્તસુત્તં

૮૭. ‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચ. કતમેહિ પઞ્ચહિ? સીલવા હોતિ, પાતિમોક્ખસંવરસંવુતો વિહરતિ. આચારગોચરસમ્પન્નો અણુમત્તેસુ વજ્જેસુ ભયદસ્સાવી, સમાદાય સિક્ખતિ સિક્ખાપદેસુ; બહુસ્સુતો હોતિ સુતધરો સુતસન્નિચયો, યે તે ધમ્મા આદિકલ્યાણા મજ્ઝેકલ્યાણા પરિયોસાનકલ્યાણા સાત્થં સબ્યઞ્જનં [સાત્થા સબ્યઞ્જના (સી.)] કેવલપરિપુણ્ણં પરિસુદ્ધં બ્રહ્મચરિયં અભિવદન્તિ, તથારૂપાસ્સ ધમ્મા બહુસ્સુતા હોન્તિ ધાતા [ધતા (સી. સ્યા. કં. પી.)] વચસા પરિચિતા મનસાનુપેક્ખિતા દિટ્ઠિયા સુપ્પટિવિદ્ધા; કલ્યાણવાચો હોતિ કલ્યાણવાક્કરણો પોરિયા વાચાય સમન્નાગતો વિસ્સટ્ઠાય અનેલગળાય અત્થસ્સ વિઞ્ઞાપનિયા; ચતુન્નં ઝાનાનં આભિચેતસિકાનં દિટ્ઠધમ્મસુખવિહારાનં નિકામલાભી હોતિ અકિચ્છલાભી અકસિરલાભી; આસવાનં ખયા અનાસવં ચેતોવિમુત્તિં પઞ્ઞાવિમુત્તિં દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહરતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ સબ્રહ્મચારીનં પિયો ચ હોતિ મનાપો ચ ગરુ ચ ભાવનીયો ચા’’તિ. સત્તમં.

૮. થેરસુત્તં

૮૮. ‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ બહુજનઅહિતાય પટિપન્નો હોતિ બહુજનઅસુખાય બહુનો જનસ્સ અનત્થાય અહિતાય દુક્ખાય દેવમનુસ્સાનં.

‘‘કતમેહિ પઞ્ચહિ? થેરો હોતિ રત્તઞ્ઞૂ ચિરપબ્બજિતો; ઞાતો હોતિ યસસ્સી સગહટ્ઠપબ્બજિતાનં [ગહટ્ઠપબ્બજિતાનં (સી.)] બહુજનપરિવારો; લાભી હોતિ ચીવરપિણ્ડપાતસેનાસનગિલાનપ્પચ્ચયભેસજ્જપરિક્ખારાનં; બહુસ્સુતો હોતિ સુતધરો સુતસન્નિચયો, યે તે ધમ્મા આદિકલ્યાણા મજ્ઝેકલ્યાણા પરિયોસાનકલ્યાણા સાત્થં સબ્યઞ્જનં કેવલપરિપુણ્ણં પરિસુદ્ધં બ્રહ્મચરિયં અભિવદન્તિ, તથારૂપાસ્સ ધમ્મા બહુસ્સુતા હોન્તિ ધાતા વચસા પરિચિતા મનસાનુપેક્ખિતા દિટ્ઠિયા અપ્પટિવિદ્ધા; મિચ્છાદિટ્ઠિકો હોતિ વિપરીતદસ્સનો, સો બહુજનં સદ્ધમ્મા વુટ્ઠાપેત્વા અસદ્ધમ્મે પતિટ્ઠાપેતિ. થેરો ભિક્ખુ રત્તઞ્ઞૂ ચિરપબ્બજિતો ઇતિપિસ્સ દિટ્ઠાનુગતિં આપજ્જન્તિ, ઞાતો થેરો ભિક્ખુ યસસ્સી સગહટ્ઠપબ્બજિતાનં બહુજનપરિવારો ઇતિપિસ્સ દિટ્ઠાનુગતિં આપજ્જન્તિ, લાભી થેરો ભિક્ખુ ચીવરપિણ્ડપાતસેનાસનગિલાનપ્પચ્ચયભેસજ્જપરિક્ખારાનં ઇતિપિસ્સ દિટ્ઠાનુગતિં આપજ્જન્તિ, બહુસ્સુતો થેરો ભિક્ખુ સુતધરો સુતસન્નિચયો ઇતિપિસ્સ દિટ્ઠાનુગતિં આપજ્જન્તિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ બહુજનઅહિતાય પટિપન્નો હોતિ બહુજનઅસુખાય બહુનો જનસ્સ અનત્થાય અહિતાય દુક્ખાય દેવમનુસ્સાનં.

‘‘પઞ્ચહિ, ભિક્ખવે, ધમ્મેહિ સમન્નાગતો થેરો ભિક્ખુ બહુજનહિતાય પટિપન્નો હોતિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.

‘‘કતમેહિ પઞ્ચહિ? થેરો હોતિ રત્તઞ્ઞૂ ચિરપબ્બજિતો; ઞાતો હોતિ યસસ્સી સગહટ્ઠપબ્બજિતાનં બહુજનપરિવારો; લાભી હોતિ ચીવરપિણ્ડપાતસેનાસનગિલાનપ્પચ્ચયભેસજ્જપરિક્ખારાનં; બહુસ્સુતો હોતિ સુતધરો સુતસન્નિચયો, યે તે ધમ્મા આદિકલ્યાણા મજ્ઝેકલ્યાણા પરિયોસાનકલ્યાણા સાત્થં સબ્યઞ્જનં કેવલપરિપુણ્ણં પરિસુદ્ધં બ્રહ્મચરિયં અભિવદન્તિ, તથારૂપાસ્સ ધમ્મા બહુસ્સુતા હોન્તિ ધાતા વચસા પરિચિતા મનસાનુપેક્ખિતા દિટ્ઠિયા સુપ્પટિવિદ્ધા; સમ્માદિટ્ઠિકો હોતિ અવિપરીતદસ્સનો, સો બહુજનં અસદ્ધમ્મા વુટ્ઠાપેત્વા સદ્ધમ્મે પતિટ્ઠાપેતિ. થેરો ભિક્ખુ રત્તઞ્ઞૂ ચિરપબ્બજિતો ઇતિપિસ્સ દિટ્ઠાનુગતિં આપજ્જન્તિ, ઞાતો થેરો ભિક્ખુ યસસ્સી સગહટ્ઠપબ્બજિતાનં બહુજનપરિવારો ઇતિપિસ્સ દિટ્ઠાનુગતિં આપજ્જન્તિ, લાભી થેરો ભિક્ખુ ચીવરપિણ્ડપાતસેનાસનગિલાનપ્પચ્ચયભેસજ્જપરિક્ખારાનં ઇતિપિસ્સ દિટ્ઠાનુગતિં આપજ્જન્તિ, બહુસ્સુતો થેરો ભિક્ખુ સુતધરો સુતસન્નિચયો ઇતિપિસ્સ દિટ્ઠાનુગતિં આપજ્જન્તિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો થેરો ભિક્ખુ બહુજનહિતાય પટિપન્નો હોતિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાન’’ન્તિ. અટ્ઠમં.

૯. પઠમસેખસુત્તં

૮૯. ‘‘પઞ્ચિમે, ભિક્ખવે, ધમ્મા સેખસ્સ ભિક્ખુનો પરિહાનાય સંવત્તન્તિ. કતમે પઞ્ચ? કમ્મારામતા, ભસ્સારામતા, નિદ્દારામતા, સઙ્ગણિકારામતા, યથાવિમુત્તં ચિત્તં ન પચ્ચવેક્ખતિ – ઇમે ખો, ભિક્ખવે, પઞ્ચ ધમ્મા સેખસ્સ ભિક્ખુનો પરિહાનાય સંવત્તન્તિ.

‘‘પઞ્ચિમે, ભિક્ખવે, ધમ્મા સેખસ્સ ભિક્ખુનો અપરિહાનાય સંવત્તન્તિ. કતમે પઞ્ચ? ન કમ્મારામતા, ન ભસ્સારામતા, ન નિદ્દારામતા, ન સઙ્ગણિકારામતા, યથાવિમુત્તં ચિત્તં પચ્ચવેક્ખતિ – ઇમે ખો, ભિક્ખવે, પઞ્ચ ધમ્મા સેખસ્સ ભિક્ખુનો અપરિહાનાય સંવત્તન્તી’’તિ. નવમં.

૧૦. દુતિયસેખસુત્તં

૯૦. ‘‘પઞ્ચિમે, ભિક્ખવે, ધમ્મા સેખસ્સ ભિક્ખુનો પરિહાનાય સંવત્તન્તિ. કતમે પઞ્ચ? ઇધ, ભિક્ખવે, સેખો ભિક્ખુ બહુકિચ્ચો હોતિ બહુકરણીયો વિયત્તો કિંકરણીયેસુ; રિઞ્ચતિ પટિસલ્લાનં, નાનુયુઞ્જતિ અજ્ઝત્તં ચેતોસમથં. અયં, ભિક્ખવે, પઠમો ધમ્મો સેખસ્સ ભિક્ખુનો પરિહાનાય સંવત્તતિ.

‘‘પુન ચપરં, ભિક્ખવે, સેખો ભિક્ખુ અપ્પમત્તકેન કમ્મેન દિવસં અતિનામેતિ; રિઞ્ચતિ પટિસલ્લાનં, નાનુયુઞ્જતિ અજ્ઝત્તં ચેતોસમથં. અયં, ભિક્ખવે, દુતિયો ધમ્મો સેખસ્સ ભિક્ખુનો પરિહાનાય સંવત્તતિ.

‘‘પુન ચપરં, ભિક્ખવે, સેખો ભિક્ખુ સંસટ્ઠો વિહરતિ ગહટ્ઠપબ્બજિતેહિ અનનુલોમિકેન ગિહિસંસગ્ગેન; રિઞ્ચતિ પટિસલ્લાનં, નાનુયુઞ્જતિ અજ્ઝત્તં ચેતોસમથં. અયં, ભિક્ખવે, તતિયો ધમ્મો સેખસ્સ ભિક્ખુનો પરિહાનાય સંવત્તતિ.

‘‘પુન ચપરં, ભિક્ખવે, સેખો ભિક્ખુ અકાલેન ગામં પવિસતિ, અતિદિવા પટિક્કમતિ; રિઞ્ચતિ પટિસલ્લાનં, નાનુયુઞ્જતિ અજ્ઝત્તં ચેતોસમથં. અયં, ભિક્ખવે, ચતુત્થો ધમ્મો સેખસ્સ ભિક્ખુનો પરિહાનાય સંવત્તતિ.

‘‘પુન ચપરં, ભિક્ખવે, સેખો ભિક્ખુ યાયં કથા આભિસલ્લેખિકા ચેતોવિવરણસપ્પાયા, સેય્યથિદં – અપ્પિચ્છકથા સન્તુટ્ઠિકથા પવિવેકકથા અસંસગ્ગકથા વીરિયારમ્ભકથા સીલકથા સમાધિકથા પઞ્ઞાકથા વિમુત્તિકથા વિમુત્તિઞાણદસ્સનકથા, એવરૂપિયા કથાય ન નિકામલાભી હોતિ ન અકિચ્છલાભી ન અકસિરલાભી [કિચ્છલાભી કસિરલાભી (સી. સ્યા. કં. પી)]; રિઞ્ચતિ પટિસલ્લાનં, નાનુયુઞ્જતિ અજ્ઝત્તં ચેતોસમથં. અયં, ભિક્ખવે, પઞ્ચમો ધમ્મો સેખસ્સ ભિક્ખુનો પરિહાનાય સંવત્તતિ. ઇમે ખો, ભિક્ખવે, પઞ્ચ ધમ્મા સેખસ્સ ભિક્ખુનો પરિહાનાય સંવત્તન્તિ.

‘‘પઞ્ચિમે, ભિક્ખવે, ધમ્મા સેખસ્સ ભિક્ખુનો અપરિહાનાય સંવત્તન્તિ. કતમે પઞ્ચ? ઇધ, ભિક્ખવે, સેખો ભિક્ખુ ન બહુકિચ્ચો હોતિ ન બહુકરણીયો વિયત્તો કિંકરણીયેસુ; ન રિઞ્ચતિ પટિસલ્લાનં, અનુયુઞ્જતિ અજ્ઝત્તં ચેતોસમથં. અયં, ભિક્ખવે, પઠમો ધમ્મો સેખસ્સ ભિક્ખુનો અપરિહાનાય સંવત્તતિ.

‘‘પુન ચપરં, ભિક્ખવે, સેખો ભિક્ખુ ન અપ્પમત્તકેન કમ્મેન દિવસં અતિનામેતિ; ન રિઞ્ચતિ પટિસલ્લાનં, અનુયુઞ્જતિ અજ્ઝત્તં ચેતોસમથં. અયં, ભિક્ખવે, દુતિયો ધમ્મો સેખસ્સ ભિક્ખુનો અપરિહાનાય સંવત્તતિ.

‘‘પુન ચપરં, ભિક્ખવે, સેખો ભિક્ખુ અસંસટ્ઠો વિહરતિ ગહટ્ઠપબ્બજિતેહિ અનનુલોમિકેન ગિહિસંસગ્ગેન; ન રિઞ્ચતિ પટિસલ્લાનં, અનુયુઞ્જતિ અજ્ઝત્તં ચેતોસમથં. અયં, ભિક્ખવે, તતિયો ધમ્મો સેખસ્સ ભિક્ખુનો અપરિહાનાય સંવત્તતિ.

‘‘પુન ચપરં, ભિક્ખવે, સેખો ભિક્ખુ ન અતિકાલેન ગામં પવિસતિ, નાતિદિવા પટિક્કમતિ; ન રિઞ્ચતિ પટિસલ્લાનં, અનુયુઞ્જતિ અજ્ઝત્તં ચેતોસમથં. અયં, ભિક્ખવે, ચતુત્થો ધમ્મો સેખસ્સ ભિક્ખુનો અપરિહાનાય સંવત્તતિ.

‘‘પુન ચપરં, ભિક્ખવે, સેખો ભિક્ખુ યાયં કથા આભિસલ્લેખિકા ચેતોવિવરણસપ્પાયા, સેય્યથિદં – અપ્પિચ્છકથા સન્તુટ્ઠિકથા પવિવેકકથા અસંસગ્ગકથા વીરિયારમ્ભકથા સીલકથા સમાધિકથા પઞ્ઞાકથા વિમુત્તિકથા વિમુત્તિઞાણદસ્સનકથા, એવરૂપિયા કથાય નિકામલાભી હોતિ અકિચ્છલાભી અકસિરલાભી; ન રિઞ્ચતિ પટિસલ્લાનં, અનુયુઞ્જતિ અજ્ઝત્તં ચેતોસમથં. અયં, ભિક્ખવે, પઞ્ચમો ધમ્મો સેખસ્સ ભિક્ખુનો અપરિહાનાય સંવત્તતિ. ઇમે ખો, ભિક્ખવે, પઞ્ચ ધમ્મા સેખસ્સ ભિક્ખુનો અપરિહાનાય સંવત્તન્તી’’તિ. દસમં.

થેરવગ્ગો ચતુત્થો.