(૮) ૩. અપણ્ણકવગ્ગો

૧. પધાનસુત્તં

૭૧. ‘‘ચતૂહિ, ભિક્ખવે, ધમ્મેહિ સમન્નાગતો ભિક્ખુ અપણ્ણકપ્પટિપદં પટિપન્નો હોતિ, યોનિ ચસ્સ આરદ્ધા હોતિ આસવાનં ખયાય. કતમેહિ ચતૂહિ? ઇધ, ભિક્ખવે, ભિક્ખુ સીલવા હોતિ, બહુસ્સુતો હોતિ, આરદ્ધવીરિયો હોતિ, પઞ્ઞવા હોતિ. ઇમેહિ ખો, ભિક્ખવે, ચતૂહિ ધમ્મેહિ સમન્નાગતો ભિક્ખુ અપણ્ણકપ્પટિપદં પટિપન્નો હોતિ, યોનિ ચસ્સ આરદ્ધા હોતિ આસવાનં ખયાયા’’તિ. પઠમં.

૨. સમ્માદિટ્ઠિસુત્તં

૭૨. ‘‘ચતૂહિ, ભિક્ખવે, ધમ્મેહિ સમન્નાગતો ભિક્ખુ અપણ્ણકપ્પટિપદં પટિપન્નો હોતિ, યોનિ ચસ્સ આરદ્ધા હોતિ આસવાનં ખયાય. કતમેહિ ચતૂહિ? નેક્ખમ્મવિતક્કેન, અબ્યાપાદવિતક્કેન, અવિહિંસાવિતક્કેન, સમ્માદિટ્ઠિયા – ઇમેહિ ખો, ભિક્ખવે, ચતૂહિ ધમ્મેહિ સમન્નાગતો ભિક્ખુ અપણ્ણકપ્પટિપદં પટિપન્નો હોતિ, યોનિ ચસ્સ આરદ્ધા હોતિ આસવાનં ખયાયા’’તિ. દુતિયં.

૩. સપ્પુરિસસુત્તં

૭૩. ‘‘ચતૂહિ, ભિક્ખવે, ધમ્મેહિ સમન્નાગતો અસપ્પુરિસો વેદિતબ્બો. કતમેહિ ચતૂહિ? ઇધ, ભિક્ખવે, અસપ્પુરિસો યો હોતિ પરસ્સ અવણ્ણો તં અપુટ્ઠોપિ પાતુ કરોતિ, કો પન વાદો પુટ્ઠસ્સ! પુટ્ઠો ખો પન પઞ્હાભિનીતો અહાપેત્વા અલમ્બિત્વા પરિપૂરં વિત્થારેન પરસ્સ અવણ્ણં ભાસિતા હોતિ. વેદિતબ્બમેતં, ભિક્ખવે, અસપ્પુરિસો અયં ભવન્તિ.

‘‘પુન ચપરં, ભિક્ખવે, અસપ્પુરિસો યો હોતિ પરસ્સ વણ્ણો તં પુટ્ઠોપિ ન પાતુ કરોતિ, કો પન વાદો અપુટ્ઠસ્સ! પુટ્ઠો ખો પન પઞ્હાભિનીતો હાપેત્વા લમ્બિત્વા અપરિપૂરં અવિત્થારેન પરસ્સ વણ્ણં ભાસિતા હોતિ. વેદિતબ્બમેતં, ભિક્ખવે, અસપ્પુરિસો અયં ભવન્તિ.

‘‘પુન ચપરં, ભિક્ખવે, અસપ્પુરિસો યો હોતિ અત્તનો અવણ્ણો તં પુટ્ઠોપિ ન પાતુ કરોતિ, કો પન વાદો અપુટ્ઠસ્સ! પુટ્ઠો ખો પન પઞ્હાભિનીતો હાપેત્વા લમ્બિત્વા અપરિપૂરં અવિત્થારેન અત્તનો અવણ્ણં ભાસિતા હોતિ. વેદિતબ્બમેતં, ભિક્ખવે, અસપ્પુરિસો અયં ભવન્તિ.

‘‘પુન ચપરં, ભિક્ખવે, અસપ્પુરિસો યો હોતિ અત્તનો વણ્ણો તં અપુટ્ઠોપિ પાતુ કરોતિ, કો પન વાદો પુટ્ઠસ્સ! પુટ્ઠો ખો પન પઞ્હાભિનીતો અહાપેત્વા અલમ્બિત્વા પરિપૂરં વિત્થારેન અત્તનો વણ્ણં ભાસિતા હોતિ. વેદિતબ્બમેતં, ભિક્ખવે, અસપ્પુરિસો અયં ભવન્તિ. ઇમેહિ ખો, ભિક્ખવે, ચતૂહિ ધમ્મેહિ સમન્નાગતો અસપ્પુરિસો વેદિતબ્બો.

‘‘ચતૂહિ, ભિક્ખવે, ધમ્મેહિ સમન્નાગતો સપ્પુરિસો વેદિતબ્બો. કતમેહિ ચતૂહિ? ઇધ, ભિક્ખવે, સપ્પુરિસો યો હોતિ પરસ્સ અવણ્ણો તં પુટ્ઠોપિ ન પાતુ કરોતિ, કો પન વાદો અપુટ્ઠસ્સ! પુટ્ઠો ખો પન પઞ્હાભિનીતો હાપેત્વા લમ્બિત્વા અપરિપૂરં અવિત્થારેન પરસ્સ અવણ્ણં ભાસિતા હોતિ. વેદિતબ્બમેતં, ભિક્ખવે, સપ્પુરિસો અયં ભવન્તિ.

‘‘પુન ચપરં, ભિક્ખવે, સપ્પુરિસો યો હોતિ પરસ્સ વણ્ણો તં અપુટ્ઠોપિ પાતુ કરોતિ, કો પન વાદો પુટ્ઠસ્સ! પુટ્ઠો ખો પન પઞ્હાભિનીતો અહાપેત્વા અલમ્બિત્વા પરિપૂરં વિત્થારેન પરસ્સ વણ્ણં ભાસિતા હોતિ. વેદિતબ્બમેતં, ભિક્ખવે, સપ્પુરિસો અયં ભવન્તિ.

‘‘પુન ચપરં, ભિક્ખવે, સપ્પુરિસો યો હોતિ અત્તનો અવણ્ણો તં અપુટ્ઠોપિ પાતુ કરોતિ, કો પન વાદો પુટ્ઠસ્સ! પુટ્ઠો ખો પન પઞ્હાભિનીતો અહાપેત્વા અલમ્બિત્વા પરિપૂરં વિત્થારેન અત્તનો અવણ્ણં ભાસિતા હોતિ. વેદિતબ્બમેતં, ભિક્ખવે, સપ્પુરિસો અયં ભવન્તિ.

‘‘પુન ચપરં, ભિક્ખવે, સપ્પુરિસો યો હોતિ અત્તનો વણ્ણો તં પુટ્ઠોપિ ન પાતુ કરોતિ, કો પન વાદો અપુટ્ઠસ્સ! પુટ્ઠો ખો પન પઞ્હાભિનીતો હાપેત્વા લમ્બિત્વા અપરિપૂરં અવિત્થારેન અત્તનો વણ્ણં ભાસિતા હોતિ. વેદિતબ્બમેતં, ભિક્ખવે, સપ્પુરિસો અયં ભવન્તિ. ઇમેહિ ખો, ભિક્ખવે, ચતૂહિ ધમ્મેહિ સમન્નાગતો સપ્પુરિસો વેદિતબ્બો.

‘‘સેય્યથાપિ, ભિક્ખવે, વધુકા યઞ્ઞદેવ રત્તિં વા દિવં વા આનીતા હોતિ, તાવદેવસ્સા તિબ્બં હિરોત્તપ્પં પચ્ચુપટ્ઠિતં હોતિ સસ્સુયાપિ સસુરેપિ સામિકેપિ અન્તમસો દાસકમ્મકરપોરિસેસુ. સા અપરેન સમયેન સંવાસમન્વાય વિસ્સાસમન્વાય સસ્સુમ્પિ સસુરમ્પિ સામિકમ્પિ એવમાહ – ‘અપેથ, કિં પન તુમ્હે જાનાથા’તિ! એવમેવં ખો, ભિક્ખવે, ઇધેકચ્ચો ભિક્ખુ યઞ્ઞદેવ રત્તિં વા દિવં વા અગારસ્મા અનગારિયં પબ્બજિતો હોતિ, તાવદેવસ્સ તિબ્બં હિરોત્તપ્પં પચ્ચુપટ્ઠિતં હોતિ ભિક્ખૂસુ ભિક્ખુનીસુ ઉપાસકેસુ ઉપાસિકાસુ અન્તમસો આરામિકસમણુદ્દેસેસુ. સો અપરેન સમયેન સંવાસમન્વાય વિસ્સાસમન્વાય આચરિયમ્પિ ઉપજ્ઝાયમ્પિ એવમાહ – ‘અપેથ, કિં પન તુમ્હે જાનાથા’તિ! તસ્માતિહ, ભિક્ખવે, એવં સિક્ખિતબ્બં – ‘અધુનાગતવધુકાસમેન ચેતસા વિહરિસ્સામા’તિ. એવઞ્હિ વો, ભિક્ખવે, સિક્ખિતબ્બ’’ન્તિ. તતિયં.

૪. પઠમઅગ્ગસુત્તં

૭૪. ‘‘ચત્તારિમાનિ, ભિક્ખવે, અગ્ગાનિ. કતમાનિ ચત્તારિ? સીલગ્ગં, સમાધિગ્ગં [સમાધગ્ગં (સી. સ્યા. કં)], પઞ્ઞાગ્ગં, વિમુત્તગ્ગં – ઇમાનિ ખો, ભિક્ખવે, ચત્તારિ અગ્ગાની’’તિ. ચતુત્થં.

૫. દુતિયઅગ્ગસુત્તં

૭૫. ‘‘ચત્તારિમાનિ, ભિક્ખવે, અગ્ગાનિ. કતમાનિ ચત્તારિ? રૂપગ્ગં, વેદનાગ્ગં, સઞ્ઞાગ્ગં, ભવગ્ગં – ઇમાનિ ખો, ભિક્ખવે, ચત્તારિ અગ્ગાની’’તિ. પઞ્ચમં.

૬. કુસિનારસુત્તં

૭૬. એકં સમયં ભગવા કુસિનારાયં વિહરતિ ઉપવત્તને મલ્લાનં સાલવને અન્તરેન યમકસાલાનં પરિનિબ્બાનસમયે. તત્ર ખો ભગવા ભિક્ખૂ આમન્તેસિ – ‘‘ભિક્ખવો’’તિ. ‘‘ભદન્તે’’તિ તે ભિક્ખૂ ભગવતો પચ્ચસ્સોસું. ભગવા એતદવોચ –

‘‘સિયા ખો પન, ભિક્ખવે [દી. નિ. ૨.૨૧૭], એકભિક્ખુસ્સપિ કઙ્ખા વા વિમતિ વા બુદ્ધે વા ધમ્મે વા સઙ્ઘે વા મગ્ગે વા પટિપદાય વા, પુચ્છથ, ભિક્ખવે, મા પચ્છા વિપ્પટિસારિનો અહુવત્થ – ‘સમ્મુખીભૂતો નો સત્થા અહોસિ, નાસક્ખિમ્હ ભગવન્તં સમ્મુખા પટિપુચ્છિતુ’’’ન્તિ. એવં વુત્તે તે ભિક્ખૂ તુણ્હી અહેસું. દુતિયમ્પિ ખો ભગવા ભિક્ખૂ આમન્તેસિ – ‘‘સિયા ખો પન, ભિક્ખવે, એકભિક્ખુસ્સપિ કઙ્ખા વા વિમતિ વા બુદ્ધે વા ધમ્મે વા સઙ્ઘે વા મગ્ગે વા પટિપદાય વા, પુચ્છથ, ભિક્ખવે, મા પચ્છા વિપ્પટિસારિનો અહુવત્થ – ‘સમ્મુખીભૂતો નો સત્થા અહોસિ, નાસક્ખિમ્હ ભગવન્તં સમ્મુખા પટિપુચ્છિતુ’’’ન્તિ. દુતિયમ્પિ ખો તે ભિક્ખૂ તુણ્હી અહેસું. તતિયમ્પિ ખો ભગવા ભિક્ખૂ આમન્તેસિ – ‘‘સિયા ખો પન, ભિક્ખવે, એકભિક્ખુસ્સપિ કઙ્ખા વા વિમતિ વા બુદ્ધે વા ધમ્મે વા સઙ્ઘે વા મગ્ગે વા પટિપદાય વા, પુચ્છથ, ભિક્ખવે, મા પચ્છા વિપ્પટિસારિનો અહુવત્થ – ‘સમ્મુખીભૂતો નો સત્થા અહોસિ, નાસક્ખિમ્હ ભગવન્તં સમ્મુખા પટિપુચ્છિતુ’’’ન્તિ. તતિયમ્પિ ખો તે ભિક્ખૂ તુણ્હી અહેસું.

અથ ખો ભગવા ભિક્ખૂ આમન્તેસિ – ‘‘સિયા ખો પન, ભિક્ખવે, સત્થુગારવેનપિ ન પુચ્છેય્યાથ, સહાયકોપિ, ભિક્ખવે, સહાયકસ્સ આરોચેતૂ’’તિ. એવં વુત્તે તે ભિક્ખૂ તુણ્હી અહેસું. અથ ખો આયસ્મા આનન્દો ભગવન્તં એતદવોચ – ‘‘અચ્છરિયં, ભન્તે, અબ્ભુતં, ભન્તે! એવં પસન્નો અહં, ભન્તે! નત્થિ ઇમસ્મિં ભિક્ખુસઙ્ઘે એકભિક્ખુસ્સપિ કઙ્ખા વા વિમતિ વા બુદ્ધે વા ધમ્મે વા સઙ્ઘે વા મગ્ગે વા પટિપદાય વા’’તિ.

‘‘પસાદા ખો ત્વં, આનન્દ, વદેસિ. ઞાણમેવ હેત્થ, આનન્દ, તથાગતસ્સ – ‘નત્થિ ઇમસ્મિં ભિક્ખુસઙ્ઘે એકભિક્ખુસ્સપિ કઙ્ખા વા વિમતિ વા બુદ્ધે વા ધમ્મે વા સઙ્ઘે વા મગ્ગે વા પટિપદાય વા’. ઇમેસઞ્હિ, આનન્દ, પઞ્ચન્નં ભિક્ખુસતાનં યો પચ્છિમકો ભિક્ખુ સો સોતાપન્નો અવિનિપાતધમ્મો નિયતો સમ્બોધિપરાયણો’’તિ. છટ્ઠં.

૭. અચિન્તેય્યસુત્તં

૭૭. ‘‘ચત્તારિમાનિ, ભિક્ખવે, અચિન્તેય્યાનિ, ન ચિન્તેતબ્બાનિ; યાનિ ચિન્તેન્તો ઉમ્માદસ્સ વિઘાતસ્સ ભાગી અસ્સ. કતમાનિ ચત્તારિ? બુદ્ધાનં, ભિક્ખવે, બુદ્ધવિસયો અચિન્તેય્યો, ન ચિન્તેતબ્બો; યં ચિન્તેન્તો ઉમ્માદસ્સ વિઘાતસ્સ ભાગી અસ્સ. ઝાયિસ્સ, ભિક્ખવે, ઝાનવિસયો અચિન્તેય્યો, ન ચિન્તેતબ્બો; યં ચિન્તેન્તો ઉમ્માદસ્સ વિઘાતસ્સ ભાગી અસ્સ. કમ્મવિપાકો, ભિક્ખવે, અચિન્તેય્યો, ન ચિન્તેતબ્બો; યં ચિન્તેન્તો ઉમ્માદસ્સ વિઘાતસ્સ ભાગી અસ્સ. લોકચિન્તા, ભિક્ખવે, અચિન્તેય્યા, ન ચિન્તેતબ્બા; યં ચિન્તેન્તો ઉમ્માદસ્સ વિઘાતસ્સ ભાગી અસ્સ. ઇમાનિ ખો, ભિક્ખવે, ચત્તારિ અચિન્તેય્યાનિ, ન ચિન્તેતબ્બાનિ; યાનિ ચિન્તેન્તો ઉમ્માદસ્સ વિઘાતસ્સ ભાગી અસ્સા’’તિ. સત્તમં.

૮. દક્ખિણસુત્તં

૭૮. ‘‘ચતસ્સો ઇમા, ભિક્ખવે, દક્ખિણા વિસુદ્ધિયો. કતમા ચતસ્સો? અત્થિ, ભિક્ખવે, દક્ખિણા દાયકતો વિસુજ્ઝતિ, નો પટિગ્ગાહકતો; અત્થિ, ભિક્ખવે, દક્ખિણા પટિગ્ગાહકતો વિસુજ્ઝતિ, નો દાયકતો; અત્થિ, ભિક્ખવે, દક્ખિણા નેવ દાયકતો વિસુજ્ઝતિ, નો પટિગ્ગાહકતો; અત્થિ, ભિક્ખવે, દક્ખિણા દાયકતો ચેવ વિસુજ્ઝતિ પટિગ્ગાહકતો ચ.

‘‘કથઞ્ચ, ભિક્ખવે, દક્ખિણા દાયકતો વિસુજ્ઝતિ, નો પટિગ્ગાહકતો? ઇધ, ભિક્ખવે, દાયકો હોતિ સીલવા કલ્યાણધમ્મો; પટિગ્ગાહકા હોન્તિ દુસ્સીલા પાપધમ્મા [પટિગ્ગાહકો હોતિ દુસ્સીલો પાપધમ્મો (સ્યા. કં. ક.) મ. નિ. ૩.૩૮૧ ઓલોકેતબ્બં]. એવં ખો, ભિક્ખવે, દક્ખિણા દાયકતો વિસુજ્ઝતિ, નો પટિગ્ગાહકતો.

‘‘કથઞ્ચ, ભિક્ખવે, દક્ખિણા પટિગ્ગાહકતો વિસુજ્ઝતિ, નો દાયકતો? ઇધ, ભિક્ખવે, દાયકો હોતિ દુસ્સીલો પાપધમ્મો; પટિગ્ગાહકા હોન્તિ સીલવન્તો કલ્યાણધમ્મા. એવં ખો, ભિક્ખવે, દક્ખિણા પટિગ્ગાહકતો વિસુજ્ઝતિ, નો દાયકતો.

‘‘કથઞ્ચ, ભિક્ખવે, દક્ખિણા નેવ દાયકતો વિસુજ્ઝતિ, નો પટિગ્ગાહકતો? ઇધ, ભિક્ખવે, દાયકો હોતિ દુસ્સીલો પાપધમ્મો; પટિગ્ગાહકાપિ હોન્તિ દુસ્સીલા પાપધમ્મા. એવં ખો, ભિક્ખવે, દક્ખિણા નેવ દાયકતો વિસુજ્ઝતિ, નો પટિગ્ગાહકતો.

‘‘કથઞ્ચ, ભિક્ખવે, દક્ખિણા દાયકતો ચેવ વિસુજ્ઝતિ પટિગ્ગાહકતો ચ? ઇધ, ભિક્ખવે, દાયકો હોતિ સીલવા કલ્યાણધમ્મો; પટિગ્ગાહકાપિ હોન્તિ સીલવન્તો કલ્યાણધમ્મા. એવં ખો, ભિક્ખવે, દક્ખિણા દાયકતો ચેવ વિસુજ્ઝતિ પટિગ્ગાહકતો ચ. ઇમા ખો, ભિક્ખવે, ચતસ્સો દક્ખિણા વિસુદ્ધિયો’’તિ. અટ્ઠમં.

૯. વણિજ્જસુત્તં

૭૯. અથ ખો આયસ્મા સારિપુત્તો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા સારિપુત્તો ભગવન્તં એતદવોચ – ‘‘કો નુ ખો, ભન્તે, હેતુ કો પચ્ચયો, યેન મિધેકચ્ચસ્સ તાદિસાવ વણિજ્જા પયુત્તા છેદગામિની હોતિ? કો પન, ભન્તે, હેતુ કો પચ્ચયો, યેન મિધેકચ્ચસ્સ તાદિસાવ વણિજ્જા પયુત્તા ન યથાધિપ્પાયા [યથાધિપ્પાયં (સી.)] હોતિ? કો નુ ખો, ભન્તે હેતુ કો પચ્ચયો, યેન મિધેકચ્ચસ્સ તાદિસાવ વણિજ્જા પયુત્તા યથાધિપ્પાયા [યથાધિપ્પાયં (સી.)] હોતિ? કો પન, ભન્તે, હેતુ કો પચ્ચયો, યેન મિધેકચ્ચસ્સ તાદિસાવ વણિજ્જા પયુત્તા પરાધિપ્પાયા હોતી’’તિ?

‘‘ઇધ, સારિપુત્ત, એકચ્ચો સમણં વા બ્રાહ્મણં વા ઉપસઙ્કમિત્વા પવારેતિ – ‘વદતુ, ભન્તે, પચ્ચયેના’તિ. સો યેન પવારેતિ તં ન દેતિ. સો ચે તતો ચુતો ઇત્થત્તં આગચ્છતિ, સો યઞ્ઞદેવ વણિજ્જં પયોજેતિ, સાસ્સ હોતિ છેદગામિની.

‘‘ઇધ પન, સારિપુત્ત, એકચ્ચો સમણં વા બ્રાહ્મણં વા ઉપસઙ્કમિત્વા પવારેતિ – ‘વદતુ, ભન્તે, પચ્ચયેના’તિ. સો યેન પવારેતિ તં ન યથાધિપ્પાયં દેતિ. સો ચે તતો ચુતો ઇત્થત્તં આગચ્છતિ, સો યઞ્ઞદેવ વણિજ્જં પયોજેતિ, સાસ્સ ન હોતિ યથાધિપ્પાયા [યથાધિપ્પાયં (સી. ક.)].

‘‘ઇધ પન, સારિપુત્ત, એકચ્ચો સમણં વા બ્રાહ્મણં વા ઉપસઙ્કમિત્વા પવારેતિ – ‘વદતુ, ભન્તે, પચ્ચયેના’તિ. સો યેન પવારેતિ તં યથાધિપ્પાયં દેતિ. સો ચે તતો ચુતો ઇત્થત્તં આગચ્છતિ, સો યઞ્ઞદેવ વણિજ્જં પયોજેતિ, સાસ્સ હોતિ યથાધિપ્પાયા [યથાધિપ્પાયં (સી. ક.)].

‘‘ઇધ, સારિપુત્ત, એકચ્ચો સમણં વા બ્રાહ્મણં વા ઉપસઙ્કમિત્વા પવારેતિ – ‘વદતુ, ભન્તે, પચ્ચયેના’તિ. સો યેન પવારેતિ તં પરાધિપ્પાયં દેતિ. સો ચે તતો ચુતો ઇત્થત્તં આગચ્છતિ, સો યઞ્ઞદેવ વણિજ્જં પયોજેતિ, સાસ્સ હોતિ પરાધિપ્પાયા [પરાધિપ્પાયં (ક.)].

‘‘અયં ખો, સારિપુત્ત, હેતુ અયં પચ્ચયો, યેન મિધેકચ્ચસ્સ તાદિસાવ વણિજ્જા પયુત્તા છેદગામિની હોતિ. અયં પન, સારિપુત્ત, હેતુ અયં પચ્ચયો, યેન મિધેકચ્ચસ્સ તાદિસાવ વણિજ્જા પયુત્તા ન યથાધિપ્પાયા હોતિ. અયં ખો પન, સારિપુત્ત, હેતુ અયં પચ્ચયો, યેન મિધેકચ્ચસ્સ તાદિસાવ વણિજ્જા પયુત્તા યથાધિપ્પાયા હોતિ. અયં પન, સારિપુત્ત, હેતુ અયં પચ્ચયો, યેન મિધેકચ્ચસ્સ તાદિસાવ વણિજ્જા પયુત્તા પરાધિપ્પાયા હોતી’’તિ. નવમં.

૧૦. કમ્બોજસુત્તં

૮૦. એકં સમયં ભગવા કોસમ્બિયં વિહરતિ ઘોસિતારામે. અથ ખો આયસ્મા આનન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા આનન્દો ભગવન્તં એતદવોચ –

‘‘કો નુ ખો, ભન્તે, હેતુ કો પચ્ચયો, યેન માતુગામો નેવ સભાયં નિસીદતિ, ન કમ્મન્તં પયોજેતિ, ન કમ્બોજં ગચ્છતી’’તિ? ‘‘કોધનો, આનન્દ, માતુગામો; ઇસ્સુકી, આનન્દ, માતુગામો; મચ્છરી, આનન્દ, માતુગામો; દુપ્પઞ્ઞો, આનન્દ, માતુગામો – અયં ખો, આનન્દ, હેતુ અયં પચ્ચયો, યેન માતુગામો નેવ સભાયં નિસીદતિ, ન કમ્મન્તં પયોજેતિ, ન કમ્બોજં ગચ્છતી’’તિ. દસમં.

અપણ્ણકવગ્ગો તતિયો.