૯. ભોજનસુત્તં

૫૯. ‘‘ભોજનં, ભિક્ખવે, દદમાનો દાયકો પટિગ્ગાહકાનં ચત્તારિ ઠાનાનિ દેતિ. કતમાનિ ચત્તારિ? આયું દેતિ, વણ્ણં દેતિ, સુખં દેતિ, બલં દેતિ. આયું ખો પન દત્વા આયુસ્સ ભાગી હોતિ દિબ્બસ્સ વા માનુસસ્સ વા. વણ્ણં દત્વા… સુખં દત્વા… બલં દત્વા બલસ્સ ભાગી હોતિ દિબ્બસ્સ વા માનુસસ્સ વા. ભોજનં, ભિક્ખવે, દદમાનો દાયકો પટિગ્ગાહકાનં ઇમાનિ ચત્તારિ ઠાનાનિ દેતી’’તિ.

[મહાવ. ૨૮૨] ‘‘યો સઞ્ઞતાનં પરદત્તભોજિનં,

કાલેન સક્કચ્ચ દદાતિ ભોજનં;

ચત્તારિ ઠાનાનિ અનુપ્પવેચ્છતિ,

આયુઞ્ચ વણ્ણઞ્ચ સુખં બલઞ્ચ.

‘‘સો આયુદાયી વણ્ણદાયી, સુખં બલં દદો નરો;

દીઘાયુ યસવા હોતિ, યત્થ યત્થૂપપજ્જતી’’તિ. નવમં;