૬. અપ્પસ્સુતસુત્તં

૬. ‘‘ચત્તારોમે, ભિક્ખવે, પુગ્ગલા સન્તો સંવિજ્જમાના લોકસ્મિં. કતમે ચત્તારો? અપ્પસ્સુતો સુતેન અનુપપન્નો, અપ્પસ્સુતો સુતેન ઉપપન્નો, બહુસ્સુતો સુતેન અનુપપન્નો, બહુસ્સુતો સુતેન ઉપપન્નો. કથઞ્ચ, ભિક્ખવે, પુગ્ગલો અપ્પસ્સુતો હોતિ સુતેન અનુપપન્નો? ઇધ, ભિક્ખવે, એકચ્ચસ્સ પુગ્ગલસ્સ અપ્પકં સુતં હોતિ – સુત્તં ગેય્યં વેય્યાકરણં ગાથા ઉદાનં ઇતિવુત્તકં જાતકં અબ્ભુતધમ્મં વેદલ્લં. સો તસ્સ અપ્પકસ્સ સુતસ્સ ન અત્થમઞ્ઞાય ધમ્મમઞ્ઞાય [ન ધમ્મમઞ્ઞાય (પી. ક.)] ધમ્માનુધમ્મપ્પટિપન્નો હોતિ. એવં ખો, ભિક્ખવે, પુગ્ગલો અપ્પસ્સુતો હોતિ સુતેન અનુપપન્નો.

‘‘કથઞ્ચ, ભિક્ખવે, પુગ્ગલો અપ્પસ્સુતો હોતિ સુતેન ઉપપન્નો? ઇધ, ભિક્ખવે, એકચ્ચસ્સ પુગ્ગલસ્સ અપ્પકં સુતં હોતિ – સુત્તં ગેય્યં વેય્યાકરણં ગાથા ઉદાનં ઇતિવુત્તકં જાતકં અબ્ભુતધમ્મં વેદલ્લં. સો તસ્સ અપ્પકસ્સ સુતસ્સ અત્થમઞ્ઞાય ધમ્મમઞ્ઞાય ધમ્માનુધમ્મપ્પટિપન્નો હોતિ. એવં ખો, ભિક્ખવે, પુગ્ગલો અપ્પસ્સુતો હોતિ સુતેન ઉપપન્નો.

‘‘કથઞ્ચ, ભિક્ખવે, પુગ્ગલો બહુસ્સુતો હોતિ સુતેન અનુપપન્નો? ઇધ, ભિક્ખવે, એકચ્ચસ્સ પુગ્ગલસ્સ બહુકં સુતં હોતિ – સુત્તં ગેય્યં વેય્યાકરણં ગાથા ઉદાનં ઇતિવુત્તકં જાતકં અબ્ભુતધમ્મં વેદલ્લં. સો તસ્સ બહુકસ્સ સુતસ્સ ન અત્થમઞ્ઞાય ધમ્મમઞ્ઞાય [ન ધમ્મમઞ્ઞાય (પી.)] ધમ્માનુધમ્મપ્પટિપન્નો હોતિ. એવં ખો, ભિક્ખવે, પુગ્ગલો બહુસ્સુતો હોતિ સુતેન અનુપપન્નો.

‘‘કથઞ્ચ, ભિક્ખવે, પુગ્ગલો બહુસ્સુતો હોતિ સુતેન ઉપપન્નો? ઇધ, ભિક્ખવે, એકચ્ચસ્સ પુગ્ગલસ્સ બહુકં સુતં હોતિ – સુત્તં ગેય્યં વેય્યાકરણં ગાથા ઉદાનં ઇતિવુત્તકં જાતકં અબ્ભુતધમ્મં વેદલ્લં. સો તસ્સ બહુકસ્સ સુતસ્સ અત્થમઞ્ઞાય ધમ્મમઞ્ઞાય ધમ્માનુધમ્મપ્પટિપન્નો હોતિ. એવં ખો, ભિક્ખવે, પુગ્ગલો બહુસ્સુતો હોતિ સુતેન ઉપપન્નો. ઇમે ખો, ભિક્ખવે, ચત્તારો પુગ્ગલા સન્તો સંવિજ્જમાના લોકસ્મિ’’ન્તિ.

‘‘અપ્પસ્સુતોપિ ચે હોતિ, સીલેસુ અસમાહિતો;

ઉભયેન નં ગરહન્તિ, સીલતો ચ સુતેન ચ.

‘‘અપ્પસ્સુતોપિ ચે હોતિ, સીલેસુ સુસમાહિતો;

સીલતો નં પસંસન્તિ, તસ્સ સમ્પજ્જતે સુતં.

‘‘બહુસ્સુતોપિ ચે હોતિ, સીલેસુ અસમાહિતો;

સીલતો નં ગરહન્તિ, નાસ્સ સમ્પજ્જતે સુતં.

‘‘બહુસ્સુતોપિ ચે હોતિ, સીલેસુ સુસમાહિતો;

ઉભયેન નં પસંસન્તિ, સીલતો ચ સુતેન ચ.

‘‘બહુસ્સુતં ધમ્મધરં, સપ્પઞ્ઞં બુદ્ધસાવકં;

નેક્ખં જમ્બોનદસ્સેવ, કો તં નિન્દિતુમરહતિ;

દેવાપિ નં પસંસન્તિ, બ્રહ્મુનાપિ પસંસિતો’’તિ. છટ્ઠં;