(૧૧) ૧. આસાદુપ્પજહવગ્ગો

૧૧૯. ‘‘દ્વેમા, ભિક્ખવે, આસા દુપ્પજહા. કતમા દ્વે? લાભાસા ચ જીવિતાસા ચ. ઇમા ખો, ભિક્ખવે, દ્વે આસા દુપ્પજહા’’તિ.

૧૨૦. ‘‘દ્વેમે, ભિક્ખવે, પુગ્ગલા દુલ્લભા લોકસ્મિં. કતમે દ્વે? યો ચ પુબ્બકારી, યો ચ કતઞ્ઞૂ કતવેદી. ઇમે ખો, ભિક્ખવે, દ્વે પુગ્ગલા દુલ્લભા લોકસ્મિ’’ન્તિ.

૧૨૧. ‘‘દ્વેમે, ભિક્ખવે, પુગ્ગલા દુલ્લભા લોકસ્મિં. કતમે દ્વે? તિત્તો ચ તપ્પેતા ચ. ઇમે ખો, ભિક્ખવે, દ્વે પુગ્ગલા દુલ્લભા લોકસ્મિ’’ન્તિ.

૧૨૨. ‘‘દ્વેમે, ભિક્ખવે, પુગ્ગલા દુત્તપ્પયા. કતમે દ્વે? યો ચ લદ્ધં લદ્ધં નિક્ખિપતિ, યો ચ લદ્ધં લદ્ધં વિસ્સજ્જેતિ. ઇમે ખો, ભિક્ખવે, દ્વે પુગ્ગલા દુત્તપ્પયા’’તિ.

૧૨૩. ‘‘દ્વેમે, ભિક્ખવે, પુગ્ગલા સુતપ્પયા. કતમે દ્વે? યો ચ લદ્ધં લદ્ધં ન નિક્ખિપતિ, યો ચ લદ્ધં લદ્ધં ન વિસ્સજ્જેતિ. ઇમે ખો, ભિક્ખવે, દ્વે પુગ્ગલા સુતપ્પયા’’તિ.

૧૨૪. ‘‘દ્વેમે, ભિક્ખવે, પચ્ચયા રાગસ્સ ઉપ્પાદાય. કતમે દ્વે? સુભનિમિત્તઞ્ચ અયોનિસો ચ મનસિકારો. ઇમે ખો, ભિક્ખવે, દ્વે પચ્ચયા રાગસ્સ ઉપ્પાદાયા’’તિ.

૧૨૫. ‘‘દ્વેમે, ભિક્ખવે, પચ્ચયા દોસસ્સ ઉપ્પાદાય. કતમે દ્વે? પટિઘનિમિત્તઞ્ચ અયોનિસો ચ મનસિકારો. ઇમે ખો, ભિક્ખવે, દ્વે પચ્ચયા દોસસ્સ ઉપ્પાદાયા’’તિ.

૧૨૬. ‘‘દ્વેમે, ભિક્ખવે, પચ્ચયા મિચ્છાદિટ્ઠિયા ઉપ્પાદાય. કતમે દ્વે? પરતો ચ ઘોસો અયોનિસો ચ મનસિકારો. ઇમે ખો, ભિક્ખવે, દ્વે પચ્ચયા મિચ્છાદિટ્ઠિયા ઉપ્પાદાયા’’તિ.

૧૨૭. ‘‘દ્વેમે, ભિક્ખવે, પચ્ચયા સમ્માદિટ્ઠિયા ઉપ્પાદાય. કતમે દ્વે? પરતો ચ ઘોસો, યોનિસો ચ મનસિકારો. ઇમે ખો, ભિક્ખવે, દ્વે પચ્ચયા સમ્માદિટ્ઠિયા ઉપ્પાદાયા’’તિ.

૧૨૮. ‘‘દ્વેમા, ભિક્ખવે, આપત્તિયો. કતમા દ્વે? લહુકા ચ આપત્તિ, ગરુકા ચ આપત્તિ. ઇમા ખો, ભિક્ખવે, દ્વે આપત્તિયો’’તિ.

૧૨૯. ‘‘દ્વેમા, ભિક્ખવે, આપત્તિયો. કતમા દ્વે? દુટ્ઠુલ્લા ચ આપત્તિ, અદુટ્ઠુલ્લા ચ આપત્તિ. ઇમા ખો, ભિક્ખવે, દ્વે આપત્તિયો’’તિ.

૧૩૦. ‘‘દ્વેમા, ભિક્ખવે, આપત્તિયો. કતમા દ્વે? સાવસેસા ચ આપત્તિ, અનવસેસા ચ આપત્તિ. ઇમા ખો, ભિક્ખવે, દ્વે આપત્તિયો’’તિ.

આસાદુપ્પજહવગ્ગો પઠમો.