૨૩. રાગપેય્યાલં

૨૩૭. ‘‘રાગસ્સ, ભિક્ખવે, અભિઞ્ઞાય દસ ધમ્મા ભાવેતબ્બા. કતમે દસ? અસુભસઞ્ઞા, મરણસઞ્ઞા, આહારે પટિકૂલસઞ્ઞા, સબ્બલોકે અનભિરતસઞ્ઞા, અનિચ્ચસઞ્ઞા, અનિચ્ચે દુક્ખસઞ્ઞા, દુક્ખે અનત્તસઞ્ઞા, પહાનસઞ્ઞા, વિરાગસઞ્ઞા, નિરોધસઞ્ઞા – રાગસ્સ, ભિક્ખવે, અભિઞ્ઞાય ઇમે દસ ધમ્મા ભાવેતબ્બા’’તિ.

૨૩૮. ‘‘રાગસ્સ, ભિક્ખવે, અભિઞ્ઞાય દસ ધમ્મા ભાવેતબ્બા. કતમે દસ? અનિચ્ચસઞ્ઞા, અનત્તસઞ્ઞા, આહારે પટિકૂલસઞ્ઞા, સબ્બલોકે અનભિરતસઞ્ઞા, અટ્ઠિકસઞ્ઞા, પુળવકસઞ્ઞા [પુલવકસઞ્ઞા (સી.) પુળુવકસઞ્ઞા (ક.)], વિનીલકસઞ્ઞા, વિપુબ્બકસઞ્ઞા, વિચ્છિદ્દકસઞ્ઞા, ઉદ્ધુમાતકસઞ્ઞા – રાગસ્સ, ભિક્ખવે, અભિઞ્ઞાય ઇમે દસ ધમ્મા ભાવેતબ્બા’’તિ.

૨૩૯. ‘‘રાગસ્સ, ભિક્ખવે, અભિઞ્ઞાય દસ ધમ્મા ભાવેતબ્બા. કતમે દસ? સમ્માદિટ્ઠિ, સમ્માસઙ્કપ્પો, સમ્માવાચા, સમ્માકમ્મન્તો, સમ્માઆજીવો, સમ્માવાયામો, સમ્માસતિ, સમ્માસમાધિ, સમ્માઞાણં, સમ્માવિમુત્તિ – રાગસ્સ, ભિક્ખવે, અભિઞ્ઞાય ઇમે દસ ધમ્મા ભાવેતબ્બા’’તિ.

૨૪૦-૨૬૬. ‘‘રાગસ્સ, ભિક્ખવે, પરિઞ્ઞાય…પે… પરિક્ખયાય… પહાનાય… ખયાય… વયાય… વિરાગાય… નિરોધાય… ( ) [(ઉપસમાય) (સી. સ્યા. પી.) અઞ્ઞેસં પન નિપાતાનં પરિયોસાને ઇદં પદં ન દિસ્સતિ] ચાગાય… પટિનિસ્સગ્ગાય…પે… ઇમે દસ ધમ્મા ભાવેતબ્બા.

૨૬૭-૭૪૬. ‘‘દોસસ્સ …પે… મોહસ્સ… કોધસ્સ… ઉપનાહસ્સ… મક્ખસ્સ… પળાસસ્સ… ઇસ્સાય… મચ્છરિયસ્સ… માયાય… સાઠેય્યસ્સ… થમ્ભસ્સ… સારમ્ભસ્સ… માનસ્સ… અતિમાનસ્સ… મદસ્સ… પમાદસ્સ પરિઞ્ઞાય…પે… પરિક્ખયાય… પહાનાય … ખયાય… વયાય… વિરાગાય… નિરોધાય… ( ) [(ઉપસમાય) (સી. સ્યા. પી.) અઞ્ઞેસં પન નિપાતાનં પરિયોસાને ઇદં પદં ન દિસ્સતિ] ચાગાય… પટિનિસ્સગ્ગાય…પે… ઇમે દસ ધમ્મા ભાવેતબ્બા’’તિ.

રાગપેય્યાલં નિટ્ઠિતં.