૧૦. અધમ્મચરિયાસુત્તં

૨૨૦. [અ. નિ. ૨.૧૬] અથ ખો અઞ્ઞતરો બ્રાહ્મણો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો સો બ્રાહ્મણો ભગવન્તં એતદવોચ – ‘‘કો નુ ખો, ભો ગોતમ, હેતુ કો પચ્ચયો યેનમિધેકચ્ચે સત્તા કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જન્તી’’તિ? ‘‘અધમ્મચરિયાવિસમચરિયાહેતુ ખો, બ્રાહ્મણ, એવમિધેકચ્ચે સત્તા કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જન્તી’’તિ.

‘‘કો પન, ભો ગોતમ, હેતુ કો પચ્ચયો યેનમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તી’’તિ? ‘‘ધમ્મચરિયાસમચરિયાહેતુ ખો, બ્રાહ્મણ, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તી’’તિ.

‘‘ન ખો અહં ઇમસ્સ ભોતો ગોતમસ્સ સંખિત્તેન ભાસિતસ્સ વિત્થારેન અત્થં આજાનામિ. સાધુ મે ભવં ગોતમો તથા ધમ્મં દેસેતુ યથાહં ઇમસ્સ ભોતો ગોતમસ્સ સંખિત્તેન ભાસિતસ્સ વિત્થારેન અત્થં આજાનેય્ય’’ન્તિ. ‘‘તેન હિ, બ્રાહ્મણ, સુણાહિ, સાધુકં મનસિ કરોહિ; ભાસિસ્સામી’’તિ. ‘‘એવં, ભો’’તિ ખો સો બ્રાહ્મણો ભગવતો પચ્ચસ્સોસિ. ભગવા એતદવોચ –

‘‘તિવિધા ખો, બ્રાહ્મણ, કાયેન અધમ્મચરિયાવિસમચરિયા હોતિ; ચતુબ્બિધા વાચાય અધમ્મચરિયાવિસમચરિયા હોતિ; તિવિધા મનસા અધમ્મચરિયાવિસમચરિયા હોતિ.

‘‘કથઞ્ચ, બ્રાહ્મણ, તિવિધા કાયેન અધમ્મચરિયાવિસમચરિયા હોતિ…પે… એવં ખો, બ્રાહ્મણ, તિવિધા કાયેન અધમ્મચરિયા વિસમચરિયા હોતિ.

‘‘કથઞ્ચ, બ્રાહ્મણ, ચતુબ્બિધા વાચાય અધમ્મચરિયાવિસમચરિયા હોતિ…પે… એવં ખો, બ્રાહ્મણ, ચતુબ્બિધા વાચાય અધમ્મચરિયા વિસમચરિયા હોતિ.

‘‘કથઞ્ચ, બ્રાહ્મણ, તિવિધા મનસા અધમ્મચરિયાવિસમચરિયા હોતિ…પે… એવં ખો, બ્રાહ્મણ, તિવિધા મનસા અધમ્મચરિયાવિસમચરિયા હોતિ. એવં અધમ્મચરિયાવિસમચરિયાહેતુ ખો, બ્રાહ્મણ, એવમિધેકચ્ચે સત્તા કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જન્તિ.

‘‘તિવિધા બ્રાહ્મણ, કાયેન ધમ્મચરિયાસમચરિયા હોતિ; ચતુબ્બિધા વાચાય ધમ્મચરિયાસમચરિયા હોતિ; તિવિધા મનસા ધમ્મચરિયાસમચરિયા હોતિ.

‘‘કથઞ્ચ, બ્રાહ્મણ, તિવિધા કાયેન ધમ્મચરિયાસમચરિયા હોતિ…પે… એવં ખો, બ્રાહ્મણ, તિવિધા કાયેન ધમ્મચરિયાસમચરિયા હોતિ.

‘‘કથઞ્ચ, બ્રાહ્મણ, ચતુબ્બિધા વાચાય ધમ્મચરિયાસમચરિયા હોતિ…પે… એવં ખો, બ્રાહ્મણ, ચતુબ્બિધા વાચાય ધમ્મચરિયાસમચરિયા હોતિ.

‘‘કથઞ્ચ, બ્રાહ્મણ, તિવિધા મનસા ધમ્મચરિયાસમચરિયા હોતિ…પે… એવં ખો, બ્રાહ્મણ, તિવિધા મનસા ધમ્મચરિયાસમચરિયા હોતિ. એવં ધમ્મચરિયાસમચરિયાહેતુ ખો, બ્રાહ્મણ, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તી’’તિ.

‘‘અભિક્કન્તં, ભો ગોતમ, અભિક્કન્તં, ભો ગોતમ…પે… ઉપાસકં મં ભવં ગોતમો ધારેતુ અજ્જતગ્ગે પાણુપેતં સરણં ગત’’ન્તિ. દસમં.

કરજકાયવગ્ગો પઠમો.