૬. અચ્છરાસઙ્ઘાતવગ્ગો

૫૧. ‘‘પભસ્સરમિદં, ભિક્ખવે, ચિત્તં. તઞ્ચ ખો આગન્તુકેહિ ઉપક્કિલેસેહિ ઉપક્કિલિટ્ઠં. તં અસ્સુતવા પુથુજ્જનો યથાભૂતં નપ્પજાનાતિ. તસ્મા ‘અસ્સુતવતો પુથુજ્જનસ્સ ચિત્તભાવના નત્થી’તિ વદામી’’તિ. પઠમં.

૫૨. ‘‘પભસ્સરમિદં, ભિક્ખવે, ચિત્તં. તઞ્ચ ખો આગન્તુકેહિ ઉપક્કિલેસેહિ વિપ્પમુત્તં. તં સુતવા અરિયસાવકો યથાભૂતં પજાનાતિ. તસ્મા ‘સુતવતો અરિયસાવકસ્સ ચિત્તભાવના અત્થી’તિ વદામી’’તિ. દુતિયં.

૫૩. ‘‘અચ્છરાસઙ્ઘાતમત્તમ્પિ ચે, ભિક્ખવે, ભિક્ખુ મેત્તાચિત્તં [મેત્તં ચિત્તં (સી.), મેત્તચિત્તં (સ્યા. કં. પી. ક.)] આસેવતિ; અયં વુચ્ચતિ, ભિક્ખવે – ‘ભિક્ખુ અરિત્તજ્ઝાનો વિહરતિ સત્થુસાસનકરો ઓવાદપતિકરો, અમોઘં રટ્ઠપિણ્ડં ભુઞ્જતિ’. કો પન વાદો યે નં બહુલીકરોન્તી’’તિ! તતિયં.

૫૪. ‘‘અચ્છરાસઙ્ઘાતમત્તમ્પિ ચે, ભિક્ખવે, ભિક્ખુ મેત્તાચિત્તં ભાવેતિ; અયં વુચ્ચતિ, ભિક્ખવે – ‘ભિક્ખુ અરિત્તજ્ઝાનો વિહરતિ સત્થુસાસનકરો ઓવાદપતિકરો, અમોઘં રટ્ઠપિણ્ડં ભુઞ્જતિ’. કો પન વાદો યે નં બહુલીકરોન્તી’’તિ! ચતુત્થં.

૫૫. ‘‘અચ્છરાસઙ્ઘાતમત્તમ્પિ ચે, ભિક્ખવે, ભિક્ખુ મેત્તાચિત્તં મનસિ કરોતિ; અયં વુચ્ચતિ, ભિક્ખવે – ‘ભિક્ખુ અરિત્તજ્ઝાનો વિહરતિ સત્થુસાસનકરો ઓવાદપતિકરો અમોઘં રટ્ઠપિણ્ડં ભુઞ્જતિ’. કો પન વાદો યે નં બહુલીકરોન્તી’’તિ! પઞ્ચમં.

૫૬. ‘‘યે કેચિ, ભિક્ખવે, ધમ્મા અકુસલા અકુસલભાગિયા અકુસલપક્ખિકા, સબ્બે તે મનોપુબ્બઙ્ગમા. મનો તેસં ધમ્માનં પઠમં ઉપ્પજ્જતિ, અન્વદેવ અકુસલા ધમ્મા’’તિ. છટ્ઠં.

૫૭. ‘‘યે કેચિ, ભિક્ખવે, ધમ્મા કુસલા કુસલભાગિયા કુસલપક્ખિકા, સબ્બે તે મનોપુબ્બઙ્ગમા. મનો તેસં ધમ્માનં પઠમં ઉપ્પજ્જતિ, અન્વદેવ કુસલા ધમ્મા’’તિ. સત્તમં.

૫૮. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા અકુસલા ધમ્મા ઉપ્પજ્જન્તિ ઉપ્પન્ના વા કુસલા ધમ્મા પરિહાયન્તિ યથયિદં, ભિક્ખવે, પમાદો. પમત્તસ્સ, ભિક્ખવે, અનુપ્પન્ના ચેવ અકુસલા ધમ્મા ઉપ્પજ્જન્તિ ઉપ્પન્ના ચ કુસલા ધમ્મા પરિહાયન્તી’’તિ. અટ્ઠમં.

૫૯. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા કુસલા ધમ્મા ઉપ્પજ્જન્તિ ઉપ્પન્ના વા અકુસલા ધમ્મા પરિહાયન્તિ યથયિદં, ભિક્ખવે, અપ્પમાદો. અપ્પમત્તસ્સ, ભિક્ખવે, અનુપ્પન્ના ચેવ કુસલા ધમ્મા ઉપ્પજ્જન્તિ ઉપ્પન્ના ચ અકુસલા ધમ્મા પરિહાયન્તી’’તિ. નવમં.

૬૦. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા અકુસલા ધમ્મા ઉપ્પજ્જન્તિ ઉપ્પન્ના વા કુસલા ધમ્મા પરિહાયન્તિ યથયિદં, ભિક્ખવે, કોસજ્જં. કુસીતસ્સ, ભિક્ખવે, અનુપ્પન્ના ચેવ અકુસલા ધમ્મા ઉપ્પજ્જન્તિ ઉપ્પન્ના ચ કુસલા ધમ્મા પરિહાયન્તી’’તિ. દસમં.

અચ્છરાસઙ્ઘાતવગ્ગો છટ્ઠો.