૨. દુતિયવગ્ગો

૨૭૮. ‘‘અટ્ઠાનમેતં, ભિક્ખવે, અનવકાસો યં એકિસ્સા લોકધાતુયા દ્વે રાજાનો ચક્કવત્તી અપુબ્બં અચરિમં ઉપ્પજ્જેય્યું. નેતં ઠાનં વિજ્જતિ. ઠાનઞ્ચ ખો એતં, ભિક્ખવે, વિજ્જતિ યં એકિસ્સા લોકધાતુયા એકો રાજા ચક્કવત્તી ઉપ્પજ્જેય્ય. ઠાનમેતં વિજ્જતી’’તિ.

૨૭૯. ‘‘અટ્ઠાનમેતં, ભિક્ખવે, અનવકાસો યં ઇત્થી અરહં અસ્સ સમ્માસમ્બુદ્ધો. નેતં ઠાનં વિજ્જતિ. ઠાનઞ્ચ ખો, એતં, ભિક્ખવે, વિજ્જતિ યં પુરિસો અરહં અસ્સ સમ્માસમ્બુદ્ધો. ઠાનમેતં વિજ્જતી’’તિ.

૨૮૦. ‘‘અટ્ઠાનમેતં, ભિક્ખવે, અનવકાસો યં ઇત્થી રાજા અસ્સ ચક્કવત્તી. નેતં ઠાનં વિજ્જતિ. ઠાનઞ્ચ ખો એતં, ભિક્ખવે, વિજ્જતિ યં પુરિસો રાજા અસ્સ ચક્કવત્તી. ઠાનમેતં વિજ્જતી’’તિ.

૨૮૧-૨૮૩. ‘‘અટ્ઠાનમેતં, ભિક્ખવે, અનવકાસો યં ઇત્થી સક્કત્તં કારેય્ય…પે… મારત્તં કારેય્ય…પે… બ્રહ્મત્તં કારેય્ય. નેતં ઠાનં વિજ્જતિ. ઠાનઞ્ચ ખો એતં, ભિક્ખવે, વિજ્જતિ યં પુરિસો સક્કત્તં કારેય્ય…પે… મારત્તં કારેય્ય…પે… બ્રહ્મત્તં કારેય્ય. ઠાનમેતં વિજ્જતી’’તિ.

૨૮૪. ‘‘અટ્ઠાનમેતં, ભિક્ખવે, અનવકાસો યં કાયદુચ્ચરિતસ્સ ઇટ્ઠો કન્તો મનાપો વિપાકો નિબ્બત્તેય્ય. નેતં ઠાનં વિજ્જતિ. ઠાનઞ્ચ ખો એતં, ભિક્ખવે, વિજ્જતિ યં કાયદુચ્ચરિતસ્સ અનિટ્ઠો અકન્તો અમનાપો વિપાકો નિબ્બત્તેય્ય. ઠાનમેતં વિજ્જતી’’તિ.

૨૮૫-૨૮૬. ‘‘અટ્ઠાનમેતં, ભિક્ખવે, અનવકાસો યં વચીદુચ્ચરિતસ્સ…પે… યં મનોદુચ્ચરિતસ્સ ઇટ્ઠો કન્તો મનાપો વિપાકો નિબ્બત્તેય્ય. નેતં ઠાનં વિજ્જતિ. ઠાનઞ્ચ ખો એતં, ભિક્ખવે, વિજ્જતિ યં મનોદુચ્ચરિતસ્સ અનિટ્ઠો અકન્તો અમનાપો વિપાકો નિબ્બત્તેય્ય. ઠાનમેતં વિજ્જતી’’તિ.

વગ્ગો દુતિયો.