७. विस्सज्जनावारो

३५०. यस्मिं समये सम्मुखाविनयेन च सतिविनयेन च अधिकरणं वूपसम्मति – यत्थ सतिविनयो तत्थ सम्मुखाविनयो, यत्थ सम्मुखाविनयो तत्थ सतिविनयो, न तत्थ अमूळ्हविनयो, न तत्थ पटिञ्ञातकरणं, न तत्थ येभुय्यसिका, न तत्थ तस्सपापियसिका, न तत्थ तिणवत्थारको. यस्मिं समये सम्मुखाविनयेन च अमूळ्हविनयेन च…पे… सम्मुखाविनयेन च पटिञ्ञातकरणेन च…पे… सम्मुखाविनयेन च येभुय्यसिकाय च…पे… सम्मुखाविनयेन च तस्सपापियसिकाय च…पे… सम्मुखाविनयेन च तिणवत्थारकेन च अधिकरणं वूपसम्मति – यत्थ तिणवत्थारको तत्थ सम्मुखाविनयो, यत्थ सम्मुखाविनयो तत्थ तिणवत्थारको, न तत्थ सतिविनयो, न तत्थ अमूळ्हविनयो, न तत्थ पटिञ्ञातकरणं, न तत्थ येभुय्यसिका, न तत्थ तस्सपापियसिका.