६. एळकलोमसमुट्ठानं

२६३. एळकलोमा द्वे सेय्या, आहच्च पिण्डभोजनं;

गणविकालसन्निधि, दन्तपोनेन चेलका.

उय्युत्तं सेनं [उय्युत्तं वसे (स्या.)] उय्योधि, सुरा ओरेन न्हायना;

दुब्बण्णे द्वे देसनिका, लसुणुपतिट्ठे नच्चना.

न्हानमत्थरणं सेय्या, अन्तोरट्ठे तथा बहि;

अन्तोवस्सं चित्तागारं, आसन्दि सुत्तकन्तना.

वेय्यावच्चं सहत्था च, अभिक्खुकावासेन च;

छत्तं यानञ्च सङ्घाणिं, अलङ्कारं गन्धवासितं.

भिक्खुनी सिक्खमाना च, सामणेरी गिहिनिया;

असंकच्चिका आपत्ति, चत्तारीसा चतुत्तरि.

कायेन न वाचाचित्तेन, कायचित्तेन न वाचतो;

द्विसमुट्ठानिका सब्बे, समा एळकलोमिकाति.

एळकलोमसमुट्ठानं निट्ठितं.