३. सञ्चरित्तसमुट्ठानं

२६०. सञ्चरी कुटि विहारो, धोवनञ्च पटिग्गहो;

विञ्ञत्तुत्तरि अभिहट्ठुं, उभिन्नं दूतकेन च.

कोसिया सुद्धद्वेभागा, छब्बस्सानि निसीदनं;

रिञ्चन्ति रूपिका चेव, उभो नानप्पकारका.

ऊनबन्धनवस्सिका, सुत्तं विकप्पनेन च;

द्वारदानसिब्बानि [द्वारदानसिब्बिनी (सी. स्या.)] च, पूवपच्चयजोति च.

रतनं सूचि मञ्चो च, तूलं निसीदनकण्डु च;

वस्सिका च सुगतेन, विञ्ञत्ति अञ्ञं चेतापना.

द्वे सङ्घिका महाजनिका, द्वे पुग्गललहुका गरु;

द्वे विघासा साटिका च, समणचीवरेन च.

समपञ्ञासिमे धम्मा, छहि ठानेहि जायरे;

कायतो न वाचाचित्ता, वाचतो न कायमना.

कायवाचा न च चित्ता [न चित्ततो (सी. स्या.)], कायचित्ता न वाचिका [न वाचतो (सी. स्या.)];

वाचाचित्ता न कायेन, तीहि द्वारेहि [तीहि ठानेहि (स्या.)] जायरे.

छसमुट्ठानिका एते, सञ्चरित्तेन सादिसा.

सञ्चरित्तसमुट्ठानं निट्ठितं.