३. पाचित्तियं

४७६. कति पाचित्तियानि, सब्बानि नानावत्थुकानि;

अपुब्बं अचरिमं, आपज्जेय्य एकतो.

पञ्च पाचित्तियानि, सब्बानि नानावत्थुकानि;

अपुब्बं अचरिमं, आपज्जेय्य एकतो.

कति पाचित्तियानि, सब्बानि नानावत्थुकानि;

अपुब्बं अचरिमं, आपज्जेय्य एकतो.

न पाचित्तियानि, सब्बानि नानावत्थुकानि;

अपुब्बं अचरिमं, आपज्जेय्य एकतो.

कति पाचित्तियानि, सब्बानि नानावत्थुकानि;

कति वाचाय देसेय्य, वुत्ता आदिच्चबन्धुना.

पञ्च पाचित्तियानि, सब्बानि नानावत्थुकानि;

एकवाचाय देसेय्य, वुत्ता आदिच्चबन्धुना.

कति पाचित्तियानि, सब्बानि नानावत्थुकानि;

कति वाचाय देसेय्य, वुत्ता आदिच्चबन्धुना.

नव पाचित्तियानि, सब्बानि नानावत्थुकानि;

एकवाचाय देसेय्य, वुत्ता आदिच्चबन्धुना.

कति पाचित्तियानि, सब्बानि नानावत्थुकानि;

किञ्च कित्तेत्वा देसेय्य, वुत्ता आदिच्चबन्धुना.

पञ्च पाचित्तियानि, सब्बानि नानावत्थुकानि;

वत्थुं कित्तेत्वा देसेय्य, वुत्ता आदिच्चबन्धुना.

कति पाचित्तियानि, सब्बानि नानावत्थुकानि;

किञ्च कित्तेत्वा देसेय्य, वुत्ता आदिच्चबन्धुना.

नव पाचित्तियानि, सब्बानि नानावत्थुकानि;

वत्थुं कित्तेत्वा देसेय्य, वुत्ता आदिच्चबन्धुना.

यावततियके कति आपत्तियो, कति वोहारपच्चया;

खादन्तस्स कति आपत्तियो, कति भोजनपच्चया.

यावततियके तिस्सो आपत्तियो, छ वोहारपच्चया;

खादन्तस्स तिस्सो आपत्तियो, पञ्च भोजनपच्चया.

सब्बा यावततियका, कति ठानानि गच्छन्ति;

कतिनञ्चेव आपत्ति, कतिनं अधिकरणेन च.

सब्बा यावततियका, पञ्च ठानानि गच्छन्ति;

पञ्चन्नञ्चेव आपत्ति, पञ्चन्नं अधिकरणेन च.

कतिनं विनिच्छयो होति, कतिनं वूपसमेन च;

कतिनञ्चेव अनापत्ति, कतिहि ठानेहि सोभति.

पञ्चन्नं विनिच्छयो होति, पञ्चन्नं वूपसमेन च;

पञ्चन्नञ्चेव अनापत्ति, तीहि ठानेहि सोभति.

कति कायिका रत्तिं, कति कायिका दिवा;

निज्झायन्तस्स कति आपत्ति, कति पिण्डपातपच्चया.

द्वे कायिका रत्तिं, द्वे कायिका दिवा;

निज्झायन्तस्स एका आपत्ति, एका पिण्डपातपच्चया.

कतानिसंसे सम्पस्सं, परेसं सद्धाय देसये;

उक्खित्तका कति वुत्ता, कति सम्मावत्तना.

अट्ठानिसंसे सम्पस्सं, परेसं सद्धाय देसये;

उक्खित्तका तयो वुत्ता, तेचत्तालीस सम्मावत्तना.

कति ठाने मुसावादो, कति परमन्ति वुच्चति;

कति पाटिदेसनीया, कतिनं देसनाय च.

पञ्च ठाने मुसावादो, चुद्दस परमन्ति वुच्चति;

द्वादस पाटिदेसनीया, चतुन्नं देसनाय च.

कतङ्गिको मुसावादो, कति उपोसथङ्गानि;

कति दूतेय्यङ्गानि, कति तित्थियवत्तना.

अट्ठङ्गिको मुसावादो, अट्ठ उपोसथङ्गानि;

अट्ठ दूतेय्यङ्गानि, अट्ठ तित्थियवत्तना.

कतिवाचिका उपसम्पदा, कतिनं पच्चुट्ठातब्बं;

कतिनं आसनं दातब्बं, भिक्खुनोवादको कतिहि.

अट्ठवाचिका उपसम्पदा, अट्ठन्नं पच्चुट्ठातब्बं;

अट्ठन्नं आसनं दातब्बं, भिक्खुनोवादको अट्ठहि.

कतिनं छेज्जं होति, कतिनं थुल्लच्चयं;

कतिनञ्चेव अनापत्ति, सब्बेसं एकवत्थुका.

एकस्स छेज्जं होति, चतुन्नं थुल्लच्चयं;

चतुन्नञ्चेव अनापत्ति, सब्बेसं एकवत्थुका.

कति आघातवत्थूनि, कतिहि सङ्घो भिज्जति;

कतेत्थ पठमापत्तिका, ञत्तिया करणा कति.

नव आघातवत्थूनि, नवहि सङ्घो भिज्जति;

नवेत्थ पठमापत्तिका, ञत्तिया करणा नव.