१. पाराजिकं

४७०. अत्थापत्ति अचित्तको आपज्जति, सचित्तको वुट्ठाति. अत्थापत्ति सचित्तको आपज्जति, अचित्तको वुट्ठाति. अत्थापत्ति अचित्तको आपज्जति, अचित्तको वुट्ठाति. अत्थापत्ति सचित्तको आपज्जति, सचित्तको वुट्ठाति. अत्थापत्ति कुसलचित्तो आपज्जति, कुसलचित्तो वुट्ठाति. अत्थापत्ति कुसलचित्तो आपज्जति, अकुसलचित्तो वुट्ठाति. अत्थापत्ति कुसलचित्तो आपज्जति, अब्याकतचित्तो वुट्ठाति. अत्थापत्ति अकुसलचित्तो आपज्जति, कुसलचित्तो वुट्ठाति. अत्थापत्ति अकुसलचित्तो आपज्जति, अकुसलचित्तो वुट्ठाति. अत्थापत्ति अकुसलचित्तो आपज्जति, अब्याकतचित्तो वुट्ठाति. अत्थापत्ति अब्याकतचित्तो आपज्जति, कुसलचित्तो वुट्ठाति. अत्थापत्ति अब्याकतचित्तो आपज्जति, अकुसलचित्तो वुट्ठाति. अत्थापत्ति अब्याकतचित्तो आपज्जति, अब्याकतचित्तो वुट्ठाति.

पठमं पाराजिकं कतिहि समुट्ठानेहि समुट्ठाति? पठमं पाराजिकं एकेन समुट्ठानेन समुट्ठाति. कायतो च चित्ततो च समुट्ठाति, न वाचतो.

दुतियं पाराजिकं कतिहि समुट्ठानेहि समुट्ठाति? दुतियं पाराजिकं तीहि समुट्ठानेहि समुट्ठाति – सिया कायतो च चित्ततो च समुट्ठाति, न वाचतो; सिया वाचतो च चित्ततो च समुट्ठाति, न कायतो; सिया कायतो च वाचतो च चित्ततो च समुट्ठाति.

ततियं पाराजिकं कतिहि समुट्ठानेहि समुट्ठाति? ततियं पाराजिकं तीहि समुट्ठानेहि समुट्ठाति – सिया कायतो च चित्ततो च समुट्ठाति, न वाचतो; सिया वाचतो च चित्ततो च समुट्ठाति, न कायतो; सिया कायतो च वाचतो च चित्ततो च समुट्ठाति.

चतुत्थं पाराजिकं कतिहि समुट्ठानेहि समुट्ठाति? चतुत्थं पाराजिकं तीहि समुट्ठानेहि समुट्ठाति – सिया कायतो च चित्ततो च समुट्ठाति, न वाचतो; सिया वाचतो च चित्ततो च समुट्ठाति, न कायतो; सिया कायतो च वाचतो च चित्ततो च समुट्ठाति.

चत्तारो पाराजिका निट्ठिता.