३. पत्तवग्गो

१६४. अतिरेकपत्तं दसाहं अतिक्कामेन्तो एकं आपत्तिं आपज्जति. निस्सग्गियं पाचित्तियं.

ऊनपञ्चबन्धनेन पत्तेन अञ्ञं नवं पत्तं चेतापेन्तो द्वे आपत्तियो आपज्जति. चेतापेति, पयोगे दुक्कटं; चेतापिते निस्सग्गियं पाचित्तियं.

भेसज्जानि पटिग्गहेत्वा सत्ताहं अतिक्कामेन्तो एकं आपत्तिं आपज्जति. निस्सग्गियं पाचित्तियं.

अतिरेकमासे सेसे गिम्हाने वस्सिकसाटिकचीवरं परियेसन्तो द्वे आपत्तियो आपज्जति. परियेसति, पयोगे दुक्कटं; परियिट्ठे निस्सग्गियं पाचित्तियं.

भिक्खुस्स सामं चीवरं दत्वा कुपितो अनत्तमनो अच्छिन्दन्तो द्वे आपत्तियो आपज्जति. अच्छिन्दति, पयोगे दुक्कटं; अच्छिन्ने निस्सग्गियं पाचित्तियं.

सामं सुत्तं विञ्ञापेत्वा तन्तवायेहि चीवरं वायापेन्तो द्वे आपत्तियो आपज्जति. वायापेति, पयोगे दुक्कटं; वायापिते निस्सग्गियं पाचित्तियं.

पुब्बे अप्पवारितो अञ्ञातकस्स गहपतिकस्स तन्तवाये उपसङ्कमित्वा चीवरे विकप्पं आपज्जन्तो द्वे आपत्तियो आपज्जति. विकप्पं आपज्जति, पयोगे दुक्कटं; विकप्पं आपन्ने निस्सग्गियं पाचित्तियं.

अच्चेकचीवरं पटिग्गहेत्वा चीवरकालसमयं अतिक्कामेन्तो एकं आपत्तिं आपज्जति. निस्सग्गियं पाचित्तियं.

तिण्णं चीवरानं अञ्ञतरं चीवरं अन्तरघरे निक्खिपित्वा अतिरेकछारत्तं विप्पवसन्तो एकं आपत्तिं आपज्जति. निस्सग्गियं पाचित्तियं.

जानं सङ्घिकं लाभं परिणतं अत्तनो परिणामेन्तो द्वे आपत्तियो आपज्जति. परिणामेति, पयोगे दुक्कटं; परिणामिते निस्सग्गियं पाचित्तियं.

पत्तवग्गो ततियो.

तिंस निस्सग्गिया पाचित्तिया निट्ठिता.