१. कथिनवग्गो

१६२. अतिरेकचीवरं दसाहं अतिक्कामेन्तो एकं आपत्तिं आपज्जति. निस्सग्गियं पाचित्तियं.

एकरत्तं तिचीवरेन विप्पवसन्तो एकं आपत्तिं आपज्जति. निस्सग्गियं पाचित्तियं.

अकालचीवरं पटिग्गहेत्वा मासं अतिक्कामेन्तो एकं आपत्तिं आपज्जति. निस्सग्गियं पाचित्तियं.

अञ्ञातिकाय भिक्खुनिया पुराणचीवरं धोवापेन्तो द्वे आपत्तियो आपज्जति. धोवापेति, पयोगे दुक्कटं; धोवापिते निस्सग्गियं पाचित्तियं.

अञ्ञातिकाय भिक्खुनिया हत्थतो चीवरं पटिग्गण्हन्तो द्वे आपत्तियो आपज्जति. गण्हाति, पयोगे दुक्कटं; गहिते निस्सग्गियं पाचित्तियं.

अञ्ञातकं गहपतिं वा गहपतानिं वा चीवरं विञ्ञापेन्तो द्वे आपत्तियो आपज्जति. विञ्ञापेति, पयोगे दुक्कटं; विञ्ञापिते निस्सग्गियं पाचित्तियं.

अञ्ञातकं गहपतिं वा गहपतानिं वा ततुत्तरि चीवरं विञ्ञापेन्तो द्वे आपत्तियो आपज्जति. विञ्ञापेति, पयोगे दुक्कटं; विञ्ञापिते निस्सग्गियं पाचित्तियं.

पुब्बे अप्पवारितो अञ्ञातकं गहपतिकं उपसङ्कमित्वा चीवरे विकप्पं आपज्जन्तो द्वे आपत्तियो आपज्जति. विकप्पं आपज्जति, पयोगे दुक्कटं; विकप्पं आपन्ने निस्सग्गियं पाचित्तियं.

पुब्बे अप्पवारितो अञ्ञातके गहपतिके उपसङ्कमित्वा चीवरे विकप्पं आपज्जन्तो द्वे आपत्तियो आपज्जति. विकप्पं आपज्जति, पयोगे दुक्कटं; विकप्पं आपन्ने निस्सग्गियं पाचित्तियं.

अतिरेकतिक्खत्तुं चोदनाय अतिरेकछक्खत्तुं ठानेन चीवरं अभिनिप्फादेन्तो द्वे आपत्तियो आपज्जति. अभिनिप्फादेति, पयोगे दुक्कटं; अभिनिप्फादिते निस्सग्गियं पाचित्तियं.

कथिनवग्गो पठमो.