६. सुरामेरयवग्गो

१७०. मज्जं पिवन्तो द्वे आपत्तियो आपज्जति. ‘‘पिविस्सामी’’ति पटिग्गण्हाति, आपत्ति दुक्कटस्स; अज्झोहारे अज्झोहारे आपत्ति पाचित्तियस्स.

भिक्खुं अङ्गुलिपतोदकेन हासेन्तो द्वे आपत्तियो आपज्जति. हासेति, पयोगे दुक्कटं; हसिते आपत्ति पाचित्तियस्स.

उदके कीळन्तो द्वे आपत्तियो आपज्जति. हेट्ठागोप्फके उदके कीळति, आपत्ति दुक्कटस्स; उपरिगोप्फके कीळति, आपत्ति पाचित्तियस्स.

अनादरियं करोन्तो द्वे आपत्तियो आपज्जति. करोति, पयोगे दुक्कटं; कते आपत्ति पाचित्तियस्स.

भिक्खुं भिंसापेन्तो द्वे आपत्तियो आपज्जति. भिंसापेति, पयोगे दुक्कटं; भिंसापिते आपत्ति पाचित्तियस्स.

जोतिं समादहित्वा विसिब्बेन्तो द्वे आपत्तियो आपज्जति. समादहति, पयोगे दुक्कटं; समादहिते आपत्ति पाचित्तियस्स.

ओरेनद्धमासं नहायन्तो द्वे आपत्तियो आपज्जति. नहायति, पयोगे दुक्कटं; नहानपरियोसाने आपत्ति पाचित्तियस्स.

अनादियित्वा तिण्णं दुब्बण्णकरणानं अञ्ञतरं दुब्बण्णकरणं नवं चीवरं परिभुञ्जन्तो द्वे आपत्तियो आपज्जति. परिभुञ्जति, पयोगे दुक्कटं; परिभुत्ते आपत्ति पाचित्तियस्स.

भिक्खुस्स वा भिक्खुनिया वा सिक्खमानाय वा सामणेरस्स वा सामणेरिया वा सामं चीवरं विकप्पेत्वा अप्पच्चुद्धारणं परिभुञ्जन्तो द्वे आपत्तियो आपज्जति. परिभुञ्जति, पयोगे दुक्कटं; परिभुत्ते आपत्ति पाचित्तियस्स.

भिक्खुस्स पत्तं वा चीवरं वा निसीदनं वा सूचिघरं वा कायबन्धनं वा अपनिधेन्तो द्वे आपत्तियो आपज्जति. अपनिधेति, पयोगे दुक्कटं; अपनिधिते आपत्ति पाचित्तियस्स.

सुरामेरयवग्गो छट्ठो.