१. लसुणवग्गो

२३१. लसुणं खादन्ती द्वे आपत्तियो आपज्जति. खादिस्सामीति पटिग्गण्हाति, आपत्ति दुक्कटस्स; अज्झोहारे अज्झोहारे आपत्ति पाचित्तियस्स.

सम्बाधे लोमं संहरापेन्ती द्वे आपत्तियो आपज्जति. संहरापेति, पयोगे दुक्कटं; संहरापिते आपत्ति पाचित्तियस्स.

तलघातकं करोन्ती द्वे आपत्तियो आपज्जति. करोति, पयोगे दुक्कटं; कते आपत्ति पाचित्तियस्स.

जतुमट्ठकं आदियन्ती द्वे आपत्तियो आपज्जति. आदियति, पयोगे दुक्कटं, आदिन्ने आपत्ति पाचित्तियस्स.

अतिरेकद्वङ्गुलपब्बपरमं उदकसुद्धिकं आदियन्ती द्वे आपत्तियो आपज्जति. आदियति, पयोगे दुक्कटं; आदिन्ने आपत्ति पाचित्तियस्स.

भिक्खुस्स भुञ्जन्तस्स पानीयेन वा विधूपनेन वा उपतिट्ठन्ती द्वे आपत्तियो आपज्जति. हत्थपासे तिट्ठति, आपत्ति पाचित्तियस्स; हत्थपासं विजहित्वा तिट्ठति, आपत्ति दुक्कटस्स.

आमकधञ्ञं विञ्ञापेत्वा भुञ्जन्ती द्वे आपत्तियो आपज्जति. भुञ्जिस्सामीति पटिग्गण्हाति, आपत्ति दुक्कटस्स; अज्झोहारे अज्झोहारे आपत्ति पाचित्तियस्स.

उच्चारं वा पस्सावं वा सङ्कारं वा विघासं वा तिरोकुट्टे वा तिरोपाकारे वा छड्डेन्ती द्वे आपत्तियो आपज्जति. छड्डेति, पयोगे दुक्कटं; छड्डिते आपत्ति पाचित्तियस्स.

उच्चारं वा पस्सावं वा सङ्कारं वा विघासं वा हरिते छड्डेन्ती द्वे आपत्तियो आपज्जति. छड्डेति, पयोगे दुक्कटं; छड्डिते आपत्ति पाचित्तियस्स.

नच्चं वा गीतं वा वादितं वा दस्सनाय गच्छन्ती द्वे आपत्तियो आपज्जति. गच्छति, आपत्ति दुक्कटस्स; यत्थ ठिता पस्सति वा सुणाति वा, आपत्ति पाचित्तियस्स.

लसुणवग्गो पठमो.