९. छत्तुपाहनवग्गो

२३९. छत्तुपाहनं धारेन्ती द्वे आपत्तियो आपज्जति. धारेति, पयोगे दुक्कटं; धारिते, आपत्ति पाचित्तियस्स.

यानेन यायन्ती द्वे आपत्तियो आपज्जति. यायति, पयोगे दुक्कटं; यायिते, आपत्ति पाचित्तियस्स.

सङ्घाणिं धारेन्ती द्वे आपत्तियो आपज्जति. धारेति, पयोगे दुक्कटं; धारिते, आपत्ति पाचित्तियस्स.

इत्थालङ्कारं धारेन्ती द्वे आपत्तियो आपज्जति. धारेति, पयोगे दुक्कटं; धारिते, आपत्ति पाचित्तियस्स.

गन्धवण्णकेन नहायन्ती द्वे आपत्तियो आपज्जति. नहायति, पयोगे दुक्कटं; नहानपरियोसाने, आपत्ति पाचित्तियस्स.

वासितकेन पिञ्ञाकेन नहायन्ती द्वे आपत्तियो आपज्जति. नहायति, पयोगे दुक्कटं; नहानपरियोसाने, आपत्ति पाचित्तियस्स.

भिक्खुनिया उम्मद्दापेन्ती परिमद्दापेन्ती द्वे आपत्तियो आपज्जति. उम्मद्दापेति, पयोगे दुक्कटं; उम्मद्दिते, आपत्ति पाचित्तियस्स.

सिक्खमानाय उम्मद्दापेन्ती परिमद्दापेन्ती द्वे आपत्तियो आपज्जति. उम्मद्दापेति, पयोगे दुक्कटं; उम्मद्दिते, आपत्ति पाचित्तियस्स.

सामणेरिया उम्मद्दापेन्ती परिमद्दापेन्ती द्वे आपत्तियो आपज्जति. उम्मद्दापेति, पयोगे दुक्कटं; उम्मद्दिते, आपत्ति पाचित्तियस्स.

गिहिनिया उम्मद्दापेन्ती परिमद्दापेन्ती द्वे आपत्तियो आपज्जति. उम्मद्दापेति, पयोगे दुक्कटं; उम्मद्दिते, आपत्ति पाचित्तियस्स.

भिक्खुस्स पुरतो अनापुच्छा आसने निसीदन्ती द्वे आपत्तियो आपज्जति. निसीदति, पयोगे दुक्कटं; निसिन्ने, आपत्ति पाचित्तियस्स.

अनोकासकतं भिक्खुं पञ्हं पुच्छन्ती द्वे आपत्तियो आपज्जति. पुच्छति, पयोगे दुक्कटं; पुच्छिते, आपत्ति पाचित्तियस्स.

असङ्कच्चिका गामं पविसन्ती द्वे आपत्तियो आपज्जति. पठमं पादं परिक्खेपं अतिक्कामेति, आपत्ति दुक्कटस्स; दुतियं पादं अतिक्कामेति, आपत्ति पाचित्तियस्स.

छत्तुपाहनवग्गो नवमो.

खुद्दकं निट्ठितं.