६. आरामवग्गो

२२३. जानं सभिक्खुकं आरामं अनापुच्छा पविसन्तिया पाचित्तियं कत्थ पञ्ञत्तन्ति? सावत्थियं पञ्ञत्तं. कं आरब्भाति? सम्बहुला भिक्खुनियो आरब्भ. किस्मिं वत्थुस्मिन्ति? सम्बहुला भिक्खुनियो आरामं अनापुच्छा पविसिंसु, तस्मिं वत्थुस्मिं. एका पञ्ञत्ति, द्वे अनुपञ्ञत्तियो. छन्नं आपत्तिसमुट्ठानानं एकेन समुट्ठानेन समुट्ठाति – धुरनिक्खेपे…पे….

भिक्खुं अक्कोसन्तिया परिभासन्तिया पाचित्तियं कत्थ पञ्ञत्तन्ति? वेसालियं पञ्ञत्तं. कं आरब्भाति? छब्बग्गिया भिक्खुनियो आरब्भ. किस्मिं वत्थुस्मिन्ति? छब्बग्गिया भिक्खुनियो आयस्मन्तं उपालिं अक्कोसिंसु, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं तीहि समुट्ठानेहि समुट्ठाति…पे….

चण्डीकताय गणं परिभासन्तिया पाचित्तियं कत्थ पञ्ञत्तन्ति? सावत्थियं पञ्ञत्तं. कं आरब्भाति? थुल्लनन्दं भिक्खुनिं आरब्भ. किस्मिं वत्थुस्मिन्ति? थुल्लनन्दा भिक्खुनी चण्डीकताय गणं परिभासि, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं तीहि समुट्ठानेहि समुट्ठाति…पे….

निमन्तिताय वा पवारिताय वा खादनीयं वा भोजनीयं वा अञ्ञत्र भुञ्जन्तिया पाचित्तियं कत्थ पञ्ञत्तन्ति? सावत्थियं पञ्ञत्तं. कं आरब्भाति? सम्बहुला भिक्खुनियो आरब्भ. किस्मिं वत्थुस्मिन्ति? सम्बहुला भिक्खुनियो भुत्ताविनियो पवारिता अञ्ञत्र भुञ्जिंसु, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं चतूहि समुट्ठानेहि समुट्ठाति…पे….

कुलं मच्छरायन्तिया पाचित्तियं कत्थ पञ्ञत्तन्ति? सावत्थियं पञ्ञत्तं. कं आरब्भाति? अञ्ञतरं भिक्खुनिं आरब्भ. किस्मिं वत्थुस्मिन्ति? अञ्ञतरा भिक्खुनी कुलं मच्छरायि, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं तीहि समुट्ठानेहि समुट्ठाति…पे….

अभिक्खुके आवासे वस्सं वसन्तिया पाचित्तियं कत्थ पञ्ञत्तन्ति? सावत्थियं पञ्ञत्तं. कं आरब्भाति? सम्बहुला भिक्खुनियो आरब्भ. किस्मिं वत्थुस्मिन्ति? सम्बहुला भिक्खुनियो अभिक्खुके आवासे वस्सं वसिंसु, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं द्वीहि समुट्ठानेहि समुट्ठाति – एळकलोमके…पे….

वस्संवुट्ठाय भिक्खुनिया उभतोसङ्घे तीहि ठानेहि न पवारेन्तिया पाचित्तियं कत्थ पञ्ञत्तन्ति? सावत्थियं पञ्ञत्तं. कं आरब्भाति? सम्बहुला भिक्खुनियो आरब्भ. किस्मिं वत्थुस्मिन्ति? सम्बहुला भिक्खुनियो वस्संवुट्ठा भिक्खुसङ्घं [भिक्खुनिसंघे (क.)] न पवारेसुं, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं एकेन समुट्ठानेन समुट्ठाति – धुरनिक्खेपे…पे….

ओवादाय वा संवासाय वा न गच्छन्तिया पाचित्तियं कत्थ पञ्ञत्तन्ति? सक्केसु पञ्ञत्तं. कं आरब्भाति? छब्बग्गिया भिक्खुनियो आरब्भ. किस्मिं वत्थुस्मिन्ति? छब्बग्गिया भिक्खुनियो ओवादं न गच्छिंसु, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं एकेन समुट्ठानेन समुट्ठाति – पठमपाराजिके…पे….

उपोसथम्पि न पुच्छन्तिया ओवादम्पि न याचन्तिया पाचित्तियं कत्थ पञ्ञत्तन्ति? सावत्थियं पञ्ञत्तं. कं आरब्भाति? सम्बहुला भिक्खुनियो आरब्भ. किस्मिं वत्थुस्मिन्ति? सम्बहुला भिक्खुनियो उपोसथम्पि न पुच्छिंसु ओवादम्पि न याचिंसु, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं एकेन समुट्ठानेन समुट्ठाति – धुरनिक्खेपे…पे….

पसाखे जातं गण्डं वा रुधितं [रुहितं (सी. स्या.)] वा अनपलोकेत्वा सङ्घं वा गणं वा पुरिसेन सद्धिं एकेनेकाय भेदापेन्तिया पाचित्तियं कत्थ पञ्ञत्तन्ति? सावत्थियं पञ्ञत्तं. कं आरब्भाति? अञ्ञतरं भिक्खुनिं आरब्भ. किस्मिं वत्थुस्मिन्ति? अञ्ञतरा भिक्खुनी पसाखे जातं गण्डं पुरिसेन सद्धिं एकेनेका भेदापेसि, तस्मिं वत्थुस्मिं. एका पञ्ञत्ति. छन्नं आपत्तिसमुट्ठानानं द्वीहि समुट्ठानेहि समुट्ठाति – कथिनके…पे….

आरामवग्गो छट्ठो.