७. अधिकरणसमथा (भिक्खुनीविभङ्गो)

इमे खो पनाय्यायो सत्त अधिकरणसमथा

धम्मा उद्देसं आगच्छन्ति.

१२४२. उप्पन्नुप्पन्नानं अधिकरणानं समथाय वूपसमाय सम्मुखाविनयो दातब्बो, सतिविनयो दातब्बो, अमूळ्हविनयो दातब्बो, पटिञ्ञाय कारेतब्बं, येभुय्यसिका, तस्सपापियसिका, तिणवत्थारकोति.

उद्दिट्ठा खो, अय्यायो, सत्त अधिकरणसमथा धम्मा. तत्थाय्यायो पुच्छामि – ‘‘कच्चित्थ परिसुद्धा’’? दुतियम्पि पुच्छामि – ‘‘कच्चित्थ परिसुद्धा’’? ततियम्पि पुच्छामि – ‘‘कच्चित्थ परिसुद्धा’’? परिसुद्धेत्थाय्यायो, तस्मा तुण्ही, एवमेतं धारयामीति.

अधिकरणसमथा निट्ठिता.