९. छत्तुपाहनवग्गो

१. पठमसिक्खापदं

११७८. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन छब्बग्गिया भिक्खुनियो छत्तुपाहनं धारेन्ति. मनुस्सा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो छत्तुपाहनं धारेस्सन्ति, सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम छब्बग्गिया भिक्खुनियो छत्तुपाहनं धारेस्सन्ती’’ति…पे… सच्चं किर, भिक्खवे, छब्बग्गिया भिक्खुनियो छत्तुपाहनं धारेन्तीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, छब्बग्गिया भिक्खुनियो छत्तुपाहनं धारेस्सन्ति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

‘‘या पन भिक्खुनी छत्तुपाहनं धारेय्य, पाचित्तिय’’न्ति.

एवञ्चिदं भगवता भिक्खुनीनं सिक्खापदं पञ्ञत्तं होति.

११७९. तेन खो पन समयेन अञ्ञतरा भिक्खुनी गिलाना होति. तस्सा विना छत्तुपाहनं न फासु होति…पे… भगवतो एतमत्थं आरोचेसुं…पे… अनुजानामि, भिक्खवे, गिलानाय भिक्खुनिया छत्तुपाहनं. एवञ्च पन, भिक्खवे, भिक्खुनियो इमं सिक्खापदं उद्दिसन्तु –

११८०. ‘‘या पन भिक्खुनी अगिलाना छत्तुपाहनं धारेय्य, पाचित्तिय’’न्ति.

११८१. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

अगिलाना नाम यस्सा विना छत्तुपाहनं फासु होति.

गिलाना नाम यस्सा विना छत्तुपाहनं न फासु होति.

छत्तं नाम तीणि छत्तानि – सेतच्छत्तं, किलञ्जच्छत्तं, पण्णच्छत्तं मण्डलबद्धं सलाकबद्धं. धारेय्याति सकिम्पि धारेति, आपत्ति पाचित्तियस्स.

११८२. अगिलाना अगिलानसञ्ञा छत्तुपाहनं धारेति, आपत्ति पाचित्तियस्स. अगिलाना वेमतिका छत्तुपाहनं धारेति, आपत्ति पाचित्तियस्स. अगिलाना गिलानसञ्ञा छत्तुपाहनं धारेति, आपत्ति पाचित्तियस्स.

छत्तं धारेति न उपाहनं, आपत्ति दुक्कटस्स. उपाहनं धारेति न छत्तं, आपत्ति दुक्कटस्स. गिलाना अगिलानसञ्ञा, आपत्ति दुक्कटस्स. गिलाना वेमतिका, आपत्ति दुक्कटस्स. गिलाना गिलानसञ्ञा, अनापत्ति.

११८३. अनापत्ति गिलानाय, आरामे आरामूपचारे धारेति, आपदासु, उम्मत्तिकाय, आदिकम्मिकायाति.

पठमसिक्खापदं निट्ठितं.

२. दुतियसिक्खापदं

११८४. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन छब्बग्गिया भिक्खुनियो यानेन यायन्ति. मनुस्सा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो यानेन यायिस्सन्ति, सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे. … ता उज्झायन्ति खिय्यन्ति विपाचेन्ति – ‘‘कथञ्हि नाम छब्बग्गिया भिक्खुनियो यानेन यायिस्सन्ती’’ति…पे… सच्चं किर, भिक्खवे, छब्बग्गिया भिक्खुनियो यानेन यायन्तीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, छब्बग्गिया भिक्खुनियो यानेन यायिस्सन्ति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

‘‘या पन भिक्खुनी यानेन यायेय्य, पाचित्तिय’’न्ति.

एवञ्चिदं भगवता भिक्खुनीनं सिक्खापदं पञ्ञत्तं होति.

११८५. तेन खो पन समयेन अञ्ञतरा भिक्खुनी गिलाना होति, न सक्कोति पदसा गन्तुं…पे… भगवतो एतमत्थं आरोचेसुं…पे… अनुजानामि, भिक्खवे, गिलानाय भिक्खुनिया यानं. एवञ्च पन, भिक्खवे, भिक्खुनियो इमं सिक्खापदं उद्दिसन्तु –

११८६. ‘‘या पन भिक्खुनी अगिलाना यानेन यायेय्य, पाचित्तिय’’न्ति.

११८७. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

अगिलाना नाम सक्कोति पदसा गन्तुं.

गिलाना नाम न सक्कोति पदसा गन्तुं.

यानं नाम वय्हं रथो सकटं सन्दमानिका सिविका पाटङ्की.

यायेय्याति सकिम्पि यानेन यायति, आपत्ति पाचित्तियस्स.

११८८. अगिलाना अगिलानसञ्ञा यानेन यायति, आपत्ति पाचित्तियस्स. अगिलाना वेमतिका यानेन यायति, आपत्ति पाचित्तियस्स. अगिलाना गिलानसञ्ञा यानेन यायति, आपत्ति पाचित्तियस्स.

गिलाना अगिलानसञ्ञा, आपत्ति दुक्कटस्स. गिलाना वेमतिका, आपत्ति दुक्कटस्स. गिलाना गिलानसञ्ञा, अनापत्ति.

११८९. अनापत्ति गिलानाय, आपदासु, उम्मत्तिकाय, आदिकम्मिकायाति.

दुतियसिक्खापदं निट्ठितं.

३. ततियसिक्खापदं

११९०. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन अञ्ञतरा भिक्खुनी अञ्ञतरिस्सा इत्थिया कुलूपिका होति. अथ खो सा इत्थी तं भिक्खुनिं एतदवोच – ‘‘हन्दाय्ये, इमं सङ्घाणिं अमुकाय नाम इत्थिया देही’’ति. अथ खो सा भिक्खुनी – ‘‘सचाहं पत्तेन आदाय गच्छामि विस्सरो मे भविस्सती’’ति पटिमुञ्चित्वा अगमासि. तस्सा रथिकाय सुत्तके छिन्ने विप्पकिरियिंसु. मनुस्सा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो सङ्घाणिं धारेस्सन्ति, सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे. … ता उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनी सङ्घाणिं धारेस्सती’’ति…पे… सच्चं किर, भिक्खवे, भिक्खुनी सङ्घाणिं धारेती’’ति [धारेसीति (क.)]? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, भिक्खुनी सङ्घाणिं धारेस्सति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

११९१. ‘‘या पन भिक्खुनी सङ्घाणिं धारेय्य, पाचित्तिय’’न्ति.

११९२. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

सङ्घाणि नाम या काचि कटूपगा.

धारेय्याति सकिम्पि धारेति, आपत्ति पाचित्तियस्स.

११९३. अनापत्ति आबाधप्पच्चया, कटिसुत्तकं धारेति, उम्मत्तिकाय, आदिकम्मिकायाति.

ततियसिक्खापदं निट्ठितं.

४. चतुत्थसिक्खापदं

११९४. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन छब्बग्गिया भिक्खुनियो इत्थालङ्कारं धारेन्ति. मनुस्सा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो इत्थालङ्कारं धारेस्सन्ति, सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम छब्बग्गिया भिक्खुनियो इत्थालङ्कारं धारेस्सन्ती’’ति …पे… सच्चं किर, भिक्खवे, छब्बग्गिया भिक्खुनियो इत्थालङ्कारं धारेन्तीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, छब्बग्गिया भिक्खुनियो इत्थालङ्कारं धारेस्सन्ति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

११९५. ‘‘या पन भिक्खुनी इत्थालङ्कारं धारेय्य, पाचित्तिय’’न्ति.

११९६. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

इत्थालङ्कारो नाम सीसूपगो गीवूपगो हत्थूपगो पादूपगो कटूपगो. धारेय्याति सकिम्पि धारेति, आपत्ति पाचित्तियस्स.

११९७. अनापत्ति आबाधपच्चया, उम्मत्तिकाय, आदिकम्मिकायाति.

चतुत्थसिक्खापदं निट्ठितं.

५. पञ्चमसिक्खापदं

११९८. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन छब्बग्गिया भिक्खुनियो गन्धवण्णकेन नहायन्ति. मनुस्सा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो गन्धवण्णकेन नहायिस्सन्ति, सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम छब्बग्गिया भिक्खुनियो गन्धवण्णकेन नहायिस्सन्ती’’ति…पे… सच्चं किर, भिक्खवे, छब्बग्गिया भिक्खुनियो गन्धवण्णकेन नहायन्तीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, छब्बग्गिया भिक्खुनियो गन्धवण्णकेन नहायिस्सन्ति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

११९९. ‘‘या पन भिक्खुनी गन्धवण्णकेन नहायेय्य, पाचित्तिय’’न्ति.

१२००. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

गन्धो नाम यो कोचि गन्धो. वण्णकं नाम यं किञ्चि वण्णकं. नहायेय्याति नहायति. पयोगे दुक्कटं, नहानपरियोसाने आपत्ति पाचित्तियस्स.

१२०१. अनापत्ति आबाधप्पच्चया, उम्मत्तिकाय, आदिकम्मिकायाति.

पञ्चमसिक्खापदं निट्ठितं.

६. छट्ठसिक्खापदं

१२०२. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन छब्बग्गिया भिक्खुनियो वासितकेन पिञ्ञाकेन नहायन्ति. मनुस्सा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो वासितकेन पिञ्ञाकेन नहायिस्सन्ति, सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम छब्बग्गिया भिक्खुनियो वासितकेन पिञ्ञाकेन नहायिस्सन्ती’’ति…पे… सच्चं किर, भिक्खवे, छब्बग्गिया भिक्खुनियो वासितकेन पिञ्ञाकेन नहायन्तीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, छब्बग्गिया भिक्खुनियो वासितकेन पिञ्ञाकेन नहायिस्सन्ति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१२०३. ‘‘या पन भिक्खुनी वासितकेन पिञ्ञाकेन नहायेय्य, पाचित्तिय’’न्ति.

१२०४. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

वासितकं नाम यं किञ्चि गन्धवासितकं. पिञ्ञाकं नाम तिलपिट्ठं वुच्चति. नहायेय्याति नहायति. पयोगे दुक्कटं, नहानपरियोसाने आपत्ति पाचित्तियस्स.

१२०५. अनापत्ति आबाधप्पच्चया, पकतिपिञ्ञाकेन नहायति, उम्मत्तिकाय, आदिकम्मिकायाति.

छट्ठसिक्खापदं निट्ठितं.

७. सत्तमसिक्खापदं

१२०६. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन भिक्खुनियो भिक्खुनिया उम्मद्दापेन्तिपि परिमद्दापेन्तिपि. मनुस्सा विहारचारिकं आहिण्डन्ता पस्सित्वा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो भिक्खुनिया उम्मद्दापेस्सन्तिपि परिमद्दापेस्सन्तिपि सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो भिक्खुनिया उम्मद्दापेस्सन्तिपि परिमद्दापेस्सन्तिपी’’ति…पे… सच्चं किर, भिक्खवे, भिक्खुनियो भिक्खुनिया उम्मद्दापेन्तिपि परिमद्दापेन्तिपीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, भिक्खुनियो भिक्खुनिया उम्मद्दापेस्सन्तिपि परिमद्दापेस्सन्तिपि! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१२०७. ‘‘या पन भिक्खुनी भिक्खुनिया उम्मद्दापेय्य वा परिमद्दापेय्य वा, पाचित्तिय’’न्ति.

१२०८. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

भिक्खुनियाति अञ्ञाय भिक्खुनिया. उम्मद्दापेय्य वाति उम्मद्दापेति [उब्बट्टापेति (सी.)], आपत्ति पाचित्तियस्स. परिमद्दापेय्य वाति सम्बाहापेति, आपत्ति पाचित्तियस्स.

१२०९. अनापत्ति गिलानाय, आपदासु, उम्मत्तिकाय, आदिकम्मिकायाति.

सत्तमसिक्खापदं निट्ठितं.

८-९-१०. अट्ठम-नवम-दसमसिक्खापदं

१२१०. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन भिक्खुनियो सिक्खमानाय उम्मद्दापेन्तिपि परिमद्दापेन्तिपि…पे… सामणेरिया उम्मद्दापेन्तिपि परिमद्दापेन्तिपि…पे… गिहिनिया उम्मद्दापेन्तिपि परिमद्दापेन्तिपि. मनुस्सा विहारचारिकं आहिण्डन्ता पस्सित्वा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो गिहिनिया उम्मद्दापेस्सन्तिपि परिमद्दापेस्सन्तिपि, सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – कथञ्हि नाम भिक्खुनियो गिहिनिया उम्मद्दापेस्सन्तिपि परिमद्दापेस्सन्तिपीति…पे… सच्चं किर, भिक्खवे, भिक्खुनियो गिहिनिया उम्मद्दापेन्तिपि परिमद्दापेन्तिपीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, भिक्खुनियो गिहिनिया उम्मद्दापेस्सन्तिपि परिमद्दापेस्सन्तिपि! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१२११. ‘‘या पन भिक्खुनी (सिक्खमानाय…पे… सामणेरिया…पे…) गिहिनिया उम्मद्दापेय्य वा परिमद्दापेय्य वा, पाचित्तिय’’न्ति.

१२१२. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

सिक्खमाना नाम द्वे वस्सानि छसु धम्मेसु सिक्खितसिक्खा.

सामणेरी नाम दससिक्खापदिका.

गिहिनी नाम अगारिनी वुच्चति.

उम्मद्दापेय्य वाति उम्मद्दापेति, आपत्ति पाचित्तियस्स.

परिमद्दापेय्य वाति सम्बाहापेति, आपत्ति पाचित्तियस्स.

१२१३. अनापत्ति गिलानाय [आबाधप्पच्चया (क.)], आपदासु, उम्मत्तिकाय, आदिकम्मिकायाति.

अट्ठम नवम दसमसिक्खापदानि निट्ठितानि.

११. एकादसमसिक्खापदं

१२१४. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन भिक्खुनियो भिक्खुस्स पुरतो अनापुच्छा आसने निसीदन्ति. भिक्खू उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो भिक्खुस्स पुरतो अनापुच्छा आसने निसीदिस्सन्ती’’ति…पे… सच्चं किर, भिक्खवे, भिक्खुनियो भिक्खुस्स पुरतो अनापुच्छा आसने निसीदन्तीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, भिक्खुनियो भिक्खुस्स पुरतो अनापुच्छा आसने निसीदिस्सन्ति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१२१५. ‘‘या पन भिक्खुनी भिक्खुस्स पुरतो अनापुच्छा आसने निसीदेय्य, पाचित्तिय’’न्ति.

१२१६. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

भिक्खुस्स पुरतोति उपसम्पन्नस्स पुरतो. अनापुच्छाति अनपलोकेत्वा. आसने निसीदेय्याति अन्तमसो छमायपि निसीदति, आपत्ति पाचित्तियस्स.

१२१७. अनापुच्छिते अनापुच्छितसञ्ञा आसने निसीदति, आपत्ति पाचित्तियस्स. अनापुच्छिते वेमतिका आसने निसीदति, आपत्ति पाचित्तियस्स. अनापुच्छिते आपुच्छितसञ्ञा आसने निसीदति, आपत्ति पाचित्तियस्स.

आपुच्छिते अनापुच्छितसञ्ञा, आपत्ति दुक्कटस्स. आपुच्छिते वेमतिका, आपत्ति दुक्कटस्स. आपुच्छिते आपुच्छितसञ्ञा, अनापत्ति.

१२१८. अनापत्ति आपुच्छा आसने निसीदति, गिलानाय, आपदासु, उम्मत्तिकाय, आदिकम्मिकायाति.

एकादसमसिक्खापदं निट्ठितं.

१२. द्वादसमसिक्खापदं

१२१९. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन भिक्खुनियो अनोकासकतं भिक्खुं पञ्हं पुच्छन्ति. भिक्खू उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो अनोकासकतं भिक्खुं पञ्हं पुच्छिस्सन्ती’’ति…पे… सच्चं किर, भिक्खवे, भिक्खुनियो अनोकासकतं भिक्खुं पञ्हं पुच्छन्तीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, भिक्खुनियो अनोकासकतं भिक्खुं पञ्हं पुच्छिस्सन्ति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१२२०. ‘‘या पन भिक्खुनी अनोकासकतं भिक्खुं पञ्हं पुच्छेय्य, पाचित्तिय’’न्ति.

१२२१. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

अनोकासकतन्ति अनापुच्छा. भिक्खुन्ति उपसम्पन्नं. पञ्हं पुच्छेय्याति सुत्तन्ते ओकासं कारापेत्वा विनयं वा अभिधम्मं वा पुच्छति, आपत्ति पाचित्तियस्स. विनये ओकासं कारापेत्वा सुत्तन्तं वा अभिधम्मं वा पुच्छति, आपत्ति पाचित्तियस्स. अभिधम्मे ओकासं कारापेत्वा सुत्तन्तं वा विनयं वा पुच्छति, आपत्ति पाचित्तियस्स.

१२२२. अनापुच्छिते अनापुच्छितसञ्ञा पञ्हं पुच्छति, आपत्ति पाचित्तियस्स. अनापुच्छिते वेमतिका पञ्हं पुच्छति, आपत्ति पाचित्तियस्स. अनापुच्छिते आपुच्छितसञ्ञा पञ्हं पुच्छति, आपत्ति पाचित्तियस्स.

आपुच्छिते अनापुच्छितसञ्ञा, आपत्ति दुक्कटस्स. आपुच्छिते वेमतिका, आपत्ति दुक्कटस्स. आपुच्छिते आपुच्छितसञ्ञा, अनापत्ति.

१२२३. अनापत्ति ओकासं कारापेत्वा पुच्छति, अनोदिस्स ओकासं कारापेत्वा यत्थ कत्थचि पुच्छति, उम्मत्तिकाय, आदिकम्मिकायाति.

द्वादसमसिक्खापदं निट्ठितं.

१३. तेरसमसिक्खापदं

१२२४. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन अञ्ञतरा भिक्खुनी असङ्कच्चिका [असङ्कच्छिका (स्या.)] गामं पिण्डाय पाविसि. तस्सा रथिकाय वातमण्डलिका सङ्घाटियो उक्खिपिंसु. मनुस्सा उक्कुट्ठिं अकंसु – ‘‘सुन्दरा अय्याय थनुदरा’’ति. सा भिक्खुनी तेहि मनुस्सेहि उप्पण्डियमाना मङ्कु अहोसि. अथ खो सा भिक्खुनी उपस्सयं गन्त्वा भिक्खुनीनं एतमत्थं आरोचेसि. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनी असङ्कच्चिका गामं पविसिस्सती’’ति…पे… सच्चं किर, भिक्खवे, भिक्खुनी असङ्कच्चिका गामं पाविसीति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, भिक्खुनी असङ्कच्चिका गामं पविसिस्सति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१२२५. ‘‘या पन भिक्खुनी असङ्कच्चिका [असङ्कच्छिका (स्या.)] गामं पविसेय्य, पाचित्तिय’’न्ति.

१२२६. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

असङ्कच्चिकाति विना सङ्कच्चिकं.

सङ्कच्चिकं नाम अधक्खकं उब्भनाभि, तस्स पटिच्छादनत्थाय.

गामं पविसेय्याति परिक्खित्तस्स गामस्स परिक्खेपं अतिक्कामेन्तिया आपत्ति पाचित्तियस्स. अपरिक्खित्तस्स गामस्स उपचारं ओक्कमन्तिया आपत्ति पाचित्तियस्स.

१२२७. अनापत्ति अच्छिन्नचीवरिकाय, नट्ठचीवरिकाय, गिलानाय, अस्सतिया, अजानन्तिया, आपदासु, उम्मत्तिकाय, आदिकम्मिकायाति.

तेरसमसिक्खापदं निट्ठितं.

छत्तुपाहनवग्गो नवमो.

उद्दिट्ठा खो, अय्यायो, छसट्ठिसता पाचित्तिया धम्मा. तत्थाय्यायो पुच्छामि – ‘‘कच्चित्थ परिसुद्धा’’? दुतियम्पि पुच्छामि – ‘‘कच्चित्थ परिसुद्धा’’? ततियम्पि पुच्छामि – ‘‘कच्चित्थ परिसुद्धा’’? परिसुद्धेत्थाय्यायो, तस्मा तुण्ही, एवमेतं धारयामीति.

खुद्दकं समत्तं.

भिक्खुनिविभङ्गे पाचित्तियकण्डं निट्ठितं.