८. अट्ठमसिक्खापदं

१००८. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन थुल्लनन्दा भिक्खुनी आवसथं अनिस्सज्जित्वा चारिकं पक्कामि. तेन खो पन समयेन थुल्लनन्दाय भिक्खुनिया आवसथो डय्हति. भिक्खुनियो एवमाहंसु – ‘‘हन्दाय्ये, भण्डकं नीहरामा’’ति. एकच्चा एवमाहंसु – ‘‘न मयं, अय्ये, नीहरिस्साम. यं किञ्चि नट्ठं सब्बं अम्हे अभियुञ्जिस्सती’’ति. थुल्लनन्दा भिक्खुनी पुनदेव तं आवसथं पच्चागन्त्वा भिक्खुनियो पुच्छि – ‘‘अपाय्ये, भण्डकं नीहरित्था’’ति? ‘‘न मयं, अय्ये, नीहरिम्हा’’ति. थुल्लनन्दा भिक्खुनी उज्झायति खिय्यति विपाचेति – ‘‘कथञ्हि नाम भिक्खुनियो आवसथे डय्हमाने भण्डकं न नीहरिस्सन्ती’’ति! या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम अय्या थुल्लनन्दा आवसथं अनिस्सज्जित्वा चारिकं पक्कमिस्सती’’ति…पे… सच्चं किर, भिक्खवे, थुल्लनन्दा भिक्खुनी आवसथं अनिस्सज्जित्वा चारिकं पक्कमतीति [पक्कमीति (क.)]? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, थुल्लनन्दा भिक्खुनी आवसथं अनिस्सज्जित्वा चारिकं पक्कमिस्सति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१००९. ‘‘या पन भिक्खुनी आवसथं अनिस्सज्जित्वा चारिकं पक्कमेय्य, पाचित्तिय’’न्ति.

१०१०. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

आवसथो नाम कवाटबद्धो वुच्चति.

अनिस्सज्जित्वा चारिकं पक्कमेय्याति भिक्खुनिया वा सिक्खमानाय वा सामणेरिया वा अनिस्सज्जित्वा परिक्खित्तस्स आवसथस्स परिक्खेपं अतिक्कामेन्तिया आपत्ति पाचित्तियस्स. अपरिक्खित्तस्स आवसथस्स उपचारं अतिक्कामेन्तिया आपत्ति पाचित्तियस्स.

१०११. अनिस्सज्जिते अनिस्सज्जितसञ्ञा पक्कमति, आपत्ति पाचित्तियस्स. अनिस्सज्जिते वेमतिका पक्कमति, आपत्ति पाचित्तियस्स. अनिस्सज्जिते निस्सज्जितसञ्ञा पक्कमति, आपत्ति पाचित्तियस्स.

अकवाटबद्धं अनिस्सज्जित्वा पक्कमति, आपत्ति दुक्कटस्स. निस्सज्जिते अनिस्सज्जितसञ्ञा, आपत्ति दुक्कटस्स. निस्सज्जिते वेमतिका, आपत्ति दुक्कटस्स. निस्सज्जिते निस्सज्जितसञ्ञा, अनापत्ति.

१०१२. अनापत्ति निस्सज्जित्वा पक्कमति, सति अन्तराये, परियेसित्वा न लभति, गिलानाय, आपदासु, उम्मत्तिकाय, आदिकम्मिकायाति.

अट्ठमसिक्खापदं निट्ठितं.