२. दुतियसिक्खापदं

७३८. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन सम्बहुला भिक्खुनियो गामकावासे वस्संवुट्ठा [वस्संवुत्था (सी. स्या.)] सावत्थिं अगमंसु वत्तसम्पन्ना इरियापथसम्पन्ना दुच्चोळा लूखचीवरा. उपासका ता भिक्खुनियो पस्सित्वा – ‘‘इमा भिक्खुनियो वत्तसम्पन्ना इरियापथसम्पन्ना दुच्चोळा लूखचीवरा, इमा भिक्खुनियो अच्छिन्ना भविस्सन्ती’’ति भिक्खुनिसङ्घस्स अकालचीवरं अदंसु. थुल्लनन्दा भिक्खुनी – ‘‘अम्हाकं कथिनं अत्थतं कालचीवर’’न्ति अधिट्ठहित्वा भाजापेसि. उपासका ता भिक्खुनियो पस्सित्वा एतदवोचुं – ‘‘अपय्याहि चीवरं लद्ध’’न्ति? ‘‘न मयं, आवुसो, चीवरं लभाम. अय्या थुल्लनन्दा – ‘अम्हाकं कथिनं अत्थतं कालचीवर’न्ति अधिट्ठहित्वा भाजापेसी’’ति. उपासका उज्झायन्ति खिय्यन्ति विपाचेन्ति – ‘‘कथञ्हि नाम अय्या थुल्लनन्दा अकालचीवरं ‘कालचीवर’न्ति अधिट्ठहित्वा भाजापेस्सती’’ति! अस्सोसुं खो भिक्खुनियो तेसं उपासकानं उज्झायन्तानं खिय्यन्तानं विपाचेन्तानं. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम अय्या थुल्लनन्दा अकालचीवरं ‘कालचीवर’न्ति अधिट्ठहित्वा भाजापेस्सती’’ति! अथ खो ता भिक्खुनियो भिक्खूनं एतमत्थं आरोचेसुं. भिक्खू भगवतो एतमत्थं आरोचेसुं …पे… सच्चं किर, भिक्खवे, थुल्लनन्दा भिक्खुनी अकालचीवरं ‘‘कालचीवर’’न्ति अधिट्ठहित्वा भाजापेतीति [भाजापेसीति (क.)]? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, थुल्लनन्दा भिक्खुनी अकालचीवरं ‘‘कालचीवर’’न्ति अधिट्ठहित्वा भाजापेस्सति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

७३९. ‘‘या पन भिक्खुनी अकालचीवरं ‘कालचीवर’न्ति अधिट्ठहित्वा भाजापेय्य, निस्सग्गियं पाचित्तिय’’न्ति.

७४०. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

अकालचीवरं नाम अनत्थते कथिने एकादसमासे उप्पन्नं, अत्थते कथिने सत्तमासे उप्पन्नं, कालेपि आदिस्स दिन्नं, एतं अकालचीवरं नाम.

अकालचीवरं ‘‘कालचीवर’’न्ति अधिट्ठहित्वा भाजापेति, पयोगे दुक्कटं. पटिलाभेन निस्सग्गियं होति. निस्सज्जितब्बं सङ्घस्स वा गणस्स वा एकभिक्खुनिया वा. एवञ्च पन, भिक्खवे, निस्सज्जितब्बं…पे… इदं मे, अय्ये, अकालचीवरं ‘‘कालचीवर’न्ति अधिट्ठहित्वा भाजापितं निस्सग्गियं, इमाहं सङ्घस्स निस्सज्जामी’’ति…पे… ददेय्याति…पे… ददेय्युन्ति…पे… अय्याय दम्मीति.

७४१. अकालचीवरे अकालचीवरसञ्ञा ‘‘कालचीवर’’न्ति अधिट्ठहित्वा भाजापेति, निस्सग्गियं पाचित्तियं. अकालचीवरे वेमतिका ‘‘कालचीवर’’न्ति अधिट्ठहित्वा भाजापेति, आपत्ति दुक्कटस्स. अकालचीवरे कालचीवरसञ्ञा ‘‘कालचीवर’’न्ति अधिट्ठहित्वा भाजापेति, अनापत्ति. कालचीवरे अकालचीवरसञ्ञा, आपत्ति दुक्कटस्स. कालचीवरे वेमतिका, आपत्ति दुक्कटस्स. कालचीवरे कालचीवरसञ्ञा, अनापत्ति.

७४२. अनापत्ति अकालचीवरं कालचीवरसञ्ञा भाजापेति, कालचीवरं कालचीवरसञ्ञा भाजापेति, उम्मत्तिकाय, आदिकम्मिकायाति.

दुतियसिक्खापदं निट्ठितं.