२२८. सब्बनीलकादिपटिक्खेपकथा

३७२. तेन खो पन समयेन छब्बग्गिया भिक्खू सब्बनीलकानि चीवरानि धारेन्ति…पे… सब्बपीतकानि चीवरानि धारेन्ति…पे… सब्बलोहितकानि चीवरानि धारेन्ति…पे… सब्बमञ्जिट्ठकानि [सब्बमञ्जेट्ठकानि (सी. स्या.)] चीवरानि धारेन्ति…पे… सब्बकण्हानि चीवरानि धारेन्ति …पे… सब्बमहारङ्गरत्तानि चीवरानि धारेन्ति…पे… सब्बमहानामरत्तानि चीवरानि धारेन्ति…पे… अच्छिन्नदसानि चीवरानि धारेन्ति…पे… दीघदसानि चीवरानि धारेन्ति…पे… पुप्फदसानि चीवरानि धारेन्ति…पे… फणदसानि [फलदसानि (क.)] चीवरानि धारेन्ति…पे… कञ्चुकं धारेन्ति…पे… तिरीटकं धारेन्ति…पे… वेठनं धारेन्ति. मनुस्सा उज्झायन्ति खिय्यन्ति विपाचेन्ति – ‘‘कथञ्हि नाम समणा सक्यपुत्तिया वेठनं धारेस्सन्ति, सेय्यथापि गिही कामभोगिनो’’ति. भगवतो एतमत्थं आरोचेसुं. न, भिक्खवे, सब्बनीलकानि चीवरानि धारेतब्बानि, न सब्बपीतकानि चीवरानि धारेतब्बानि, न सब्बलोहितकानि चीवरानि धारेतब्बानि, न सब्बमञ्जिट्ठकानि चीवरानि धारेतब्बानि, न सब्बकण्हानि चीवरानि धारेतब्बानि, न सब्बमहारङ्गरत्तानि चीवरानि धारेतब्बानि, न सब्बमहानामरत्तानि चीवरानि धारेतब्बानि, न अच्छिन्नदसानि चीवरानि धारेतब्बानि, न दीघदसानि चीवरानि धारेतब्बानि, न पुप्फदसानि चीवरानि धारेतब्बानि, न फणदसानि चीवरानि धारेतब्बानि, न कञ्चुकं धारेतब्बं, न तिरीटकं धारेतब्बं, न वेठनं धारेतब्बं. यो धारेय्य, आपत्ति दुक्कटस्साति.

सब्बनीलकादिपटिक्खेपकथा निट्ठिता.