२१५. चीवररजनकथा

३४४. तेन खो पन समयेन भिक्खू छकणेनपि पण्डुमत्तिकायपि चीवरं रजन्ति. चीवरं दुब्बण्णं होति. भगवतो एतमत्थं आरोचेसुं. अनुजानामि, भिक्खवे, छ रजनानि – मूलरजनं, खन्धरजनं, तचरजनं, पत्तरजनं, पुप्फरजनं, फलरजनन्ति.

तेन खो पन समयेन भिक्खू सीतुदकाय [सीतुन्दिकाय (सी.), सीतूदकाय (स्या.)] चीवरं रजन्ति. चीवरं दुग्गन्धं होति. भगवतो एतमत्थं आरोचेसुं. अनुजानामि, भिक्खवे, रजनं पचितुं चुल्लं रजनकुम्भिन्ति. रजनं उत्तरियति. भगवतो एतमत्थं आरोचेसुं. अनुजानामि, भिक्खवे, उत्तराळुम्पं [उत्तराळुपं (योजना), उत्तराळुपं (स्या.)] बन्धितुन्ति.

तेन खो पन समयेन भिक्खू न जानन्ति रजनं पक्कं वा अपक्कं वा. भगवतो एतमत्थं आरोचेसुं. अनुजानामि, भिक्खवे, उदके वा नखपिट्ठिकाय वा थेवकं दातुन्ति.

तेन खो पन समयेन भिक्खू रजनं ओरोपेन्ता कुम्भिं आविञ्छन्ति [आविञ्जन्ति (सी.), आवट्टन्ति (स्या.)]. कुम्भी भिज्जति. भगवतो एतमत्थं आरोचेसुं. अनुजानामि, भिक्खवे, रजनुळुङ्कं [रजनाळुङ्कं (योजना)] दण्डकथालकन्ति.

तेन खो पन समयेन भिक्खूनं रजनभाजनं न संविज्जति. भगवतो एतमत्थं आरोचेसुं. अनुजानामि, भिक्खवे, रजनकोलम्बं रजनघटन्ति.

तेन खो पन समयेन भिक्खू पातियापि पत्तेपि चीवरं ओमद्दन्ति. चीवरं परिभिज्जति. भगवतो एतमत्थं आरोचेसुं. अनुजानामि, भिक्खवे, रजनदोणिकन्ति.

तेन खो पन समयेन भिक्खू छमाय चीवरं पत्थरन्ति. चीवरं पंसुकितं होति. भगवतो एतमत्थं आरोचेसुं. अनुजानामि, भिक्खवे, तिणसन्थारकन्ति.

तिणसन्थारको उपचिकाहि खज्जति. भगवतो एतमत्थं आरोचेसुं. अनुजानामि, भिक्खवे, चीवरवंसं चीवररज्जुन्ति.

मज्झेन लग्गेन्ति. रजनं उभतो गलति. भगवतो एतमत्थं आरोचेसुं. अनुजानामि, भिक्खवे, कण्णे बन्धितुन्ति.

कण्णो जीरति. भगवतो एतमत्थं आरोचेसुं. अनुजानामि, भिक्खवे, कण्णसुत्तकन्ति.

रजनं एकतो गलति. भगवतो एतमत्थं आरोचेसुं. अनुजानामि, भिक्खवे, सम्परिवत्तकं सम्परिवत्तकं रजेतुं, न च अच्छिन्ने थेवे पक्कमितुन्ति.

तेन खो पन समयेन चीवरं पत्थिन्नं होति. भगवतो एतमत्थं आरोचेसुं. अनुजानामि, भिक्खवे, उदके ओसारेतुन्ति.

तेन खो पन समयेन चीवरं फरुसं होति. भगवतो एतमत्थं आरोचेसुं. अनुजानामि, भिक्खवे, पाणिना आकोटेतुन्ति.

तेन खो पन समयेन भिक्खू अच्छिन्नकानि चीवरानि धारेन्ति दन्तकासावानि. मनुस्सा उज्झायन्ति खिय्यन्ति विपाचेन्ति – सेय्यथापि नाम [सेय्यथापि (?)] गिही कामभोगिनोति. भगवतो एतमत्थं आरोचेसुं. न, भिक्खवे, अच्छिन्नकानि चीवरानि धारेतब्बानि. यो धारेय्य, आपत्ति दुक्कटस्साति.

चीवररजनकथा निट्ठिता.