१९२. आदायपन्नरसकं

३१५. भिक्खु अत्थतकथिनो चीवरं आदाय पक्कमति. तस्स बहिसीमगतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो चीवरं आदाय पक्कमति. तस्स बहिसीमगतस्स एवं होति – ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो चीवरं आदाय पक्कमति. तस्स बहिसीमगतस्स एवं होति –

‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

तिकं.

भिक्खु अत्थतकथिनो चीवरं आदाय पक्कमति ‘‘न पच्चेस्स’’न्ति. तस्स बहिसीमगतस्स एवं होति – ‘‘इधेविमं चीवरं कारेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो चीवरं आदाय पक्कमति ‘‘न पच्चेस्स’’न्ति. तस्स बहिसीमगतस्स एवं होति – ‘‘नेविमं चीवरं कारेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो चीवरं आदाय पक्कमति ‘‘न पच्चेस्स’’न्ति. तस्स बहिसीमगतस्स एवं होति – ‘‘इधेविमं चीवरं कारेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

तिकं.

भिक्खु अत्थतकथिनो चीवरं आदाय पक्कमति अनधिट्ठितेन; नेवस्स होति ‘‘पच्चेस्स’’न्ति, न पनस्स होति ‘‘न पच्चेस्स’’न्ति. तस्स बहिसीमगतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो चीवरं आदाय पक्कमति अनधिट्ठितेन; नेवस्स होति ‘‘पच्चेस्स’’न्ति, न पनस्स होति ‘‘न पच्चेस्स’’न्ति. तस्स बहिसीमगतस्स एवं होति – ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो चीवरं आदाय पक्कमति अनधिट्ठितेन; नेवस्स होति ‘‘पच्चेस्स’’न्ति, न पनस्स होति ‘‘न पच्चेस्स’’न्ति. तस्स बहिसीमगतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

तिकं.

भिक्खु अत्थतकथिनो चीवरं आदाय पक्कमति ‘‘पच्चेस्स’’न्ति. तस्स बहिसीमगतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो चीवरं आदाय पक्कमति ‘‘पच्चेस्स’’न्ति. तस्स बहिसीमगतस्स एवं होति – ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो चीवरं आदाय पक्कमति ‘‘पच्चेस्स’’न्ति. तस्स बहिसीमगतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

भिक्खु अत्थतकथिनो चीवरं आदाय पक्कमति ‘‘पच्चेस्स’’न्ति. सो बहिसीमगतो तं चीवरं कारेति. सो कतचीवरो सुणाति – ‘‘उब्भतं किर तस्मिं आवासे कथिन’’न्ति. तस्स भिक्खुनो सवनन्तिको कथिनुद्धारो.

भिक्खु अत्थतकथिनो चीवरं आदाय पक्कमति ‘‘पच्चेस्स’’न्ति. सो बहिसीमगतो तं चीवरं कारेति. सो कतचीवरो ‘‘पच्चेस्सं पच्चेस्स’’न्ति – बहिद्धा कथिनुद्धारं वीतिनामेति. तस्स भिक्खुनो सीमातिक्कन्तिको कथिनुद्धारो.

भिक्खु अत्थतकथिनो चीवरं आदाय पक्कमति ‘‘पच्चेस्स’’न्ति. सो बहिसीमगतो तं चीवरं कारेति. सो कतचीवरो – ‘‘पच्चेस्सं पच्चेस्स’’न्ति सम्भुणाति कथिनुद्धारं. तस्स भिक्खुनो सह भिक्खूहि कथिनुद्धारो.

छक्कं.

आदायपन्नरसकं निट्ठितं.