१८९. समादायसत्तकं

३१२. भिक्खु अत्थतकथिनो कतचीवरं समादाय पक्कमति ‘‘न पच्चेस्स’’न्ति. तस्स भिक्खुनो पक्कमनन्तिको कथिनुद्धारो.

भिक्खु अत्थतकथिनो चीवरं समादाय पक्कमति. तस्स बहिसीमगतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो चीवरं समादाय पक्कमति. तस्स बहिसीमगतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो चीवरं समादाय पक्कमति. तस्स बहिसीमगतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

भिक्खु अत्थतकथिनो चीवरं समादाय पक्कमति – ‘‘पच्चेस्स’’न्ति. सो बहिसीमगतो तं चीवरं कारेति. सो कतचीवरो सुणाति – ‘‘उब्भतं किर तस्मिं आवासे कथिन’’न्ति. तस्स भिक्खुनो सवनन्तिको कथिनुद्धारो.

भिक्खु अत्थतकथिनो चीवरं समादाय पक्कमति – ‘‘पच्चेस्स’’न्ति. सो बहिसीमगतो तं चीवरं कारेति. सो कतचीवरो – ‘‘पच्चेस्सं पच्चेस्स’’न्ति – बहिद्धा कथिनुद्धारं वीतिनामेति. तस्स भिक्खुनो सीमातिक्कन्तिको कथिनुद्धारो.

भिक्खु अत्थतकथिनो चीवरं समादाय पक्कमति – ‘‘पच्चेस्स’’न्ति. सो बहिसीमगतो तं चीवरं कारेति. सो कतचीवरो – ‘‘पच्चेस्सं पच्चेस्स’’न्ति – सम्भुणाति कथिनुद्धारं. तस्स भिक्खुनो सह भिक्खूहि कथिनुद्धारो.

समादायसत्तकं निट्ठितं.