१३५. लिङ्गादिदस्सनं

२२९. इध पन, भिक्खवे, आगन्तुका भिक्खू पस्सन्ति आवासिकानं भिक्खूनं आवासिकाकारं, आवासिकलिङ्गं, आवासिकनिमित्तं, आवासिकुद्देसं, सुप्पञ्ञत्तं मञ्चपीठं भिसिबिब्बोहनं, पानीयं परिभोजनीयं सपट्ठितं, परिवेणं सुसम्मट्ठं; पस्सित्वा वेमतिका होन्ति – ‘‘अत्थि नु खो आवासिका भिक्खू, नत्थि नु खो’’ति. ते वेमतिका न विचिनन्ति, अविचिनित्वा पवारेन्ति. आपत्ति दुक्कटस्स…पे… ते वेमतिका विचिनन्ति, विचिनित्वा न पस्सन्ति, अपस्सित्वा पवारेन्ति. अनापत्ति. ते वेमतिका विचिनन्ति, विचिनित्वा पस्सन्ति, पस्सित्वा एकतो पवारेन्ति. अनापत्ति. ते वेमतिका विचिनन्ति, विचिनित्वा पस्सन्ति, पस्सित्वा पाटेक्कं पवारेन्ति. आपत्ति दुक्कटस्स. ते वेमतिका विचिनन्ति, विचिनित्वा पस्सन्ति, पस्सित्वा – ‘‘नस्सन्तेते, विनस्सन्तेते, को तेहि अत्थो’’ति – भेदपुरेक्खारा पवारेन्ति. आपत्ति थुल्लच्चयस्स.

इध पन, भिक्खवे, आगन्तुका भिक्खू सुणन्ति आवासिकानं भिक्खूनं आवासिकाकारं, आवासिकलिङ्गं, आवासिकनिमित्तं, आवासिकुद्देसं, चङ्कमन्तानं पदसद्दं, सज्झायसद्दं, उक्कासितसद्दं, खिपितसद्दं; सुत्वा वेमतिका होन्ति – ‘‘अत्थि नु खो आवासिका भिक्खू, नत्थि नु खो’’ति. ते वेमतिका न विचिनन्ति, अविचिनित्वा पवारेन्ति. आपत्ति दुक्कटस्स. ते वेमतिका विचिनन्ति, विचिनित्वा न पस्सन्ति, अपस्सित्वा पवारेन्ति. अनापत्ति. ते वेमतिका विचिनन्ति, विचिनित्वा पस्सन्ति, पस्सित्वा एकतो पवारेन्ति. अनापत्ति. ते वेमतिका विचिनन्ति, विचिनित्वा पस्सन्ति, पस्सित्वा पाटेक्कं पवारेन्ति. आपत्ति दुक्कटस्स. ते वेमतिका विचिनन्ति, विचिनित्वा पस्सन्ति, पस्सित्वा ‘‘नस्सन्तेते, विनस्सन्तेते, को तेहि अत्थो’’ति भेदपुरेक्खारा पवारेन्ति. आपत्ति थुल्लच्चयस्स.

इध पन, भिक्खवे, आवासिका भिक्खू पस्सन्ति आगन्तुकानं भिक्खूनं आगन्तुकाकारं, आगन्तुकलिङ्गं, आगन्तुकनिमित्तं, आगन्तुकुद्देसं, अञ्ञातकं पत्तं, अञ्ञातकं चीवरं, अञ्ञातकं निसीदनं, पादानं धोतं, उदकनिस्सेकं; पस्सित्वा वेमतिका होन्ति – ‘‘अत्थि नु खो आगन्तुका भिक्खू, नत्थि नु खो’’ति. ते वेमतिका न विचिनन्ति, अविचिनित्वा पवारेन्ति. आपत्ति दुक्कटस्स. ते वेमतिका विचिनन्ति, विचिनित्वा न पस्सन्ति, अपस्सित्वा पवारेन्ति. अनापत्ति. ते वेमतिका विचिनन्ति, विचिनित्वा पस्सन्ति, पस्सित्वा एकतो पवारेन्ति. अनापत्ति. ते वेमतिका विचिनन्ति, विचिनित्वा पस्सन्ति, पस्सित्वा पाटेक्कं पवारेन्ति. आपत्ति दुक्कटस्स. ते वेमतिका विचिनन्ति, विचिनित्वा पस्सन्ति, पस्सित्वा – नस्सन्तेते, विनस्सन्तेते, को तेहि अत्थोति – भेदपुरेक्खारा पवारेन्ति. आपत्ति थुल्लच्चयस्स.

इध पन, भिक्खवे, आवासिका भिक्खू सुणन्ति आगन्तुकानं भिक्खूनं आगन्तुकाकारं,

आगन्तुकलिङ्गं, आगन्तुकनिमित्तं, आगन्तुकुद्देसं, आगच्छन्तानं पदसद्दं, उपाहनपप्फोटनसद्दं, उक्कासितसद्दं, खिपितसद्दं; सुत्वा वेमतिका होन्ति – ‘‘अत्थि नु खो आगन्तुका भिक्खू, नत्थि नु खो’’ति. ते वेमतिका न विचिनन्ति, अविचिनित्वा पवारेन्ति. आपत्ति दुक्कटस्स. ते वेमतिका विचिनन्ति, विचिनित्वा न पस्सन्ति, अपस्सित्वा पवारेन्ति. अनापत्ति. ते वेमतिका विचिनन्ति, विचिनित्वा पस्सन्ति, पस्सित्वा एकतो पवारेन्ति. अनापत्ति. ते वेमतिका विचिनन्ति, विचिनित्वा पस्सन्ति, पस्सित्वा पाटेक्कं पवारेन्ति. आपत्ति दुक्कटस्स. ते वेमतिका विचिनन्ति, विचिनित्वा पस्सन्ति, पस्सित्वा – नस्सन्तेते, विनस्सन्तेते, को तेहि अत्थोति – भेदपुरेक्खारा पवारेन्ति. आपत्ति थुल्लच्चयस्स.

लिङ्गादिदस्सनं निट्ठितं.